ធ្ងន់ធ្ងរហើយអ៊ីតាលី.! អ្នកឆ្លងកូវីដ-19 កើនឡើងដល់ជិត ២៨០០០នាក់ គ្រាន់តែម្សិលមិញស្លាប់ ៣៤៩ នាក់.!!!
អ៊ីតាលី៖ ផ្អែកលើការចុះផ្សាយរបស់ Chanel News Asia បានរាយការណ៍កាលពីថ្ងៃចន្ទថា៖ មានអ្នកស្លាប់ថ្មីចំនួន ៣៤៩ នាក់ដោយសារវីរុសកូវីដ១៩ ធ្វើឲ្យចំនួនអ្នកស្លាប់សរុបក្នុងប្រទេសនេះឡើងដល់ ២១៦៨នាក់ ដែលជាតួលេខខ្ពស់បំផុតបន្ទាប់ពីប្រទេសចិន។
ហើយតាមការចុះផ្សាយរបស់ Chanel News Asia បន្តអោយដឹងទៀតថា៖ តួលេខផ្លូវការនៃអ្នកស្លាប់ដោយសារ COVID-19 បានកើនឡើងទ្វេដងចាប់តាំងពីថ្ងៃព្រហស្បតិ៍
សប្ដាហ៍មុន ដែលមានចំនួនអ្នកស្លាប់នៅប្រទេសអ៊ីតាលីឡើងដល់ ១០០០ នាក់ជាលើកដំបូង។ ប្រទេសអ៊ីតាលី ឥឡូវនេះមានករណីឆ្លងចំនួន ២៧៩៨០ នាក់ ខណៈដែលកាលពី៤ថ្ងៃមុនមានត្រឹម ១៥១១៣ នាក់។
ត្រឹមរយៈពេលពីរថ្ងៃចុងក្រោយ មានមនុស្សជាង ៧០០ នាក់បានស្លាប់។
ក្នុងចំណោមតំបន់ដែលរងគ្រោះខ្លាំង អ្នកស្លាប់ភាគច្រើននៅតែត្រូវបានរកឃើញនៅតំបន់ភាគខាងជើងប្រទេស ដែលវីរុសនេះបានចាប់ផ្តើមរីករាលដាលនៅជុំវិញទីក្រុងជាច្រើនដូចជាទីក្រុង Milan តំបន់ Lombardy បានរាយការណ៍ថា មានមនុស្សស្លាប់ ១៤២០ នាក់ ពោលគឺ ៦៦ ភាគរយនៃចំនួនស្លាប់សរុបរបស់អ៊ីតាលី។
ទោះយ៉ាងណាតំបន់ Piedmont ដែលនៅជិតគ្នានិងជាកន្លែងឧស្សាហកម្មរថយន្តអ៊ីតាលី បានរកឃើញចំនួនអ្នកស្លាប់ និងឆ្លងជំងឺកើនឡើងស្ទើរទ្វេដងក្នុងរយៈពេលពីរថ្ងៃចុងក្រោយ។
តំបន់ Piedmont បានរាយការណ៍ថា មានអ្នកស្លាប់ចំនួន ១១១ នាក់ និងឆ្លងជំងឺចំនួន ១៥១៦ នាក់កាលពីថ្ងៃច័ន្ទ ខណៈកាលពីថ្ងៃសៅរ៍ តំបន់នេះមានអ្នកស្លាប់ចំនួន ៥៩ នាក់ និងឆ្លងចំនួន ៨៧៣ នាក់ ។
តំបន់ Lazio ដែលស្ថិតនៅជុំវិញទីក្រុងរ៉ូមមានអ្នកស្លាប់ ១៩ នាក់ និងឆ្លងជំងឺ ៥២៣ នាក់ ៕
ប្រែសម្រួលដោយ៖ លោក ភូ សោភ័ណ
គេហទំព័រ ប៉ោយប៉ែតប៉ុស្តិ៍
www.poipetpostnews.com
