ខេត្តកំពង់ចាម៖ ប្រភពច្បាស់ការបានអោយដឹងថា៖ មានទីតាំងល្បែងស៊ីសងខុសច្បាប់ដុះស្លែរមួយកន្លែង ស្ថិតនៅក្នុងភូមិត្រពាំងឫស្សី ឃុំសំរោង ស្រុកជើងព្រៃ ខេត្តកំពង់ចាម កំពុងតែបើកដំណើរការឡើងវិញសារជាថ្មី លេងយ៉ាងអនាធិបតេយ្យ ខណៈពេលដែលលោក ប្រាក់ សុគន្ធ អធិការស្រុកជើងព្រៃធ្វើមិនដឹង មិនលឺ។ បើយោងតាមប្រភពព័ត៌មានបាននិយាយតៗគ្នាថា៖ សង្ស័យថា អធិការរង គីម ពៅហុង នឹងឈ្មោះ គ្រី ជាមន្ត្រីប៉ូលីសសេដ្ឋកិច្ចខេត្តកំពង់ចាម ជាអ្នកមានភាគហ៊ុនជាមួយទើបធ្វើអោយលោកអធិការមិនហ៊ានបង្ក្រាប ហើយក៏បណ្តោយអោយមានការបើកបនល្បែងស៊ីសងខុសច្បាប់ នៅក្នុងមូលដ្ឋាននៃទឹកដីស្រុកជើងព្រៃនេះ ក៏ដោយសារតែមានភាគហ៊ុនជាមួយនឹងម្ចាស់បនល្បែងដ៏មានបារមីនេះផងដែរ។ យោងតាមសេចក្តីរាយការណ៍បានបញ្ជាក់ថា៖ ទីតាំងជល់មាន់ស្ថិតនៅក្នុងភូមិឃុំខាងលើនេះ បានបើកលេងយ៉ាងចំហរ មិនរំខានដល់សមត្ថកិច្ច និង លោកអភិបាលស្រុក លោកអធិការរដ្ឋានគរបាលស្រុក ដែលជាហេតុធ្វើអោយមហាជន រិះគន់យ៉ាងចំៗថា៖ ថ្នាក់ដឹកនាំគ្រាប់ល្ពៅទាំងនេះ ជាប់ត្រគៀក មិនអាចចេញមុខមកបង្រ្កាបបនល្បែងស៊ីសង ដែលកំពុងតែលេងយ៉ាងសប្បាយនៅក្នុងដែនសមត្ថកិច្ចរបស់ខ្លួនឡើយ។ ប្រភពបន្តថា៖ ជាក់ស្តែងបនល្បែងស៊ីសង ដែលមានទាំង អាប៉ោង បៀរ និង ជល់មាន់ នៅភូមិត្រពាំងឫស្សី ឃុុំសំរោង ស្រុកជើងព្រៃខេត្តកំពង់ចាមនេះ កាលពីថ្មីៗកន្លងទៅនេះឃើញថា៖ នៅតែមានការរិះគន់ច្រើនទៅៗព្រោះថា គេមិនដែលឃើញមានការបង្ក្រាបសោះ ហើយបើកលេងជារៀងរាល់ថ្ងៃតែម្តង ទើបធ្វើអោយលោក ហេង (ហៅព្រៃ) ដែលជាម្ចាស់សង្វៀនមាន់រូបនេះ បានដៃដោយមិនខ្លាចសមត្ថកិច្ចមូលដ្ឋានសូម្បីតែបន្តិច ហើយមិនមែនមានតែ ជល់មាន់ទេ មានទាំង បៀ អាប៉ោង លេងភ្នាល់ដាក់ប្រាក់រាប់លានរៀលទៀតផង។ ប្រភពដដែលបានបញ្ជាក់ថា៖ សូម្បីតែសមត្ថកិច្ចតូចតាច ក៏មិនហ៊ានបង្រ្កាបដែរ ចំនុចនេះហើយ ទើបធ្វើអោយមហាជនដាក់ការសង្ស័យថា៖ លោក គីម ពៅហុង និងឈ្មោះ គ្រី