រាជធានីភ្នំពេញ៖ កាលពីព្រឹកថ្ងៃទី២៤ ខែមីនា ឆ្នាំ២០២០ កម្មករ-កម្មការិនីបម្រើការងារនៅរោងចក្រកាត់ដេរ (ឃែនធើរេន) ដែលមានទីតាំងស្ថិតនៅតាមបណ្ដោយផ្លូវចោមចៅ "អតីតផ្លូវវេងស្រេង" បាននាំគ្នាធ្វើកូដកម្ម មិនព្រមធ្វើការ ដោយសារតែក្រុមហ៊ុនមានចេតនាពន្យារពេល និងបើកប្រាក់ខែមិនគ្រប់ជូនបងប្អូនកម្មករ។ ប្រភពពីកម្មការិនីដែលបម្រើការងារនៅរោងចក្រខាងលើ បានអោយដឹងថា៖ នារយៈពេល៤ខែចុងក្រោយនេះ ខាងក្រុមហ៊ុនតែងតែមានភាពយឺតយ៉ាវក្នុងការបើកប្រាក់ខែឈ្នួលជូនបងប្អូនកម្មករ-កម្មការិនី។ រហូតមកដល់ថ្ងៃទី២៤ ខែមីនានេះ ខាងក្រុមហ៊ុននៅតែមិនទាន់បើកប្រាក់ខែឈ្នួលលើកទី២ (៥០%) ជូនកម្មករនៅឡើយទេ ថែមទាំងជូនដំណឹងថា ការបើកជូនលើកទី២នេះ គឺបានតែពាក់កណ្ដាលប៉ុណ្ណោះ.! ដោយសន្យាថានៅសល់ពាក់កណ្ដាលទៀត នឹងបើកជូនបង្គ្រប់នៅដើមខែមេសា។ ដោយសារតែការបើកប្រាក់ឈ្នួលយឺតយ៉ាវដដែលៗ និងការបើកមិនគ្រប់បែបនេះហើយ ជាហេតុនាំអោយកម្មករផ្ទុះការតវ៉ាមិនព្រមធ្វើការ ដោយទាមទារអោយមានការបើកប្រាក់ឈ្នួលអោយបានគ្រប់ និងទៀងទាត់ដូចកាលពីពេលកន្លងមក។ ការធ្វើកូដកម្មកាលពីម្សិលមិញនេះ ក៏មានការអន្តរាគមន៍ពីខាងក្រសួងការងារចូលមកដោះស្រាយដែរ។ ប៉ុន្តែយ៉ាងណាក៏ដោយ ការចូលរួមដោះស្រាយពីខាងក្រសួងការងារនោះ ពុំទទួលបានលទ្ធផលនោះទេ ដោយភាគីក្រុមហ៊ុននៅតែរក្សាជំហរដដែល គឺបើកជូនបានតែពាក់កណ្ដាលនៃប្រាក់ឈ្នួលលើកទី២ ហើយចាំបង្គ្រប់នៅដើមខែមេសា។ សូមជម្រាបជូនថា៖ រោងចក្រកាត់ដេរសម្លៀកបំពាក់ (ឃែនធើរេន) មានទីតាំងស្ថិតនៅតាមបណ្ដោយផ្លូវចោមចៅ"អតីតផ្លូវវេងស្រេង" ស្ថិតក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ដែលមានកម្មករ-កម្មការិនីសរុបចំនួន ៩៩៥ នាក់៕ ដោយៈលោក ព្រីង សំឡត អ្នកយកព័ត៌មាន សារព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com
ព័ត៌មានគួរចាប់អារម្មណ៍
សហព័ន្ធស្វីស បន្តគាំទ្រកំណែទម្រង់វិមជ្ឈការនៅកម្ពុជា និងគម្រោងបណ្ដុះបណ្ដាលពង្រឹងសមត្ថភាពមន្ត្រីក្រសួងមហាផ្ទៃ (គេហទំព័រ ប៉ោយប៉ែត ប៉ុស្តិ៍)
ព្រឹត្តិការណ៍សម្តែងក្បាច់គុនល្បុក្កតោ-ក្បាច់គុនសៅលីញ រួមគ្នា នៅមុខប្រាសាទបាយ័ន២៤មេសា.! (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា បន្តដឹកនាំគណៈប្រតិភូ ស្ដាប់បទបង្ហាញពាក់ព័ន្ធវិស័យសុវត្ថិភាពនិងសណ្ដាប់ធ្នាប់សាធារណៈ (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា និងប្រតិភូ អញ្ជើញស្តាប់បទបង្ហាញពាក់ព័ន្ធនឹងហិរញ្ញវត្ថុសាធារណៈ និងយន្តការជាក់ស្តែងនៃលទ្ធិប្រជាធិបតេយ្យដោយផ្ទាល់ (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា និងលោកជំទាវ ដឹកនាំគណៈប្រតិភូជាន់ខ្ពស់ បំពេញទស្សនកិច្ចនៅប្រទេសស្វីស និងប្រទេសអាល្លឺម៉ង់ (គេហទំព័រ ប៉ោយប៉ែត ប៉ុស្តិ៍)
វីដែអូ
ចំនួនអ្នកទស្សនា