ខេត្តបន្ទាយមានជ័យ៖ ដោយមានការចង្អុលបង្ហាញពីលោក ឧត្ដមសេនីយ៍ទោ អាត់ ខែម ស្នងការនគរបាលខេត្ដបន្ទាយមានជ័យលោកឧត្ដមសេនីយ៍ត្រី សិទ្ធិ ឡោះ ស្នងការរងទទួលផែនការងារព្រហ្មទណ្ឌខេត្ត បានដឹកនាំកំលាំងដោយផ្ទាល់ ដោយមានវត្ថមានការចូលរួមពីលោកវរសេនីយ៍ឯក សៅ សារឿន អធិការស្រុកថ្មពួក លោកវរសេនីយ៍ឯក ជា ឆ្លូញ អធិការស្រុកស្វាយចេក លោកវរសេនីយ៍ឯក មាស ឬទ្ធី អធិការស្រុក ព្រះនេត្រព្រះ លោកវរសេនីយ៍ឯក យ៉ត សុផល អធិការស្រុកភ្នំស្រុក លោកវរសេនីយ៍ទោ ភឿង ម៉ាន់សឹង្ហ នាយការិយាល័យព្រហ្មទណ្ឌកំរឹតធ្ងន់ ចុះប្រតិបត្តិការស្រាវជ្រាវក្នុងរឿងករណីហិង្សាដោយចេតនាមានស្ថានទម្ងន់ទោស បណ្តាលអោយជនរងគ្រោះម្នាក់ស្លាប់បាត់បង់ជីវិត។ លោកឧត្ដមសេនីយ៍ត្រី សិទ្ធិ ឡោះ ស្នងការរងទទួលផែនការងារព្រហ្មទណ្ឌខេត្តបន្ទាយមានជ័យ បានអោយសារព័ត៌មាន (គេហទំព័រ ប៉ោយប៉ែតប៉ុស្តិ៍) ដឹងថា៖ កាលពីនៅថ្ងៃទី២១ ខែឧសភា ឆ្នាំ២០២០ វេលា ម៉ោង២២និង៣០នាទី ស្ថិតភូមិគោកខ្ពស់ ឃុំគោកកឋិន ស្រុកថ្មពួក ខេត្តបន្ទាយមានជ័យ មានករណីប្រើហិង្សាមួយបានបង្ករឡើងដោយឈ្មោះ ថន ធួន ភេទប្រុស អាយុ៣៥ឆ្នាំ ត្រូវជាកូនបង្កើត បានឈ្លោះប្រកែកពាក្យសម្តី ជាមួយឪពុកបង្កើតខ្លួនឈ្មោះ នូវ ថន អាយុ៥៨ឆ្នាំ ដោយខឹងរឿងចុចទូរស័ព្ទមកឪពុកមិនលើក បន្ទាប់មកឈ្មោះ កន ប៊ូ អាយុ៥៦ឆ្នាំ ជាម្តាយបានហាមឃាត់កុំអោយឈ្លោះប្រកែកគ្នា ពេលនោះស្រាប់តែឈ្មោះ ថន ធួន ជាកូនបង្កើតបានខឹងទប់កំហឹងពុំបាន រហូតឈានដល់ប្រើអំពើហឹង្សា ដោយយកអង្រេរឈើប្រវែងប្រមាណ១-៣០ម៉ែត្រ វាយទៅលើឪពុកឈ្មោះ នូវ ថន បណ្តាលអោយដួលផ្កាប់មុខនឹងដី រួចហើយក៏បញ្ចូនទៅព្យាបាលនៅមន្ទីពេទ្យ ទើបដាច់ខ្យល់ស្លាប់តាមផ្លូវតែម្តង រីឯជនសង្ស័យក្រោយធ្វើសកម្មភាពរួចហើយបានរត់គេចខ្លួនបាត់ទាំងយប់.!។ លោកស្នងការរងបានបន្តអោយដឹងយ៉ាងច្បាស់ថា៖ លុះដល់វេលាម៉ោង១៣និង៤០នាទី ទើបកម្លាំងលោកនៃស្នងការរដ្ឋាននគរបាលខេត្តបន្ទាយមានជ័យ ធ្វើការឃាត់ខ្លួនជនសង្ស័យឈ្មោះ ថន ធួន បាន នៅចំណុចភូមិតាបៅ ឃុំបុស្បូវ ស្រុកព្រះនេត្រព្រះ​ ខេត្តបន្ទាយមានជ័យ។ បច្ចុប្បន្នៈ ជនសង្ស័យឈ្មោះ ថន ធួន ត្រូវបានកំលាំងស្នងការនគរបាលខេត្តបន្ទាយមានជ័យ រៀបចំសំណុំរឿងចាត់ការបន្តទៅតាមនីតិវិធី៕ ដោយៈ លោក វ័ន ប៊ុនរើន អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com