ខេត្តកំពង់ចាម ៖ កាលពីរសៀលថ្ងៃទី ១៧ ខែកញ្ញាឆ្នាំ ២០១៩ លោក ជឺ ប៊ុនថន ជាម្ចាស់ក្រុមហ៊ុន ជឺ ប៊ុនថន ឯ.ក រួមជាមួយនឹងក្រុមអាជីវករនៅឃុំផ្អាវ ស្រុកបាធាយ ខេត្តកំពង់ចាម បាននាំគ្នាសំណូមពរ ដល់ប្រមុខរាជរដ្ឋាភិបាលកម្ពុជា ជួយអន្តរាគមន៍ ដើម្បីសុំសិទ្ធិបន្តសុពលភាព ក្រុមហ៊ុន បានដំណើរការបន្តទៀត។ បើតាមលោក ជឺ ប៊ុនថន បានអោយដឹងថា៖ ក្រុមហ៊ុន របស់លោក បានទទួលសិទ្ធិចាប់តាំងពីឆ្នាំ២០១៧ ធ្វើអាជីវកម្ម នាំមាន់រស់ចូលពីប្រទេសថៃ និងប្រទេសវៀតណាម ។ ប៉ុន្តែ រហូតមកដល់ថ្ងៃទី១៧ ខែកក្កដា ឆ្នាំ ២០១៩ នេះ ក្រុមហ៊ុនរបស់លោក ត្រូវបាន លោកអគ្គនាយក នៃអគ្គនាយកដ្ឋាន សុខភាពសត្វ និង ផល្លិតកម្មសត្វ ឈប់បន្តសុពលភាព អោយធ្វើអាជីវកម្មបន្តទៀត ដោយពុំមានមូលហេតុច្បាស់លាស់ ។ លោក ជឺ ប៊ុនថន អោយដឹងទៀតថា៖ ការផ្អាកមិនបន្តអោយក្រុមហ៊ុនរបស់លោកធ្វើអាជីវ កម្ម ហាក់ដូចជាមិនតម្លាភាពសោះ ព្រោះថា ក្នុងពេលតែមួយ ខាងអគ្គនាយកដ្ឋាន សុខភាពសត្វ និង ផល្លិតកម្មសត្វ បានអនុញ្ញាតអោយក្រុមហ៊ុនផ្សេងបានបន្តសុពលភាព ។ ដោយឡែកចំពោះ ក្រុមហ៊ុន របស់លោក ត្រូវបានផ្អាកមិនអនុញ្ញាតអោយបន្តសុពលភាពដោយគ្មានមូលហេតុ ។ ហេតុដូច្នេះ ហើយទើបលោករួមនិងអាជីវករនៅឃុំផ្អាវ សំណូមពរដល់ប្រមុខរាជរដ្ឋាភិបាលកម្ពុជា មេត្តាជួយអន្តរាគមន៍ ជួយអោយក្រុមហ៊ុនរបស់លោក បានបន្តសុពលភាព ដើម្បីជួយ សម្រួលការរកស៊ី ដល់ក្រុមអាជីវករ ដែលជាដៃគូធ្វើអាជីវកម្មផងដែរ ។ តំណាងអាជីវករលក់មាន់ បងស្រី ម៉ន ក៏បានអោយដឹងដែរថា៖ ពួកគាត់ជាអាជីវករធ្វើអាជីវកម្ម ជាមួយក្រុមហ៊ុន ជឺ ប៊ុនថន នាំសត្វមាន់រស់ ពីប្រទេសថៃ គឺមានការសហការក្នុងរបររកស៊ី មានភាពល្អប្រសើរ ដោយម្ចាស់ក្រុមហ៊ុន មិនបានគាបសង្កត់ មកលើក្រុមអាជីវករឡើយ ។ ប៉ុន្តែ ក្រោយពេលដែល ខាងអគ្គនាយកដ្ឋាន សុខភាពសត្វ និង ផល្លិតកម្មសត្វ មិនបន្តសុពលភាពអោយក្រុមហ៊ុន ជឺ ប៊ុនថន ឯ.កធ្វើអោយពួកគាត់ត្រូវបានក្រុមហ៊ុនកំពុងទទួលសិទ្ធិ មានការគាបសង្កត់ប្រមូលយកលុយច្រើនៗ ក្នុងសេវាផ្នែកច្បាប់អនុញ្ញាតអោយពួកគាត់នាំសត្វមាន់ចូលពីប្រទេសថៃ។ ពួកគាត់បន្តថា៖ សូមគាំទ្រចំពោះក្រុមហ៊ុន ជឺ ប៊ុនថន និងសូមសំណូមពរដល់ប្រមុខរាជរដ្ឋាភិបាល ជាពិសេសសម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សូមមេត្តាជួយអន្តរាគមន៍ ផ្ដល់សិទ្ធិបន្តសុពលភាពអោយក្រុមហ៊ុន ជឺ ប៊ុនថន ឯ.ក មួយនេះ ដើម្បីអោយពួកគាត់ជាក្រុមអាជីវករ បានបន្តធ្វើអាជីវកម្មជាមួយក្រុមហ៊ុននេះ បន្តទៀតផងទាន៕ ដោយៈ សេង រ័ត្ន និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpetpostnews.com