ខេត្តឧត្ដរមានជ័យ៖ នៅរសៀលថ្ងៃទី២៧ ខែឧសភា ឆ្នាំ២០២១ លោក ខៀវ សុផានុរស្សចាងហ្វាងការផ្សាយ(គេហទំព័រ ម្លប់សន្តិភាព) ត្រូវបានសាលាដំបូងខេត្តឧត្តរមានជ័យ កោះអញ្ជើញចូលមកបំភ្លឺតាមបណ្តឹងថៅកែឈើដុះស្លែឈ្មោះ អ៊ឹង ជាវឆាយ ដោយទាសំណងជំងឺចិត្តជាទឹកប្រាក់ចំនួន១០,០០០,០០០៛(ដប់លានរៀល) ពីបទបរិហាកេរ្តិ៍ជាសាធារណ: ។ មូលហេតុដែលឈ្មួញឈើដ៏ល្បីប្រចាំភូមិភាគឧត្តររូបនេះ ប្តឹងអ្នកកាសែតខាងលើ ពីព្រោះអ្នកកាសែតរូបនោះ ហ៊ានចុះផ្សាយអំពីសកម្មភាពដឹកជញ្ជូនឈើរបស់គេ ដែលប្រព្រឹត្តកន្លងទៅកាលពីថ្ងៃទី២៧ ខែមិនាឆ្នាំ២០២១ ដោយដឹកចេញពីខេត្តមណ្ឌលគីរីឆ្លងកាត់ខេតស្ទឹងត្រែង-ព្រះវិហារ-ឧត្តរមានជ័យ និងឆ្ពោះទៅខេត្តបាត់ដំបង ដោយប្រើប្រាស់រថយន្តយីឌុបខ្នាតយក្សជាច្រើនគ្រឿងក្នុងការដឹកជញ្ជូន ។ គួរំលឹកថា៖ ក្រុមឈ្មួញខាងលើ តែងតែដឹកជញ្ជូនឈើជាបន្តរបន្ទាប់ ហើយក៏ត្រូវបានធ្លាប់សមត្ថកិច្ចចុះបង្ក្រាបជាក់ស្តែងកាលពីថ្ងៃទី២២ ខែឧសភា ឆ្នាំ២០២០ នាពេលកន្លងទៅ និងបានរឹបអូសយករថយន្ត១គ្រឿងប្រភេទត្រេនតូ(ហៅវ៉េអង)ពាក់ស្លាកលេខ(កំពង់ចាម 3A:7250) និងឃាត់ខ្លួនមនុស្សចំនួនមនុស្ស៣នាក់ ក្នុងនោះមានម្នាក់ឈ្មោះអួង ប៊ូណាំ ត្រូវជាក្មួយប្រុសបង្កើតរបស់ឈ្មោះអ៉ឹង ជាវឆាយ និង ចាត់តាមនិតិវិធីច្បាប់ផងដែរ។ ប្រជាពលរដ្ឋរស់នៅខេត្តឧត្តរមានជ័យថា៖ករណីឈ្មួញឈើប្តឹងអ្នកកាសែតទៅប្រព័ន្ធតុលាការនោះ គឺ ជាការបំបាក់ស្មារតី និងគំរាមដល់អ្នកសារព័ត៌មានផ្សេងទៀត កុំអោយចេះតែហ៊ានចុះផ្សាយពាក់ព័ន្ធ និង ជំនួញឈើរបស់គេ។ ដោយពួកគាត់ចាំមើលថាតើ លោកខៀវ សុផានុរស្ស ចាងហ្វាង(គេហទំព័រ ម្លប់សន្តិភាព)មានវាសនាយ៉ាងណា?ក្រោយពីជាប់បណ្តឹងថៅកែឈើវ័យក្មេងដ៏មានឥទ្ធិពលខាងលើនោះ។ បើទោះបីជាយ៉ាងនេះក្តី លោក ខៀវ សុផានុរស្ស បានថ្លែងថា៖ លោកនៅតែមានជំនឿយ៉ាងមុតមាំចំពោះប្រព័ន្ធយុត្តិធម្ម និងមានក្តីសង្ឃឹមថា សាលាដំបូងខេត្តឧត្តរមានជ័យ និងលើកលែងការចោទលោក(ខៀវ សុផានុរស្ស) ដោយយករបបសារសារព័ត៌មានជាគោលហើយបើកការសើុបអង្កេតឡើងវិញ ទាក់ទិននិងវិនាសកម្មព្រៃឈើ ដែលឈ្មួញខាងលើប្រព្រឹត្តកន្លងទៅ។ ដោយឡែកនៅថ្ងៃទី២៨ ខែឧសភា ឆ្នាំ២០២១នេះ លោក ខៀវ សុផានុរស្ស ចាងហ្វាង (គេហទំព័រ ម្លប់សន្តិភាព) បានអោយដឹងតាមប្រព័ន្ធ WhatsrApp ថា៖ ក្នុងករណីដែលលោក ចុះផ្សាយកាលពីថ្ងៃទី២៧ ខែមិនា ឆ្នាំ២០២១ គឺជារឿងពិតប្រាកដ ដែលមេឈ្មួញឈ្មោះ អ៊ឹង ជាវឆាយ យករថយន្តដឹកឈើ ដែរមានស្លាកលេខ (កំពង់ចាម 3A:7250) ដ៏ដែល នេះបើតាមការអះអាងរបស់លោក។ ចំណែករឿងនេះ ពិត ឬ មិនពិត? សូមលោក ព្រះរាជអាជ្ញាសាលាដំបូង ខេត្តឧត្តរមានជ័យ សូមមេត្តាធ្វើការស៊ើបអង្កេត អោយបានស៊ីជម្រៅ ជុំវិញករណីខាងលើនេះផងបាទ៕ ដោយៈ សួន ចំណាប់ អ្នកយកព័ត៌មាន គេហទំព័រ ប៉ោយប៉ែត ប៉ុស្តិ៍ www.poipetpostnews.com