ខេត្តបាត់ដំបង៖ ការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបង ចុះប្រតិបត្តិការបង្ក្រាបករណី រំលោភលើទំនុកចិត្ត( យកម៉ូតូ ) ដោយអនុវត្តន៍តាមការណែនាំបញ្ជាផ្ទាល់ពី ឯកឧត្ដម ឧត្ដមសេនីយ៍ទោ អ៊ុច សុខុន ស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោកឧត្ដមសេនីយ៍ត្រី ជេត វណ្ណនី ស្នងការរង ផែនការងារនគរបាលព្រហ្មទណ្ឌ និង មានការសម្របសម្រួលពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបង កាលពីថ្ងៃទី០១ ខែឧសភា ឆ្នាំ២០២០ វេលាម៉ោង០៧និង០០នាទី នៅចំណុចភូមិរំចេក៣ សង្កាត់រតនៈ ក្រុងបាត់ដំបង ខេត្តបាត់ដំបង។ លោកវរសេនីយ៍ទោ ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងការិយាល័យជំនាញ សហការជាមួយក្រុមអន្តរាគមន៍ បង្ការ បង្ក្រាប ចុះបង្ក្រាបករណី រំលោភលើទំនុកចិត្ត(យកម៉ូតូ)មួយករណី និងធ្វើការឃាត់ខ្លួនជនសង្ស័យ០១នាក់ដូចខាងក្រោម៖ ជនសង្ស័យមានឈ្មោះ ទេម សំណាង ភេទ ប្រុស អាយុ១៧ឆ្នាំ មានទីលំនៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ សមត្ថកិច្ចផ្នែកព្រហ្មទណ្ឌបានអោយដឹងថា៖ កាលពីថ្ងៃទី១០ ខែមេសា ឆ្នាំ២០២០ នៅ វេលាម៉ោងប្រហែល១៧និង៤០នាទី ជនរងគ្រោះ ឈ្មោះ ឡោះ សូនី ភេទប្រុស អាយុ៣៣ឆ្នាំ មានទីលំនៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង បានដាក់ពាក្យបណ្ដឹងនៅប៉ុស្តិ៍នគរបាល។ មូលហេតុៈ "ដោយជនរងគ្រោះបានអោយជនសង្ស័យខាងលើ ខ្ចីម៉ូតូ០១គ្រឿង ម៉ាកហុងដាឌ្រីម សេ125 ពណ៌ខ្មៅ ស៊េរីឆ្នាំ 2016 ពាក់ស្លាកលេខបាត់ដំបង 1U 5423 អោយទៅជនសង្ស័យខ្ចីជិះដើម្បីទៅទិញបាយហូប ស្រាប់តែជនសង្ស័យយកម៉ូតូជិះគេចខ្លួនបាត់មិនឃើញត្រឡប់មកវិញ"។ បច្ចុប្បន្នៈ ការិយាល័យជំនាញកំពុងតែធ្វើការកសាងសំណុំរឿងដើម្បីបញ្ជូនជនសង្ស័យទៅសាលាដំបូងខេត្តបាត់ដំបងចាត់ការបន្តតាមនីតិវិធី៕ ដោយៈ លោក សុខ បូរី និពន្ធនាយករង គេហទំព័រ ប៉ោយប៉ែតប៉ុស្តិ៍ www.poipetpostnews.com