លោកពូទីន និយាយថា រុស្ស៊ី ជាប្រទេសមានវ៉ាក់សាំងប្រឆាំងកូវីដ-១៩ មុនគេបង្អស់លើលោក.!!!
ប្រទេសរុស្ស៊ី៖ ប្រធានាធិបតីរុស្ស៊ី លោក វ៉ាទីមៀ ពូទីន នៅរសៀលថ្ងៃអង្គារ៍ សប្តាហ៍នេះ បានថ្លែងថា រុស្ស៊ី បានក្លាយជាប្រទេសដំបូងបង្អស់លើលោកដែលអនុញ្ញាតអោយផលិតវ៉ាក់សាំងប្រឆាំងកូវីដ-១៩ ក្រោយធ្វើតេស្តជោគជ័យលើមនុស្សរយៈពេល ២ខែកន្លងមកនេះ ដែលនេះជាភស្តុតាងបញ្ជាក់ថា ប្រទេសខ្លួនពោរពេញដោយធនធានមនុស្សប្រកបដោយសមត្ថភាពខាងវិទ្យាសាស្ត្រ។
ក្រោយការប្រកាសនេះ ពលរដ្ឋរុស្ស៊ីជាច្រើនកាន់តែមានសុទិដ្ឋិនិយម និងក្តីសង្ឃឹមខ្ពស់ ក្រោយពេលការសាកល្បងលើមនុស្សនៅគ្លីនិកបង្ហាញថា តេស្តនេះមានសុវត្ថិភាព និងប្រសិទ្ធភាពយូរអង្វែង។
ទោះបីជារុស្ស៊ី ត្រូវមើលឃើញថា បានពន្លឿនការអភិវឌ្ឍន៍វ៉ាក់សាំងឈ្នះបណ្តាប្រទេសជឿនលឿនជាច្រើនទៀតទូទាំងពិភពលោកក្តី ប៉ុន្តែអ្នកជំនាញជាច្រើន នៅតែបង្ហាញក្តីបារម្ភពីសុវត្ថិភាពវ៉ាក់សាំងរបស់ប្រទេសមហាអំណាចនេះ ដែលថ្លែងក្នុងកិច្ចប្រជុំរដ្ឋាភិបាលិបាល ដែលផ្សាយលើទូរទស្សន៍រដ្ឋប្រទេសនេះ លោក ពូទីន និយាយថា វ៉ាក់សាំង អភិវឌ្ឍន៍ដោយវិទ្យាសា្ថន Gamaleya ក្នុងទីក្រុងម៉ូស្គូ គឺមានសុវត្ថិភាព ដោយថែមទាំងបានប្រើទៅលើកូនស្រីរបស់លោកទៀតផង។
“ខ្ញុំដឹងថា វាមានប្រសិទ្ធភាពយូរអង្វែង ក្នុងការបង្កើនប្រព័ន្ធភាពស៊ាំ ហើយខ្ញុំសុំនិយាយជាថ្មី វាបានឆ្លងកាត់ដោយជោគជ័យគ្រប់ដំណាក់កាលតេស្ត”។ នេះបើតាមការបញ្ជាក់បន្ថែមពីបុរសមានឥទ្ធិពលបំផុតនៅរុស្ស៊ីរូបនេះ។ លោកថា លោកសង្ឃឹមប្រទេសលោក នឹងចាប់ផ្តើមផលិតវ៉ាក់សាំងជាផ្លូវការទ្រង់ទ្រាយធំឆាប់ៗនេះហើយ (នេះបើយោងតាមការផ្សាយ ការសែត កម្ពុជាថ្មី)៕
