រាជធានីភ្នំពេញ៖ ស្លាប់កម្មករសំណង់ម្នាក់ យ៉ាងអាណោចអធម៌ ដោយសារគ្រោះថ្នាក់ចរាចរណ៍ បង្កឡើងដោយថយន្ដបែនដឹកដី។ ប្រភពពីកន្លែងកើតហេតុបានអោយដឹងថា៖ គ្រោះថ្នាក់ចរាចរណ៍ខាងលើ បានកើតឡើងកាលពីវេលាម៉ោង១៧ និង ៤៩ នាទី រសៀលថ្ងៃទី១០ ខែកុម្ភៈ ឆ្នាំ២០២០​នេះ នៅ​ចំនុចផ្លូវលំ ស្ថិតតាមបណ្ដោយផ្លូវ៥០ម៉ែត្រ ក្នុងសង្កាត់ព្រៃស ខណ្ឌដង្កោ រាជធានី​ភ្នំពេញ។ ប្រភពបន្តថា៖ សពជនរងគ្រោះមានឈ្មោះ គៀវ ណាង ភេទ​ប្រុស អាយុ២៥ឆ្នាំ​ ជាកម្មករសំណង់ ស្នាក់នៅជិតផ្សារជម្ពូវ័ន និង មានស្រុកកំណើត នៅភូមិថ្មី ឃុំចំបក់ ស្រុកស្វាយជ្រំ ខេត្តស្វាយរៀង។ ប្រភពដដែលបានបន្តអោយដឹងទៀតថា៖ មុនពេលកើតហេតុគេបាន​ឃើញ​ រថយន្ដបែនធន់ធំដឹកដី​ គ្នានស្លាកលេខ បើកបរដោយបុរសម្នាក់ ធ្វើដំណើរតាមបណ្ដោយផ្លូវ៥០ម៉ែត្រ ក្នុងទិសដៅពីត្បូងទៅជើង សង្ស័យរថយន្តបត់ចូលការដ្ឋាន​ចាក់ដីនៅក្បែរនោះ​ ខណៈមកដល់ចំណុចកើតហេតុក៏បានបុកម៉ូតូពេញទំហឹងបណ្តាលអោយបុរសម្នាក់ដែលជាកម្មករសំណង់ កំពុងជិះម៉ូតូមួយគ្រឿងម៉ាក ហុងដា ឌ្រីម​ សេរីឆ្នាំ២០១០ ពណ៍ខ្មៅ ពាក់ស្លាកលេខ​ (ព្រៃវែង1F- 4773) ស្លាប់ភ្លាមៗនឹងកន្លែងកើតហេតុគួរអោយសង្វែក។បន្ទាប់ពីកើតហេតុ តៃកុង​ រថយន្តបែន បានចុះរត់គេចខ្លួនបាត់ស្រមោល។ ប្រភពបញ្ជាក់ថា៖ ក្រោយពេលកើតហេតុ គេឃើញមានកម្លាំងសមត្ថកិច្ចមូលដ្ឋ្ឋានចុះដល់កន្លែងកើតហេតុ ជួយសម្រួលចរាចរណ៍និង បានទំនាក់ទំនងទៅកម្លាំងសមត្ថកិច្ចជំនាញចុះមក​វាស់វែង យករថយន្ដ និង ម៉ូតូទៅរក្សាទុកនៅការិយាល័យចរាចរណ៍រាជធានីភ្នំពេញ រង់ចាំដោះស្រាយនៅពេលក្រោយ។ ចំណែកសពជនរងគ្រោះ សមត្ថកិច្ចប្រគល់ជូនអោយទៅសាច់ញាតិ យកទៅធ្វើបុណ្យតាមប្រពៃណី៕ ដោយៈ លោក ឡាយ សុជាតិ អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com