ខេត្តបន្ទាយមានជ័យ៖ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នាព្រឹកថ្ងៃទី២៩ ខែមករា ឆ្នាំ២០២១ បានដឹកនាំក្រុមការងារចុះបំពេញការងារក្នុងទិសទី១ (បន្ទាយមានជ័យ) នៅក្នុងទីបញ្ជាការកងការពារព្រំដែនលេខ៥០៣ យោធភូមិភាគទី៥ ។ អញ្ជើញអមដំណើររួមមាន៖ ឯកឧត្តមឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥។ មេបញ្ជាការរងនាយសេនាធិការ មេបញ្ជាការរងយោធភូមិភាគទី៥ មេបញ្ជាការទិសទី១ បន្ទាយមានជ័យ ។ ឯកឧត្តម ហ៊ុន ម៉ាណែត បានធ្វើការកោតសរសើរដល់កម្លាំងដែលឈរជើងនៅតាមបន្ទាត់ព្រំដែនទិសទី១ (បន្ទាយមានជ័យ) ដែលបានប្រឹងប្រែងអនុវត្តបានល្អប្រសើររាល់បទបញ្ជារបស់ថ្នាក់ដឹកនាំដែលបានដាក់ជូនកន្លងមក ពិសេសបានចូលរួមយ៉ាងសកម្មសហការជាមួយអាជ្ញាធរគ្រប់លំដាប់ថ្នាក់អនុវត្តតាមក្រសួងសុខាភិបាលក្នុងការចូលរួមទប់ស្កាត់ពលករឆ្លងដែនពីថៃ ដើម្បីទប់ស្កាត់ការរីករាលដាលនៅជំងឺកូវីដ-១៩ ចូលក្នុងទឹកដីកម្ពុជាកន្លងមក បានដោយជោគជ័យគួរជាទីមោទនៈ។ ក្នុងឱកាសចុះបំពេញការងារក្នុងទីបញ្ជាការកងការពារព្រំដែនលេខ៥០៣ នាថ្ងៃនេះ ឯកឧត្តម ហ៊ុន ម៉ាណែត បាន ឧបត្ថម្ភ បន្ថែមនៅអគារស្នាក់នៅ សម្រាប់កងល្បាតទី៣ ចំនួន ១ខ្នង ឃ្លាំងដាក់អាវុធគ្រាប់ ១ខ្នង ថ្នាក់វរសេនាតូច រថយន្តពេទ្យចំនួន ១គ្រឿង អគារស្នាក់នៅរបស់កងល្បាតទី២ ចំនួន ១ខ្នង វិទ្យុទាក់ទងKenwoodលើតុ ចំនួន ៨គ្រឿង វិទ្យុកាន់ដៃចំនួន ២០គ្រឿង ផ្ទាំងសូឡា ៥០ផ្ទាំង អាគុយ១០ធុង ឧបត្ថម្ភថវិកាដល់ទីបញ្ជាការកងការពារ៥០៣ ចំនួន ១០ លានរៀល ឧបត្ថម្ភថវិកា ដល់កងល្បាតទាំង ៧ ចំនួន ៥០ លានរៀល ផងដែរ៕ ដោយ: លោក ស៊ុយ វុទ្ធី