ខេត្តបន្ទាយមានជ័យ៖ នៅសៀលថ្ងៃទី១២ ខែតុលា​ ឆ្នាំ​២០២១​នេះ លោក សាន វិជ្ជាសារ៉ាវុធ ប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តបបន្ទាយមានជ័យ សហការជាមួយមន្រ្តីមន្ទីរពាណិជ្ជកម្មខេត្ត យកផលិតផល ជាច្រើនប្រភេទ ដែលខូចគុណភាព ហួសកាលបរិច្ឆេទ ប្រេីប្រាស់ ដុតកម្ទេចចោល នៅទីតាំងដីឡូតិ៍មួយកន្លែង ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត។ លោក សាន វិជ្ជាសារ៉ាវុធ បានអោយដឹងថា៖ សព្វថ្ងៃនេះ នៅតែមានក្រុមឈ្មួញរកស៊ីខុសច្បាប់ នាំយកផលិតផលទំនិញមួយចំនួនគ្មានផ្លាកសញ្ញា គ្មានប្រភពច្បាស់លាស់ ឬ ប្រភព ផលិតក្លែងក្លាយ ពីប្រទេសថៃ ចូលមកកម្ពុជា តាមច្រកល្បៀង តូចៗ នៅតាមបន្ទាត់ព្រំដែន ដែលជាហេតុបង្កការលំបាកក្នុងការស្រាវជ្រាវទប់ស្កាត់ និង បង្ក្រាប ហើយផលិតផលទាំងនេះអាចបង្កផលប៉ះពាល់យ៉ាងធ្ងន់ធ្ងរ ដល់សុខភាព និងអាយុជីវិត របស់អ្នកទិញយកទៅបរិភោគ និងប្រើប្រាស់។ លោក សាន វិជ្ជាសារ៉ាវុធ បានបន្តអោយដឹងថា៖ កន្លងទៅថ្មីៗក្នុងឆ្នាំ២០២១នេះ មន្ត្រី​សាខា​ ក.ប.ប យើង បានសហការជាមួយមន្រ្តីមន្ទីរពាណិជ្ជកម្មខេត្ត​ ចុះត្រួតពិនិត្យ និង​ ដកហូត ផលិតផលដែលខូចគុណភាព ហួសកាលបរិច្ឆេទ ការប្រេីប្រាស់ បានជាបន្តបន្ទាប់ដែលក្រុមអាជីករដាក់តាំងលក់នៅតាមទីផ្សារនានា និង នៅតាមម៉ាត ក្នុងភូមិសាស្ត្រនៃខេត្តបន្ទាយមានជ័យ ហើយទំនិញខូចគុណភាពទាំងអស់នេះមានដូចជា៖ នំធុង មាន​ចំនួន​ ៦៨ ធុង ស្មេី ២៧២ គីឡូក្រាម,ទឹកដោះគោ Dutch Mill មាន​ចំនួន​ ២០៧០ដប​ ស្មេី​ ១,៧១៨.១០ គីឡូក្រាម,ទឹកដោះគោស្រស់ Meji មាន​ចំនួន​ ៣០០ ដប ស្មេី​ ៦០០ លីត្រ,យ៉ាអ៊ួរ Dutch Nata De Coco មាន​ចំនួន​ ២១ យួរ ស្មេី​ ៦៥.៥២ គីឡូក្រាម សរុប​មាន​ចំនួន​ ២,៦៥៥.៦២ គីឡូក្រាម៕ ពីខ្ញុំ ជួង វណ្ណអាង ចាងហ្វាងការផ្សាយ គេហទំព័រ ប៉ោយប៉ែត ប៉ុស្តិ៍ www.poipetpostnews.com