ខេត្តបន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្ដបន្ទាយមានជ័យ បានបញ្ជាក់អោយបណ្ដាញសារព័ត៌មានក្នុងស្រុក នៅព្រឹកថ្ងៃទី២៩ ខែមីនា ឆ្នាំ២០២០នេះថា៖ គឹតត្រឹមថ្ងៃនេះ គឺមនុស្ស២៣នាក់ នៅក្នុងខេត្តបន្ទាយមានជ័យ ត្រូវបានយកទៅទុកដាច់ដោយឡែក ដើម្បីតាមដានសុខភាពរបស់ពួកគេ ក្នុងរយៈពេល១៤ថ្ងៃ ពាក់ព័ន្ធនឹងជំងឺឆ្លងកូវីដ-១៩ (Covid-19)។ ឯកឧត្តម អ៊ុំ រាត្រី បានបញ្ជាក់ថា៖ ក្នុងចំណោម២៣នាក់ នៅខេត្តបន្ទាយមានជ័យ ក៏មានមនុស្សមួយចំនួន ដែលពាក់ព័ន្ធ និងប៉ះពាល់ជាមួយស្ដ្រីវ័យអាយុ៣៦ឆ្នាំ ដែលរកឃើញវិជ្ជមាន Covid-19 ដែលក្រសួងសុខាភិបាល បានចេញសេចក្ដីប្រកាសព័ត៌មាន នៅព្រឹកមិញនេះ។ ពាក់ព័ន្ធទៅនឹងស្ដ្រីវ័យ៣៦ឆ្នាំរូបនេះ ត្រូវបានឯកឧត្តមអភិបាលខេត្តបញ្ជាក់ថា៖ ធ្លាប់មានទំនាក់ទំនងជាមួយជនជាតិថៃ ដែលធ្លាប់ចូលមក កំសាន្ត នៅក្លឹប Star TV ហើយត្រឡប់ទៅប្រទេសថៃវិញ ត្រូវបានរកឃើញវិជ្ជមាន Covid-19។ ប៉ុន្ដែទោះជាយ៉ាងណានោះ ស្ដ្រីរូបនេះ បានស្ម័គ្រចិត្ដមកធ្វើតេស្ដលើកទី១ម្តងហើយ កាលពីពេលកន្លងទៅថ្មីៗ ក៏ប៉ុន្ដែ អវិជ្ជមាន Covid-19។ រហូតដល់ថ្ងៃនាងដឹងថាខ្លួនមិនស្រួល ក៏មកសុំធ្វើតេស្ដម្ដងទៀត ក៏រកឃើញវិជ្ជមាន Covid-19 តែម្ដង។ ជាមួយគ្នានេះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ក៏បានបញ្ជាក់បន្ថែមផងដែរថា៖ ក្នុងចំណោមពលករមកពីប្រទេសថៃ ក្នុងខេត្ដបន្ទាយមានជ័យ គឺក្រុមគ្រូពេទ្យ និងអាជ្ញាធរ បានជួបផ្ទាល់ និងពិនិត្យសុខភាព បានជាង៧០ភាគរយហើយ។ បច្ចុប្បន្ន៖ ឯកឧត្តម កំពុងតែបង្កើនប្រតិបត្ដិការយុទ្ធនាការនេះ អោយអាជ្ញាធរ និងក្រុមគ្រូពេទ្យ ចុះទៅជួបផ្ទាល់ជាមួយពលករ ដែលនៅសេសសល់ ដើម្បីតាមដាន សុខភាពរបស់ពួកគាត់ ពាក់ព័ន្ធនឹងជំងឺកូវីដ-១៩ (Covin-19)។ សូមបញ្ជាក់ថា៖ គិតត្រឹមព្រឹកថ្ងៃទី២៩ ខែមីនា ឆ្នាំ២០២០នេះ មានអ្នកជំងឺកូវីដ១៩ ចំនួន៨២នាក់ កំពុងព្យាបាលនៅក្នុងប្រទេសកម្ពុជា ក្នុងនោះមានស្រ្តី២៦នាក់ និងបុរស៥៦នាក់ នៅតាមបណ្តាមន្ទីរពេទ្យរដ្ឋរាជធានីខេត្ត ក្នុងចំណោមអ្នកឆ្លងសរុបចំនួន១០៣នាក់ ហើយអ្នកជាសះស្បើយ បានកើនឡើងរហូតដល់២១នាក់។ ហើយសម្រាប់អ្នកដែលរកឃើញឆ្លងជំងឺកូវីដ១៩ថ្មី ជាស្ត្រីអាយុ៣៦ឆ្នាំ បម្រើការនៅស្តាធីវី (Star TV) រស់នៅភូមិប៉ាលិលេយ្យ សង្កាត់ប៉ោយប៉ែត ក្រុងប៉ោយប៉ែត ស្ត្រីរូបនេះ ត្រូវបានដាក់អោយសម្រាកព្យាបាល នៅមន្ទីរពេទ្យបង្អែកខេត្តបន្ទាយមានជ័យ៕ ដោយៈ លោក ហ៊ីម ឯក ទីព្រឹក្សា គេហទំព័រ ប៉ោយប៉ែតប៉ុស្តិ៍ www.poipetpostnews.com