ខេត្តបន្ទាយមានជ័យ៖ លោកវរសេនីយ៍ទោ សៅ សារឿន អធិការនគរបាល​ស្រុកថ្មពួក​ បានដឹកនាំកម្លាំង​ចុះ​ផ្សព្វផ្សាយ​អប់រំ និងណែនាំដល់ក្រុមបងប្អូនអាជីវករលក់គ្រឿងសម្ភារៈ សែន ចិន វៀតណា​ម ហាមដាក់តាំងលក់គ្រឿងផ្ទុះ រំសេវផាវ និងកាំជ្រួចជាដាច់ខាត ដើម្បីធានាក្នុងការការពារសន្តិសុខសុវត្ថិភាព និងសណ្ដាប់​ធ្នាប់ជូនប្រជា​ពល​រដ្ឋ នៅក្នុងឱកាសបុណ្យប្រ​ពៃណី​ ចិន វៀតណាម ដែលចំនួន០៣ថ្ងៃ ចាប់ពីថ្ងៃទី២៥-២៦-២៧ ខែមករា ឆ្នាំ២០​២០​ ខាងមុននេះ។ លោកវរសេនីយ៍ទោ សៅ សារឿន អធិការនគរបាល​ស្រុកថ្មពួក​ បានអោយសារព័ត៌មាន (គេហទំព័រ ប៉ោយប៉ែតប៉ុស្តិ៍) ដឹងយ៉ាងច្បាស់ថា ៖ ការដែលលោកដឹកនាំកំលាំងចុះផ្សសព្វផ្សាយអប់រំប់រំ និង ណែនាំដល់អាជីវករលក់ដូរ គឺហាមមិនអោយលក់គ្រឿងផ្ទុះ រំសេវ ផាវ និង កាំជ្រួច នេះផងដែរ ដោយយោងតាមសេចក្តីប្រកាស ០០១ របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ចុះថ្ងៃច័ន្ទ ៤រោច ខែបុស្ស ឆ្នាំកុរ ឯកស័ក ព.ស២៥៦៣ ត្រូវនិងថ្ងៃទី១៣ ខែមករា ឆ្នាំ២០២០ កន្លងទៅថ្មីៗនេះ សូមធ្វើការណែនាំដល់ការិយាល័យជំនាញនិងតាមបណ្ដាអធិការក្រុងស្រុកទាំង០៩ ដូចខាងក្រោម៖ ទី១-ហាមដាច់ខាតនូវការនាំចូលរំសេវផាវកាំជ្រួចគ្រប់ប្រភេទ។ ទី២-ចុះណែនាំដល់អាជីវករតាមផ្សារនៅតាមមូលដ្ឋានរបស់ខ្លួនអំពីផលប៉ះពាល់នៃរំសេវផាវនិងកាំជ្រួច។  ទី៣-ផ្សព្វផ្សាយដល់ប្រជាពលរដ្ឋមិនអនុញ្ញាតឲ្យលេងផាវកាំជ្រួចនៅតាមទីសាធារណៈដែលនាំឲ្យបាត់បង់សណ្ដាប់ធ្នាប់និងមានការរំខានដល់អ្នកដទៃពិសេសដល់ឪពុកម្ដាយឬអាណាព្យាបាលដែលមានកូនតូចតូចនាយរងគ្រោះ។  ទី៤-ធ្វើការផ្សព្វផ្សាយអប់រំឲ្យបានស៊ីជម្រៅដល់ប្រជាពលរដ្ឋគ្រប់ស្រទាប់ឲ្យយល់ដឹងអំពីទង្វើខុសច្បាប់ពីការតាំងលក់នាំចូលការចែកចាយផាវគ្រឹះគ្រប់ប្រភេទ។  ទី៥-ទទួលបានសេចក្តីណែនាំខាងលើនេះស្នើអស់លោកតាមការិយាល័យជំនាញ និង លោកអធិការក្រុង ស្រុកទាំង ៩ យកចិត្តទុកដាក់និងអនុវត្តតាមសេចក្តីណែនាំនេះឈរលើស្មារតីទទួលខុសត្រូវខ្ពស់ ដើម្បីធានាក្នុងការការពារសន្តិសុខសុវត្ថិភាព និងសណ្ដាប់ធ្នាប់ ជូនប្រជាពលរដ្ឋនៅក្នុងឱកាសបុណ្យប្រ​ពៃណី​ ចិន វៀតណាម ខាងមុខនេះ។ លោកអធិការស្រុកថ្មពួកបានអោយដឹងទៀតថា៖ ការចុះផ្សព្វផ្សាយអប់រំទៅដល់អាជីវករទាំងអស់ ដូចដែលលោកបានថ្លែងជម្រាបជូនខាងលើ បានធ្វើឡើងកាលពីព្រឹកថ្ងៃទី២០ ខែមករា ឆ្នាំ២០២០ ដែលមានទីតាំងផ្សារចំនួន០៣កន្លែង។ ទី១-ផ្សារចាស់ ទី២-ផ្សារបន្ទាយ ឃុំថ្មពួក។ និងទី៣- ផ្សារថ្មី ឃុំគំរូ ស្រុកថ្មពួក ខេត្តបន្ទាហមានជ័យ៕ ដោយៈ លោក ឡាយ សុជាតិ អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com