ក្រុងប៉ោយប៉ែត៖ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត ដោយមើលឃើញពីទុក្ខលំបាករបស់បងប្អូនប្រជាពលរដ្ឋរស់នៅភូមិទំនប់ក៥ និងភូមិទួលប្រាសាទ ភូមិព្រៃគប់ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដែលប្រជាពលរដ្ឋទាំង៣ភូមិនោះ កំពុងជួបពិបាកក្នុងការធ្វើដំណើរតាមមធ្យោបាយ ទោចក្រក្រយានយន្ត និងយានយន្ត រួមនិងដំណើរថ្មើរជើង ឆ្លងកាត់ទៅវិញទៅមក មានផលពិបាកនារដូវវស្សា ដោយហេតុមានភ្លៀងធ្លាក់ជោកជាំជាច្រើនមេ ជាហេតុបង្កអោយផ្លូវថ្នល់ភូមិទំនប់ក៥ និងផ្លូវ សូ អា ZOA ទៅភូមិទួលប្រាសាទ ភូមិព្រៃគប់ ត្រូវបានខូចខាតស្ទើរទាំងស្រុង នៅក្នុងខែសីហា ឆ្នាំ២០២០នេះ។ នៅព្រឹកថ្ងៃទី២០ ខែសីហា ឆ្នាំ២០២០ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត បានប្រាប់សារពត៌មាន (គេហទំព័រប៉ោយប៉ែតប៉ុស្តិ៍)តាមទូរស័ព្ទអោយដឹងនាព្រឹកនេះថា៖ គ្រឿងចក្ររបស់លោកកំពុងដាក់ឈូសឆាយស្ថាបនាផ្លូវចំនួនពីរខ្សែ និងបានគៀកិនចាក់ក្រាលថ្មមិច ជូនប្រជាពលរដ្ឋមានចំនួនបីភូមិ ដើម្បីមានភាពងាយស្រួលក្នុងការធ្វើដំណើរនារដូវវស្សារួមមានដូចខាងក្រោម៖ ទី១-ចាប់ពីផ្លូវ សូ អា ZOA តភ្ជាប់ពីផ្លូវសង្កាត់ប៉ោយប៉ែត ឆ្ពោះទៅដល់ផ្លូវជាតិលេខ៥៨ ដែលមានប្រវែង ៧៤០០ ម៉ែត្រ ត្រូវបានស្ថាបនា ឈូសឆាយធ្វើផ្លូវ និងបានគៀកិនចាក់ក្រាលថ្មមិច បាន៥០% ដែលមានចំនួនពីរភូមិ៖ គឺ ភូមិទួលប្រាសាទ ភូមិព្រៃគប់ បូករួមនិងផ្លូវលំចូលទៅក្នុងវត្តព្រៃគប់។ ទី២-ផ្លូវមួយខ្សែទៀត ចាប់ផ្តើមធ្វើពីផ្លូវភូមិទំនប់ក៥ ឆ្ពោះកាត់ទៅដល់ផ្លូវជាតិលេខ៥៨ ត្រូវបានស្ថាបនា ឈូសឆាយគៀកិនចាក់ក្រាលថ្មមិច ដែលមានប្រវែង ៣៤០០ ម៉ែត្រ។ លោក គាត ហ៊ុល បានបញ្ជាក់អោយសារព័ត៌មានយើងដឹងយ៉ាងច្បាស់ថា៖ ថវិកាដែលបានចូលរួមចំណែកកសាងស្ថាបនាផ្លូវ២ខ្សែ ដែលមានចំនួន៣ភូមិខាងលើ គឺបានមកពីការឧបត្ថម្ភ ពី ឧបនាយករដ្ឋមន្ត្រី កែ គឹមយ៉ាន និងលោកជំទាវ និងប្រធានក្រុមការងារ រួមនិង ឯកឧត្តម អ៊ុំ រាត្រី លោកជំទាវ បូករួមនិងថវិកាក្រុមអាជីវករ រួមនិងថវិកាលោកផ្ទាល់ ចំណាយសរុបអស់ថវិកាជាង១០ម៉ឺនដុល្លារ សហរដ្ឋអាមេរិក សម្រាប់ធ្វើផ្លូវដែលមានប្រវែងចម្ងាយ១៦គីឡូម៉ែត្រឲ្យរួចរាល់ជាស្ថាពរ។ លោកអភិបាលបន្ថែមថា៖ នេះបើគិតតែថ្លៃទិញថ្មមិចចាក់ក្រាលនោះទេ មិនបានគិតការឈូសឆាយចំណាយប្រេងសាំងម៉ាស៊ុតទៅលើគ្រឿងចក្រឡើយ ព្រោះថាគ្រឿងចក្រគឺជាគ្រឿងចក្ររបស់លោកផ្ទាល់ខ្លួន៕ ពីខ្ញុំ ជួង វណ្ណអាង ចាងហ្វាងការផ្សាយ គេហទំព័រ ប៉ោយប៉ែត ប៉ុស្តិ៍ www.poipetpostnews.com