ខេត្តបន្ទាយមានជ័យ៖ នៅថ្ងៃទី១៣ ខែតុលា ឆ្នាំ២០២១ ជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស អមដំណើរ ឯកឧត្តម ខេង ស៊ុម ប្រធានក្រុមប្រឹក្សាខេត្ត និង ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញនាំយករង្វាន់លើកទឹកចិត្តរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់លោកយាយលោកតា ដែលមានអាយុលើសពី ១០០ ឆ្នាំ ដែលបានស្ម័គ្រចិត្តចាក់វ៉ាក់សាំងបង្ការជំងឺកូវីដ-១៩ ចំនួន ៦ នាក់ ដែលរស់នៅក្នុងភូមសាស្ត្រនៃខេត្តបន្ទាយមានជ័យ រួមមាន៖ ទី១-លោកយាយ ថូ ឈិន អាយុ១០២ឆ្នាំ រស់នៅភូមិគោកចក ឃុំសូភី ស្រុកអូរជ្រៅ។ ទី២-លោកយាយ ណៃ ថោង អាយុ ១០២ ឆ្នាំ រស់នៅប៉ោយស្វាយ ឃុំរហាល ស្រុកព្រះនេត្រព្រះ។ ទី៣-លោកយាយ មាស ផល អាយុ ១០៦ឆ្នាំ រស់នៅភូមិថ្មរមៀលកើត ឃុំបន្ទាយឆ្មារ ស្រុកថ្មពួក។ ទី៤-លោកតា ឡៃ ខំផាន់ អាយុ១០១ ឆ្នាំ រស់នៅភូមិកូបតូច ឃុំគុតសត ស្រុកអូរជ្រៅ។ ទី៥-លោកយាយ ជុំ សាវឿន អាយុ ១០០ ឆ្នាំ រស់នៅឃុំតាបែន ស្រុកស្វាយ។ ទី៦-លោកយាយ លោកយាយ ឆៅ វិញ អាយុ ១០១ឆ្នាំ រស់នៅភូមិពង្រ ឃុំសិង្ហ ស្រុកអូរជ្រៅ ។ សូមបញ្ជាក់ផងដែលថា៖ លោកតា លោកយាយ ទាំង ៦ រូប បានទទួលអំណោយរបស់សម្តេចតេជោ ហ៊ុន សែន នាពេលនេះ គឺទទួលបានក្នុង ១នាក់ ថវិកាចំនួន ៣ លានរៀល និងគ្រឿងឧបភោគបរិភោគមួយចំនួន។ ឆ្លៀតក្នុងឱកាសនោះ ជំទាវ ឱ វណ្ណឌីន ក៏បានពាំនាំនូវប្រសាសន៍ផ្តាំផ្ញើដ៏ថ្លៃថ្លា របស់សម្តេចតេជោ សួរសុខទុក្ខ លោកយាយ លោកតា ផងដែរ៕ ដោយ: លោក វ័ន ប៊ុនរើន ជំនួយការ គេហទំព័រ ប៉ោយប៉ែត ប៉ុស្តិ៍ www.poipetpostnews.com