ខេត្តសៀមរាប៖ បទល្មើសព្រៃឈើនៅក្នុងស្រុកជីក្រែង ខេត្តសៀមរាប ក្រុមមេឈ្មួញ ឧក្រិដ្ឋជន នៅតែបន្តធ្វើសកម្មភាពជាដឹកចេញជារៀងរាល់ថ្ងៃយប់ បើទោះបីក្រុមអ្នកសារព័ត៌មាន ខិតខំទៅប្រមាញ់ផ្តិតយករូបភាពធ្វើការផ្សព្វផ្សាយ ដើម្បីអោយមន្ត្រីជំនាញពាក់ព័ន្ធទាំងអស់បានដឹង និង ចុះទៅបង្រ្កាប។ ទោះជាយ៉ាងនេះក្តី គេតែងតែសង្កេតឃើញថា មន្ត្រីជំនាញក្នុងខេត្តសៀមរាប ជាពិសេស មន្រ្តីជំនាញក្នុងស្រុកជីក្រែង ហាក់បីដូចជា មិនសូវយកចិត្តទុកដាក់ ក្នុងការបង្រ្កាបសោះ។ តាមការជាក់ស្តែង នៅវេលាម៉ោង ០៣ យប់ ទាបភ្លឺ ឈានចូលថ្ងៃទី០៦ ខែមិថុនា ឆ្នាំ២០២១ ក្រុមសារព័ត៌មានយើង បានសង្កេតឃើញថា មានការដឹកជញ្ជូនបទល្មើសផល្លាអនុផលព្រៃឈើ យ៉ាងគគ្រឹកគគ្រេង ចេញពីដែនអភិរក្សសត្វព្រៃបឹងពេ ដើម្បីយកទៅចែកចាយតាមដេប៉ូឈើ និង រោងសិប្បកម្មនានា ក្នុងស្រុកជីក្រែង ដោយរលូន ពុំមានឃើញមន្រ្តីជំនាញណា ទៅធ្វើការទប់ស្កាត់ ឬ បង្រ្កាបឡើយ ។ ដោយយោងតាមប្រភព បានឲ្យដឹងថា បទល្មើសព្រៃក្នុងស្រុកជីក្រែង អាចធ្វើសកម្មភាព បានដោយរលូនជារៀងរាល់ថ្ងៃនេះ គឺដោយសារមន្រ្តីជំនាញនីមួយៗ បានទទួលលាភសក្ការៈពីក្រុមឈ្មួញ ទើបមិនបង្រ្កាប។ តាមប្រភពច្បាស់ការណ៍ បានឲ្យសារព័ត៌មានយើងដឹងថា លោក សូរ ផល្លា នាយផ្នែកសង្កាត់រដ្ឋបាលព្រៃឈើជីក្រែង ដាក់ក្មួយឈ្មោះ ក្តី ដើម្បីដើរប្រមូលលុយពីបទល្មើសព្រៃឈើ។ រីឯ លោក ភោគ វិរៈ ដាក់លោក ម៉េត និង កោះ គាន ដើរប្រមូលលុយពីបទល្មើសព្រៃឈើ។ និងលោក រិទ្ធ មន្ត្រីផ្នែករដ្ឋបាលព្រៃឈើ ដាក់លោក មី ដើរប្រមូលលុយពីបទល្មើសព្រៃឈើ និងលោក វុធ នាយរងសង្កាត់ព្រៃឈើខ្វាវ ដើរប្រមូលលុយចូលហោប៉ៅ ខ្លួនឯង និងចែកគ្នា ធ្វើមានធ្វើបាន ជាថ្នូរមិនបង្រ្កាប។ ប្រភពបន្ថែមថា៖ ឈ្មួញឈើដ៏ល្បីក្នុងការដឹកជញ្ជូនបទល្មើសព្រៃឈើក្នុងស្រុកជីក្រែង ខេត្តសៀមរាប មានឈ្មោះ ដូចជា៖ លោក រ៉ុម លោក ថី,លោក ជា,លោក ថេង ហើយ និង មានឈ្មួយឈើ ជាច្រើននាក់ទៀត។ ពាក់ព័ន្ធនិងបញ្ហានេះដែរនៅព្រឹកថ្ងៃទី០៦ ខែមិថុនា ឆ្នាំ២០២១នេះ លោក ភោគ វិរៈ នាយសង្កាត់រដ្ឋបាលព្រៃឈើ មិនអាចសុំការបំភ្លឺបានទេដោយសារខលមិនចូល។ រីឯលោក សូរ ផល្លា និងលោក រិទ្ធ សារព័ត៌មានយើងក៏មិនទាន់ទទួលការបកស្រាយបំភ្លឺដូចគ្នា ដោយសារគ្មានលេខទូរស័ព្ទ។ ដូច្នេះមហាជន សូមអំពាវនាវដល់ឯកឧត្តម ទៀ សីហា អភិបាលខេត្តសៀមរាប ដាក់អធិការកិច្ច ចុះស៊ើបអង្កេតករណីនេះផង៕