ប្រទេសមីយ៉ាន់ម៉ា៖ បើយោងតាមសារព័ត៌មានរ៉យទ័រ បានចុះផ្សាយថា៖ កាលពីថ្ងៃអាទិត្យកន្លងមកនេះ ក្រុមអ្នកតស៊ូមតិបាននិយាយថាកងកម្លាំងសន្តិសុខបានសម្លាប់ក្រុមបាតុករប្រឆាំងរដ្ឋប្រហារយ៉ាងតិច ២២ នាក់ នៅក្នុងតំបន់ឧស្សាហកម្មជាយក្រុង Hlaingthaya នៃប្រទេស មីយ៉ាន់ម៉ា បន្ទាប់ពីរោងចក្រដែលគ្រប់គ្រងដោយចិនត្រូវបានដុតបំផ្លាញ។ ក្រុមបាតុករ ១៦ នាក់ ផ្សេងទៀត បានសម្លាប់ នៅកន្លែងផ្សេងទៀត រួមទាំងនគរបាលម្នាក់ផងដែរ ដែលសមាគមជំនួយសម្រាប់អ្នកទោសនយោបាយ(AAPP) ​និយាយថា នោះជាថ្ងៃបង្ហូរឈាមច្រើនបំផុតចាប់តាំងពីរដ្ឋប្រហារគិយពីថ្ងៃទី១ ខែកុម្ភៈ ប្រឆាំងនឹងមេដឹកនាំជាប់ឆ្នោតលោកស្រី Aung San Suu Kyi ។ ស្ថានទូតចិនបាននិយាយថា បុគ្គលិកចិនជាច្រើននាក់បានរងរបួស និងជាប់នៅក្នុងការវាយប្រហារដោយការដុតបំផ្លាញ ដោយជនមិនស្គាល់អត្តសញ្ញាណនៅលើរោងចក្រកាត់ដេរសម្លៀកបំពាក់ នៅឯតំបន់ Hlaingthaya ហើយខ្លួនបានអំពាវនាវអោយប្រទេស មីយ៉ាន់ម៉ា ការពារទ្រព្យសម្បត្តិ និងពលរដ្ឋចិន។ ប្រទេស ចិន ត្រូវបានគេមើលឃើញថា កំពុងគាំទ្ររបបយោធាដែលបានកាន់អំណាច។ ប្រព័ន្ធផ្សព្វផ្សាយក្នុងស្រុកបាននិយាយថា នៅពេលផ្សែងហុយចេញពីតំបន់ឧស្សាហកម្ម កម្លាំងសន្តិសុខបានបើកការបាញ់ប្រហារទៅលើក្រុមអ្នកតវ៉ាទាំងនោះ ស្ថិតនៅជាយក្រុង ដែលជាកន្លែងសម្រាប់ប្រជាជនចំណាកស្រុកមកពីទូទាំងប្រទេស។ អ្នកថតរូបម្នាក់នៅកន្លែងកើតហេតុដែលសុំមិនបញ្ចេញឈ្មោះបានរៀបរាប់ថា៖ វាពិតជារន្ធត់ណាស់មនុស្សត្រូវបានគេបាញ់នៅនឹងមុខខ្ញុំ រូបភាពនោះមិនអាចចេញពីការចងចំារបស់ខ្ញុំ បានឡើយ។ ប្រព័ន្ធផ្សព្វផ្សាយរបស់រដ្ឋបានប្រកាសថាច្បាប់អាជ្ញាសឹក ត្រូវបានដាក់នៅក្នុងតំបន់ Hlaingthaya និងសង្កាត់មួយផ្សេងទៀតនៃទីក្រុងយ៉ាំងហ្គោន ដែលជាមជ្ឈមណ្ឌលពាណិជ្ជកម្ម និងជាអតីតរដ្ឋធានីរបស់ប្រទេសមីយ៉ាន់ម៉ា។ ទូរទស្សន៍ Myawadday ដែលគ្រប់គ្រងដោយកងទ័ពបាននិយាយថា កម្លាំងសន្តិសុខបានធ្វើសកម្មភាពបន្ទាប់ពីរោងចក្រកាត់ដេរចំនួន ៤ និងរោងចក្រផលិតជីមួយ ត្រូវបានឆាបឆេះ ហើយមនុស្សប្រហែល ២.០០០ នាក់ បានបញ្ឈប់រថយន្តពន្លត់អគ្គិភ័យមិនអោយចូលទៅពន្លត់អគ្គិភ័យឡើយ៕ ដកស្រង់អត្ថបទដោយ: គេហទំព័រ ប៉ោយប៉ែត ប៉ុស្តិ៍