មានភាគហ៊ុន ហើយនិងអធិការស្រុកបានសើមមាត់សើមករ និងបនល្បែងស៊ីសងនេះមិនខានឡើយ។ ប្រជាពលរដ្ឋមានការងឿយឆ្ងល់ថា៖ សកម្មភាព និង ទង្វើអសមត្ថភាពរបស់លោកអធិការស្រុក និង លោកអភិបាលស្រុក បានកំពុងតែអនុវត្តផ្ទុយពីបទបញ្ជារបស់ប្រមុខរាជរដ្ឋាភិបាល ដែលមានសម្តេចនាយករដ្ឋមន្រ្តី ហ៊ុន សែន អោយអាជ្ញាធរ សមត្ថកិច្ចទាំង៣ប្រភេទ និងប្រជាពលរដ្ឋ រួមទាំងបង្កើតក្រុមស្ម័គ្រចិត្តប្រជាការពារ ភូមិ,ឃុំ នៅក្នុងមូលដ្ឋាន ក្នុងការអនុវត្តគោលនយោបាយភូមិឃុំមានសុវត្តិភាពទាំង៩ចំណុច តែលោកទាំង២ មិនបានគិតចំនុចទាំងនេះ នៅតែ បណ្តែតបណ្តោយអោយមានការ បើកបនល្បែងស៊ីសងដោយខុសច្បាប់ទៅវិញ។ ប្រភពព័ត៌មាន បានបញ្ជាក់ប្រាប់យ៉ាងច្បាស់ថា៖ ម្ចាស់បនល្បែងស៊ីសង បានប្រកាសជាផ្លូវការ ដល់ក្រុមអ្នកញៀនល្បែងថា កុំទៅភ័យ កុំទៅខ្លាច សូមលេងម៉ាសេរី ព្រោះគេមានកញ្ចប់បង់ជាខែជូនថ្នាក់លើរួចហើយ ក្នុងមួយខែៗរាប់ពាន់ដុល្លា ទើបបានធ្វើអោយ ក្រុមអ្នកញៀនល្បែងសប្បាយស្រែកហូរកញ្រៀវ មិនសំចៃមាត់ ក្នុងនោះម្ចាស់សង្វៀនមាន់ជល់ មានឈ្មោះ ហេង (ហៅព្រៃ) និងគូរកនផ្សេងទៀត និងបានបញ្ជាក់ថា ការដែលពួកគេលេងល្បែង ស៊ីសងខុសច្បាប់នេះ ដោយសារអ្នកមានលុយនៅចាំអន្តរាគមន៍ពីក្រោយខ្នង ។ ប្រជាពលរដ្ឋបានសម្តែងនូវការព្រួយបារម្ភណ៍ ប្រាប់សារព័ត៌មានយើងថា ខណៈពេលនេះដែលបនល្បែងស៊ីសង បានកើតឡើងនៅទឹកដីភូមិឃុំខាងលើនេះ ជាហេតុបណ្តាលអោយមានជម្លោះ និងប្រើអំពើហឹង្សាក្នុងគ្រួសារ និងជាដើមកំណើតនូវពពួកចោរលួច ចោរប្លន់ កាប់សម្លាប់គ្នា និងបាត់បង់ដីធ្លី ព្រាត់ប្រាស់ប្រពន្ឋកូន ដោយសារតែល្បែងស៊ីសង និងសូមសំណូមពរ អោយលោក ឯម កុសល ដែលជាស្នងការខេត្តកំពង់ចាម និង ជាពិសេស ឯកឧត្តម លោក អ៊ុន ចិន្តា អភិបាលខេត្តកំពង់ចាម មេត្តាជួយលុបបំបាត់ល្បែងស៊ីសងទាំងនេះផងទាន៕ ដោយៈ លោក ព្រីង សំឡត អ្នកយកព័ត៌មាន សារព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com