រាជធានីភ្នំពេញ៖ ព្រឹកថ្ងៃទី១៨ ខែមិថុនា ឆ្នាំ២០២១ នៅវេលាម៉ោង០៩និង១០នាទី កម្លាំងនគរបាលព្រហ្មទណ្ឌក្រសួងមហាផ្ទៃបានឃាត់ខ្លួនលោកឧកញ៉ា ប្រាក់ ប្រាកដ ដែលគេស្គាល់ថា ជាមនុស្សមានមុខមានមាត់ម្នាក់នៅខេត្តព្រះសីហនុ យោងទៅតាមដីកាបញ្ជារបស់តុលាការរាជធានីភ្នំពេញ ដើម្បីសាកសួរពាក់ព័ន្ធនឹងការឆបោកប្រាក់ចំនួន ១០ ម៉ឺនដុល្លារ ទើបបានឈានដល់ការឃាត់ខ្លួនឧកញ៉ា ប្រាក់ ប្រាកដ បាននៅហាងកាហ្វេមួយកន្លែង ស្ថិតតាមបណ្តោយផ្លូវហាណូយ សង្កាត់ភ្នំពេញថ្មី ខណ្ឌសែនសុខ។ យោងតាមបណ្តឹងរបស់ឈ្មោះ ស្រី ចាន់ធូ មានទីលំនៅភូមិព្រៃនប់២ ឃុំព្រៃនប់ ស្រុព្រៃនប់ ខេត្តព្រះសីហនុ ដែលបានប្តឹងទៅអយ្យការអមសាលាដំបូងរាជធានីភ្នំពេញ កាលពីថ្ងៃទី២៥ ខែឧសភា ឆ្នាំ២០២១ បានអោយដឹងថា លោកស្រី បានជួបជាមួយលោកឧកញ៉ា ប្រាក់ ប្រាកដ កាលពីថ្ងៃទី១៥ ខែមករា ឆ្នាំ ២០២១ ដើម្បីជជែកគ្នាពីការធានារត់ការផ្ទេរឈ្មោះនិងតួនាទីរបស់របស់អ្នកស្រីឈ្មោះ អេង អូន ចេញ ពីក្របខណ្ឌកងពលខេមរភូមិន្ទទៅបម្រើការក្នុងក្របខណ្ឌនគរបាលជាតិ និងរត់អោយឡើងតួនាទីជាស្នងការរង នៃស្នងការដ្ឋាននគរបាលខេត្តព្រះសីហនុ ដោយព្រមព្រៀងគ្នាក្នុង តម្លៃរត់ការចំនួន ៣០ ម៉ឺនដុល្លារ។ បន្ទាប់ពីបានជជែកចរចាគ្នាត្រូវហើយ នៅថ្ងៃទី២៦ ខែមករា ឆ្នាំ២០២១ អ្នកស្រី ចាន់ ធូ និងស្វាមី បានប្រគល់លុយទៅលោកឧកញ៉ា ប្រាក់ ប្រាកដ ចំនួន ១០ ម៉ឺនដុល្លារ ហើយចំនួន ២០ម៉ឺនដុល្លារទៀត ចាំទទួលបានលទ្ធសម្រេចការផ្ទេរក្របខណ្ឌ និងឡើងតួនាទីជាស្នងការរង នៃស្នងការដ្ឋាននគរបាលខេត្តព្រះសីហនុ ទើបប្រគល់គ្រប់ចំនួន។ ដោយយោងតាមពាក្យបណ្តឹង ក្រោយទទួលបានលុយចំនួន ១០ ម៉ឺនដុល្លារ ហើយ លោកឧកញ៉ា ប្រាក់ ប្រាកដ ពុំបានយកលុយនោះទៅរត់ការផ្ទេរក្របខណ្ឌនិងតួនាទី តាមការសន្យារបស់ខ្លួនឡើយ។ លោកតែងតែប្រើឡេះនេះ ឡេះនោះ រហូតមិនលើកទូរស័ព្ទ និងឆ្លើយតបតាមប្រព័ន្ធតេឡេក្រាម គេចមិនចូលផ្ទះរហូតដល់បច្ចុប្បន្ន ទើបធ្វើជនរងគ្រោះសម្រេចដាក់ពាក្យបណ្តឹងទៅតុលាការរាជធានីភ្នំពេញ។ លោកព្រះរាជអាជ្ញារង ស៊ិត វណ្ណៈ បានចេញដីកានៅថ្ងៃទី ៣ ខែមិថុនា ឆ្នាំ២០២១ កោះហៅឈ្មោះ ប្រាក់ ប្រាកដ អោយចូលខ្លួនមកឆ្លើយបំភ្លឺនៅថ្ងៃទី១៧ ខែមិថុនា ឆ្នាំ២០២១ តែបុគ្គលនេះមិនព្រមចូលខ្លួនមកបំភ្លឺ តាមការដីកាកោះហៅរបស់ព្រះអាជ្ញារងឡើយ ទើបង្គាប់បញ្ជាអោយឃាត់ខ្លួនតែម្តង៕