ខេត្តបន្ទាយមានជ័យ៖ កាលពីរសៀលថ្ងៃទី២២ ខែឧសភា ឆ្នាំ២០២០ ឯកឧត្តមឧត្តមសេនីយ៍ឯក ហ៊ុន សំណាង ប្រធាននាយកដ្ឋានចារកម្ម នៃអគ្គស្នងការនគរបាលជាតិ បានដឹកនាំមន្ត្រីក្រោមឱវាទ ចុះសួរសុខទុក្ខគ្រួសារលោកវរសេនីយ៍ត្រី អេម ពៅ ដែលរងគ្រោះដោយភ្លើងឆេះផ្ទះកាលពីកន្លងទៅថ្មីៗនោះ ។ ឆ្លៀតក្នុងឪកាសការចុះសួរសុខទុក្ខគ្រួសារលោកវរសេនីយ៍ត្រី អេម ពៅ ឯកឧត្តម ឧត្តមសេនីយ៍ឯក ហ៊ុន សំណាង បានមានប្រសាសន៍ និងចូលរួមសោកស្តាយ រឿងអគ្គីភ័យដែលកើតឡើងដោយយថាហេតុ ឆេះផ្ទះ របស់លោកវរសេនីយ៍ត្រី អេម ពៅ ព្រមទាំងទ្រព្យសម្បត្តិអស់ ឯកឧត្តម ឧត្តមសេនីយ៍ឯក បានលើកទឹកចិត្ត និងផ្តាំផ្ញើធ្វើយ៉ាងណាខិតខំប្រឹងប្រែងបន្តទៅមុខទៀត ។ ជាមួយគ្នានោះដែរៈ ឯកឧត្តម ឧត្តមសេនីយ៍ឯក បាននាំយកអំណោយនិងថវិកា ប្រគល់ជូនក្រុមគ្រួសាររបស់លោក អេម ពៅ គឺជាការចូលរួមរបស់ថ្នាក់ដឹកនាំ និងបងប្អូនរួមការងារនៃនាយកដ្ឋាននគរបាលជាតិ អំណោយទាំងអស់រួមមានដូចខាងក្រោម៖ ទី១-អង្ករ ១០០ គីឡូក្រាម។ទី២-ទឹកសុទ្ធ៤កេះ។ ទី៣-ទឹកត្រី១យួរ។ ទី៤- ទឹកស៊ីអ៊ីវ២យួរ ទី៥-ត្រីខ២យួរ ទី៦-មី២កេះ ទី៧-ថវិកា ៦,៣១០,០០០រៀល (ប្រាំមួយលានសាមសិបមួយម៉ឺនរៀល) ឯកឧត្តម ឧត្តមសេនីយ៍ឯក ហ៊ុន សំណាង បានប្រគល់ជូនលោកវរសេនីយ៍ត្រី អេម ពៅ ប្រធានស្នាក់ការខេត្តបាត់ដំបងផ្ទាល់។ ដោយមានការយកចិត្តទុកដាក់ពីថ្នាក់ដឹកនាំលោកវរសេនីយ៍ត្រី អេម ពៅ ប្រធានស្នាក់ការខេត្តបាត់ដំបង បានថ្លែងអំណរគុណ យ៉ាងជ្រាលជ្រៅចំពោះឯកឧត្តម ឧត្តមសេនីយ៍ឯក ហ៊ុន សំណាង និងលោក លោកស្រី អនុប្រធាននាយកដ្ឋាន ព្រមទាំងអស់លោកលោកស្រី រួមការងារទាំងអស់ ជាពិសេសឯកឧត្តមប្រធាន ដែលបានចំណាយពេលដ៍វែងឆ្ងាយពីរាជធានីភ្នំពេញមកចុះសួរសុខទុកដល់លំនៅដ្ឋានដែលរងគ្រោះដោយភ្លើងឆេះ។ ខ្ញុំបាទ វរសេនីយ៍ត្រី អេម ពៅ ព្រមទាំងក្រុមគ្រួសារ សូមគោរពជូនពរ ដល់ឯកឧត្តមឧត្តមសេនីយ៍ឯក ហ៊ុន សំណាង ព្រមទាំងអស់លោកលោកស្រី រួមការងារទាំងអស់ សូមបានប្រកប ពុទ្ធពរទាំងបួនប្រការគឺ អាយុ វណ្ណៈសុខៈ ពលៈ កុំបីឃ្លៀងឃ្លាតឡើយ៕ ដោយៈ លោក ជួង វណ្ណ្ណអាង ចាងហ្វាងការផ្សាយ គេហទំព័រ ប៉ោយប៉ែតប៉ុស្តិ៍