ខេត្តបន្ទាយមានជ័យ៖ កាលពីព្រឹកថ្ងៃទី៣០ ខែកក្កដា ឆ្នាំ២០២០ ពិធីសម្ពោធដាក់អោយដំណើរការអគារការិយាល័យច្រកចេញចូលតែមួយ នៅស្រុកថ្មពួក ខេត្តបន្ទាយមានជ័យ ក្រោមអធិបតីភាព ដ៏ខ្ពង់ខ្ពស់ លោកជំទាវ​ឧកញ៉ាហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែ​ គឹមយ៉ាន​​ និងមានការអញ្ជើញចូលរួមពីសំណាកអាជ្ញាធរមន្ត្រីរាជការសមត្ថកិច្ចប្រដាប់អាវុធទាំង៣ អញ្ជើញចូលរួមខេត្ត,ស្រុក យ៉ាងច្រើនកុះករផងដែរ។ ជាកិច្ចចាប់ផ្តើម៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានឡើងថ្លែងក្នុងអង្គពិធីថា៖ សូមរម្លឹកដល់មន្ត្រីការិយាល័យច្រកចេញចូលតែមួយក្នុងថ្ងៃនេះ គឺដើម្បីធ្វើអោយប្រសើរឡើងនូវអគារការិយាល័យ សម្រាប់ធ្វើការទំនាក់ទំនងជាមួយប្រជាពលរដ្ឋនៅមូលដ្ឋានស្របទៅនឹងភាពរីកចម្រើននៃប្រទេសជាតិនាពេលបច្ចុប្បន្ននេះ។ ឆ្លៀតក្នុងឱកាសនោះផងដែរ ឯកឧត្តម អ៊ុំ រាត្រី បានគូសបញ្ជាក់ថា៖ រាជរដ្ឋាភិបាលកម្ពុជា បានបង្កើតនូវអង្គភាពច្រកចេញចូលតែមួយនេះឡើង គឺដើម្បីជំរុញការលើកកម្ពស់ការផ្តល់សេវា ការអភិវឌ្ឍសេដ្ឋកិច្ច​សង្គម នៅមូលដ្ឋាន គឺសំដៅឆ្លើយតបទៅនឹងសេចក្តីតម្រូវការចាំបាច់ការលើកកម្ពស់ជីវភាពរស់នៅ​ និងកាត់បន្ថយភាពក្រីក្ររបស់ប្រជាពលរដ្ឋ។ ឯកឧត្តមបន្តទៀតថា៖ ការបង្កើតការិយាល័យច្រកចេញចូលតែមួយ មានគោលបំណងលើកកម្ពស់គុណភាព​ ប្រសិទ្ធភាព​ ប្រសិទ្ធផល​ តម្លាភាព​ និងគណនេយ្យភាព​ ក្នុងការ ផ្តល់សេវានៅរដ្ឋបាលថ្នាក់ក្រោមជាតិ តាមរយៈការប្រមូលផ្តុំការផ្តល់សេវារដ្ឋបាលលើ​វិស័យនានានៅកន្លែងតែមួយតាមនីតិវិធីសាមញ្ញ ដើម្បីបង្កលក្ខណៈងាយស្រួល និងឆ្លើយតបបានរហ័សទាន់ពេលវេលាទៅនឹងតម្រូវការចាំបាច់របស់ពុកម៉ែបងប្អូនប្រជាពលរដ្ឋ ដែលពួកគាត់កំពុងត្រូវ​ការ។ ​​អភិបាលខេត្តបន្ទាយមានជ័យ បានគូសបញ្ជាក់ទៀតថា តាមរយៈនៃច្រកចេញចូលតែ​មួយនេះហើយដែលបានជំរុញឱ្យល្បឿនការងារទាំងឡាយ ដែលយើងបានអនុវត្តន៍កន្លងមក​រហូតដល់បច្ចុប្បន្នគឺទទួលបានការសាទរគាំទ្រពីប្រជាពលរដ្ឋទូទៅហើយរាជរដ្ឋាភិបាលក៏បាននិងកំពុងជំរុញបន្តបង្កើតនូវច្រកចេញចូលតែមួយនេះនៅតាមបណ្តាស្រុកផ្សេងៗទៀត ដែល​មិនទាន់មានដើម្បីបម្រើសេវាជូនប្រជាពលរដ្ឋអោយបានលឿន។ ជាកិច្ចបញ្ចប់: ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានរម្លឹកដល់មន្ត្រីពាក់ព័ន្ធទាំងអស់ បម្រើក្នុងអង្គភាព​ច្រកចេញចូលតែមួយ នៅខេត្ត,ស្រុក ដែលបានបង្កើតឡើងហើយនេះ និងមន្ត្រីនៅគ្រប់មូលដ្ឋានទាំងអស់គប្បីត្រូវប្រកាន់យក​គោលការណ៍​​សំខាន់ៗ៥ យ៉ាងគឺ សាមញ្ញ សីលធម៌ វិជ្ជាជីវៈ គណនេយ្យភាពការជឿទុកចិត្ត តម្លាភាព ក្នុងការបំពេញការងារ ដោយត្រូវខិតខំប្រមូលផ្តុំបង្កើនប្រសិទ្ធភាពផ្តល់សេវាសាធារណៈ ការផ្តល់ប្រយោជន៍នានា ក្នុងការអភិវឌ្ឍ គាំពារសង្គម ប្រកបដោយសមធម៌ និងខិតខំដោះស្រាយឆ្លើយតបរាល់សំណើរ និងសំណូមពរ ប្រកបដោយប្រសិទ្ធភាពខ្ពស់ជូន​ដល់ប្រជាពលរដ្ឋនៅគ្រប់មូលដ្ឋាន៕ ដោយៈ លោក ភូ សោភ័ណ អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com