ខេត្តឧត្ដរមានជ័យ៖ កាលពីថ្ងៃទី១៥ ខែវិច្ឆិកាឆ្នាំ២០២១ ម្សិលមុិញនេះ ក្រុមឈ្មួញដុះស្លែរនាំគ្នាសម្រុកដឹកធ្យូងឆ្លងដែនយកទៅលក់បន្តនៅឯប្រទេសថៃ យ៉ាងអនាធិបតេយ្យក្រោមការបើកភ្លើងខៀវពីសំណាក់លោក សាប់ យឿន ប្រធានស្នាក់ការច្រកទ្វារអន្តរជាតិជាំនិងមន្រ្តីជំនាញពាក់ពន្ធ័មួយចំនួននៅទីរួមស្រុកអន្លង់វែង។ បើយោងតាមប្រភពពីប្រជាពលរដ្ឋអ្នករកស៊ីដឹកកធ្យូងលក់ក្នុងស្រុកបានបញ្ជាក់ថា៖ ក្រុមឈ្មួញធំៗបានដើរប្រមូលទិញធ្យូងគ្រប់តំបន់ក្នុងខេត្តឧត្ដរមានជ័យ ដើម្បីយកទៅលក់បន្តនៅឯប្រទេសថៃ ក្នុងមួយថ្ងៃរាប់រយការុងដោយមានការត្រូវរ៉ូវ និង បង់លុយជូនសមត្ថកិច្ចមន្រ្តីជំនាញរដ្ឋបាលព្រៃឈើ ដែលមន្រ្តីឈជើងតាមច្រកទ្វារអត្តរជាតិជាំ គ្រប់ស្ថាប័នអស់ទៅហើយ ទើបគ្មានអ្នកបង្រ្កាប។ ប្រភពៈដដែលបានបន្តថា៖ បើក្រុមឈ្មួញចង់រកស៊ី ឫ ដឹកជញ្ជូនធ្យូងឆ្លងដែនតាមច្រកទ្វារមួយនេះ យកទៅលក់នៅឯប្រទេសថៃទាល់តែបង់លុយជាមុនសិន ទើបអាចចរាចរណ៍ដឹកចេញបាន។ បើក្រុមឈ្មួញចង់គេចវេសន៍ មិនព្រមបង់លុយ នឹង ត្រូវចាប់យកទាំងមនុស្ស និង រថយន្ត ទាំងធ្យូងតែម្ដង។ លោក សាប់ យឿប ប្រធានស្នាក់ច្រកទ្វារអន្តរជាតិជាំ ស្រុកអន្លង់វែង ពិតជាថ្លើមធំមែនហ៊ានបើកច្រកទ្វារអោយក្រុមឈ្មួញឧក្រិដ្ឋកម្មបំផ្លិចបំផ្លាញផលអនុផលព្រៃឈើ ប្រភេទដឹកធ្យូងឆ្លងដែនទៅលក់នៅឯប្រទេសថៃ ដោយមិនគោពសេចក្ដីណែនាំរបស់ប្រមុខរាជរដ្ឋាភិបាលឡើយ។ ជុំវិញការដឹកជញ្ជូនធ្យូងឆ្លងដែនទៅប្រទេសថៃខាងលើ តើ ឯកឧត្ដម ប៉ែន កុសល្យអភិបាលនៃគណះអភិបាលខេត្តឧត្តរមានជ័យ នឹង ជាគណះបញ្ជាការឯកភាព សុខចិត្តនៅអង្គុយស្ងៀមសម្លឹងមើលមន្រ្តីរបស់ ឯកឧត្ដមប្រព្រឹត្តអំពើរពុករលួយដល់ពេលណាទៀតទើបព្រមវះកាត់ និង ជាសាច់ស្អុយចេញនោះទាន? ឯណាទៅអភិក្រមទាំង៥ ដែលសម្ដេចតេជោ ដាក់ជូនដល់មន្រ្តីថ្នាក់ក្រោមអោយយកមកអនុវត្ត?។ ប្រជាពលរដ្ឋក៏ដូចជាមហាជនសូមធ្វើការសំណូមពរនឹងស្នើសុំដល់ឯកឧត្ដម វេង សាខុន រដ្ឋមន្រ្តីក្រសួងកសិកម្មរុក្ខាប្រម៉ាញ់ និងនេសាទ សូមមេត្តាចាត់វិធានការ បង្ការទប់ស្កាត់ និង បង្រ្កាប ក្រុមឈ្មួញប្រព្រឹត្តបទល្មើសខុសច្បាប់ នាំធ្យូងឆ្លងដែនយកទៅលក់នៅឯប្រទសថៃផងទាន! បើពុំដូច្នោះទេព្រៃឈើដែលនៅសេះសល់បន្តិចបន្ទួចក្នុងខេត្តឧត្ដរមានជ័យ និងរលាយសាបសូន្យជាក់ជាមិនខាន ព្រោះមន្រ្តីថ្នាក់ក្រោមរបស់ឯកឧត្ដម មិនមានវិធានការបង្រ្កាបឡើយ៕ ដោយៈ លោក សួន ចំណាប់ អ្នកយកព័ត៌មាន គេហទំព័រ ប៉ោយប៉ែត ប៉ុស្តិ៍ www.poipetpostnews.com