ខេត្តឧត្តរមានជ័យ៖ តាមប្រភពរាយការណ៍បានអោយដឹងថា៖ លោក គង់ ដារា ដែលជា មេបញ្ជាការមូលដ្ឋានកងរាជអាវុធហត្ថ ស្រុកត្រពាំងប្រាសាទ ហ៊ានដកកាំភ្លើងបាញ់១គ្រាប់ បញ្ឆាកក្បាល និងគំរាមសម្លាប់ គូភាគីម្ខាងទៀត ក្នុងវង់ផឹកស៊ី ខណៈដែលខ្លួនស្រវឹងជោគជាំនៅក្នុងហាងមួយកន្លែង ដែលមានស្លាកយីហោ (អាហារដ្ឋាន តារា) ព្រោះរឿងទាស់ពាក្យសម្ដីគ្នាបន្តិចបន្ទួចសោះ ដែលហេតុការណ៍ផ្ទុះអាវុធនេះបានកើតឡើងកាលពីវេលាម៉ោង០៨និង១៣នាទីយប់ ថ្ងៃទី០៤ ខែធ្នូ ឆ្នាំ២០២០ ម្សិលមិញនេះស្ថិតនៅភូមិ/ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។ នៅក្នុងករណីដែលលោក គង់ ដារា ហ៊ានដកកាំភ្លើងបាញ់គំរាម១គ្រាប់ ដល់ភ្ញៀវកំពុងផឹកស៊ីក្នុងហាង នាំគ្នាផ្អើលរត់ជាន់ជើងគ្នាព្រោងព្រាត ក៏មានការជះឥទ្ធិពលបង្កការភ្ញាក់ផ្អើលដល់ប្រជាពលរដ្ឋ នៅតំបន់កើតហេតុនោះទាំងយប់ផងដែរ នេះបើយោងតាមភពរាយការណ៍។ ប្រជាពលរដ្ឋដែររស់នៅស្រុកត្រពាំងប្រាសាទ សូមសំណូមពរទៅដល់ នាយឧត្តម ឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេស សូមមេត្តាចាត់វិធានការទៅលើលោក គង់ ដារា ដែលជាមេបញ្ជាការមូលដ្ឋានអាវុធហត្ថស្រុកត្រពាំងប្រាសាទ ផងទាន ព្រោះលោកអាងខ្លួនមានអំណាច មានស័ក្តិ ផឹងស៊ីស្រវឹងតិចតួច ហ៊ានដកកាំភ្លើងបាញ់គំរាមប្រជាពលរដ្ឋស្លូតត្រង់ បង្កអសន្តិសុខក្នុងមូលដ្ឋាន ល្មើសទៅនិងច្បាប់វិន័យរបស់ថ្នាក់ដឹកនាំយ៉ាងពេញបន្ទុក។ ជុំវិញរឿងរាវខាងលើ អង្គភាពយើងខ្ញុំ មិនអាចសំុការបំភ្លឺពីលោក គង់ ដារា មេបញ្ជាការមូលដ្ឋានកងរាជអាវុធហត្ថ ស្រុកត្រពាំងប្រាសាទ បាននោះទេ ដោយមិនមានលេខទូរសព្ទ័ តែទោះយ៉ាងនេះក្តីអង្គភាពយើងខ្ញុំ រងចាំការបកស្រាយបំភ្លឺពីសាមី រាល់ម៉ោងធ្វើការ ការិយាល័យនិពន្ធ តាមរយៈលេខទូរស័ព្ទTell.092190098/ 0886606773៕ ដោយ: លោក សួន ចំណាប់ ភ្នាក់ងារ គេហទំព័រ ប៉ោយប៉ែត ប៉ុស្តិ៍ www.poipetpostnews.com