មានវីដេអូ.! រោងសិប្បកម្មឈើអត់ច្បាប់របស់ លោក វ៉ា ជនជាតិ វៀតណាម មួយកន្លែង នៅច្រកចូលអូរតាយ៉ត ស្រុកត្រពាំងប្រាសាទ សង្ស័យជាខ្សែស្រលាយយរបស់អស់លោកមេព្រៃទេដឹងទើបមិនដែលធ្វើការបង្ក្រាប.!!!
ខេត្តឧត្តរមានជ័យ៖ រោងសិប្បកម្មអត់ច្បាប់ របស់ លោក វ៉ា ជនជាតិវៀតណាម ដ៏ធំសម្បើមមួយកន្លែងស្ថិតនៅចំណុច ភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ចូលតាមច្រកក្លោងទ្វារអូរតាយ៉ត ចម្ងាយប្រហែល ៣០០ ម៉ែត្រពីក្លោងទ្វារ ធ្វើសកម្មភាពបើកធ្វើអស់រយៈពេលជាច្រើនឆ្នាំកន្លងមកហើយ តែមិនដែលឃើញមានអស់លោកមន្ដ្រីជំនាញទាំងនោះធ្វើការចុះបង្ក្រាបសោះឡើយ សង្ស័យតែជាខ្សែស្រលាយយរបស់មេព្រៃទាំងនោះក៏មិនដឹង ទើបបានអស់លោកមិនដែលចុះចាប់បង្ក្រាប។
ជាក់សែ្តងនៅព្រឹកថ្ងៃសៅរ៍ ទី១២ ខែធ្នូ ឆ្នាំ២០២០ វេលាម៉ោង០៨ និង២០ នាទី សារព័ត៌មានយើងបានចុះទៅថត និងផ្ដិតយករូបភាព នៅទីកន្លែងនោះផ្ទាល់ ឃើញមាន ម៉ាស៊ីនតាបជ្រៀកឈូស និងឈើតាប់ដុំតូចធំជាច្រើនម៉ែត្រគីប ឈើស្លឹកមុខកាត់ធំៗជាច្រើនសន្លឹក មានជាងកំពុងធ្វើនៅទីនោះផ្ទាល់។
ប្រជាពលរដ្ឋសម្ដែងការហួសចិត្តយ៉ាងខ្លាំងចំពោះលោក ជៀល សុផល នាយសង្កាត់រដ្ឋាភិបាលព្រៃឈើស្រុកត្រពាំងប្រាសាទ ក្នុងនាមលោកជានាយសង្កាត់រដ្ឋបាលព្រៃឈើ គួរតែធ្វើការចាប់បង្ក្រាបហេតុអ្វីមិនបង្ក្រាប បែជាបណ្ដែតបណ្ដោយឲ្យបទល្មើសធ្វើការបំផ្លាញព្រៃឈើធនធានធម្មជាតិបានយ៉ាងរលូនរាប់ឆ្នាំបែបនេះទៅវិញ?។
ប្រជាពលរដ្ឋសូមសំណូមពរដល់មន្ដ្រីជំនាញថ្នាក់ជាតិ ជួយធ្វើការចុះបង្ក្រាបទីតាំងសិប្បកម្មដ៏ធំមហិមានេះផង បើសង្ឃឹមលើមន្ដ្រីជំនាញក្នុងស្រុកត្រពាំងប្រាសាទឲ្យធ្វើការបង្ក្រាប គឹមិនងាយនោះទេ៕
ដោយ: លោក សួន ចំណាប់
គេហទំព័រ ប៉ោយប៉ែត ប៉ុស្តិ៍
www.poipetpostnews.com
