ខេត្តបន្ទាយមានជ័យ៖ កងកម្លាំងរវរសេនាតូចថ្មើរជើងលេខ៥១៣ ចុះល្បាតនៅបន្ទាត់ព្រំដែនកម្ពុជា-ថៃ នាពេលយប់រំលងអាធ្រាត្រ ឈានចូលថ្ងៃទី១៤ ខែតុលា ឆ្នាំ​២០២១ ស្ថិតក្នុងភូមិសិលាខ្មែរ ឃុំ​អូរ​បី​ជាន់ ស្រុក​អូរជ្រៅ ខេត្តបន្ទាយមានជ័យ ប្រទះឃើញ និង ឃាត់ខ្លួនពលករខ្មែរ ប្រុស ស្រី ចំនួន ៣៧​ នាក់ បម្រុងលួចឆ្លងដែនចូលទៅធ្វើការងារនៅប្រទេសថៃ ដោយខុសច្បាប់។ លោកវរសេនីយ៍ទោ យូ សុគន្ធ​ភក្តី មេបញ្ជាការ​វរ​សេនា​តូច​ថ្មើរជើង​លេខ​៥១៣ បានប្រាប់អ្នកយកព័ត៌មានអោយដឹងថា៖ លោកបានដឹកនាំកម្លាំង១ក្រុម​ សហការ​ជាមួយ​កម្លាំងចម្រុះចុះល្បាតនៅតាមខ្សែរបន្ទាត់ព្រំដែនកម្ពុជា-ថៃ ត្រង់ចំណុច ភូមិ​សិលា​ខ្មែរ បាន​ប្រទះឃើញ​ពលករ​ខ្មែរ ចំនួន ៣៧​ នាក់ ក្នុងនោះមាន"ស្រី១៨នាក់ ប្រុស១៩នាក់" ដែល​បម្រុងលួច​ឆ្លងដែនចូលទៅ​បប្រទេសថៃ ក្រោយឃាត់ខ្លួនបានហើយប្រគល់ទៅអោយខាងកម្លាំងជំនាញ ដើម្បី​អនុវត្ត​ទៅតាម​ច្បាប់​។ លោកវរសេនីយ៍ទោ យូ សុគន្ធ​ភក្តី បានបន្តអោយដឹងថា៖ ពលករទាំង៣៧នាក់ នេះក្រោយពីសួរនាំបាននិយាយថា ក្រុមខ្លួនបានលួចឆ្លងដែនដោយខុសច្បាប់ ចូលទៅក្នុងទឹកដីថៃ ដើម្បីស្វែងរកការងារធ្វើក្នុងខេត្តផ្សេងៗ។ បន្ទាប់ពីឃាត់ខ្លួនពលរដ្ឋខ្មែរទាំងនោះបាន កងកម្លាំងយោធាបានអោយក្រុមគ្រូពេទ្យជំនាញពិនិត្យសុខភាពពួកគាត់ទាំងអស់គ្នាជាមុន ដើម្បីទប់ស្កាត់ការរីករាលដាលជំងឺកូវី-១៩ ចូលក្នុងសហគមន៍។ ក្រោយពីក្រុមគ្រូពេទ្យពិនិត្យហើយ ធ្វើការអប់រំ និងធ្វើចត្តាឡីស័កនៅទីនោះរួចរាល់ហើយ អោយវិលត្រឡប់ទៅលំនៅដ្ឋានរៀងៗខ្លួន។ សូមបញ្ជាក់ថា៖ ដើម្បី​ចូលរួមចំណែក​ជាមួយ​រាជរដ្ឋាភិបាល ក្នុងការ​ទប់ស្កាត់​ការរីក​រាលដាល​នៃ​ជំងឺ​កូ​វីដ​-១៩ កុំអោយឆ្លងចូលសហគមន៍ កម្លាំង​វរ​សេនា​តូច​ថ្មើរជើង​លេខ​៥១៣ បានយកចិត្តទុកដាក់​អនុវត្តតាម​បទបញ្ជា​ថ្នាក់លើ​ទាំង៣​ទិស ក្នុង​ខេត្តបន្ទាយមានជ័យ ចាប់ពី​ទិស​អូរ​នាង ប៉ោយប៉ែត និង​ ទិសម៉ាឡៃ សហការ​ជាមួយ​កម្លាំង​នៅតាម​មូលដ្ឋាន​ចេញ​ល្បាត​ឆែកឆេរ​ត្រួតពិនិត្យ​ជាប្រចាំ​២៤ម៉ោងលើ២៤ម៉ោង ក្នុងការទប់ស្កាត់រាល់សកម្មភាព ដែលពលករខ្មែរលួចឆ្លងដែនដោយខុសច្បាប់៕ ដោយ: លោក ស៊ុយ វុទ្ធី គេហទំព័រ ប៉ោយប៉ែត ប៉ុស្តិ៍ www.poipetpostnews.com