ខេត្តបន្ទាយមានជ័យ​៖ នៅរសៀលថ្ងៃទី១០​ ខែសីហា ឆ្នាំ២០២១ នេះ ឯកឧត្តម ឧត្តមសេនីយ៍ឯក ហ៊ុន ម៉ាណែត​ អនុប្រធានគណៈប្រតិបត្តិនៃគណៈកម្មការ អន្តរក្រសួងប្រយុទ្ធនឹងជំងឺកូវីដ-១៩ ទទួលបន្ទុកអនុគណៈកម្មការបច្ចេកទេស និងព្យាបាល អមដំណើរប្រតិភូ បានអញ្ជើញពិនិត្យវឌ្ឍនភាពនៃការរៀបចំមណ្ឌលព្យាបាលកម្រិតស្រាល បម្រុងសម្រាប់ព្យាបាលជូនបងប្អូនពលករខ្មែរ ដែលវិលត្រលប់ពីប្រទេសថៃ និងក្នុងករណីដែលមានជំងឺកូវីដ-១៩ មានទីតាំងក្នុងក្រុងសិរីសោភ័ណ និង ស្រុកមង្គលបូរី។ ក្នុងការចុះពិនិត្យទីតាំងសម្រាប់ព្យាបាលអ្នកជំងឺកូវីដ-១៩​ នេះ ក៏មានការចូលរួមអមដំណេីរដោយ ឯកឧត្តម​​ ខេង​ ស៊ុម​ ប្រធានក្រុមប្រឹក្សាខេត្តបន្ទាយមានជ័យ​ ឯកឧត្តម​​ អ៊ុំ​ រាត្រី​ អភិបាលខេត្ត​បន្ទាយមានជ័យ​ រួមនិងក្រុមការងារសុខាភិបាលផងដែរ។ ក្នុងឱកាសនោះ ឯកឧត្តម ឧត្តមសេនីយ៍ឯក ហ៊ុន ម៉ាណែត​ ក៏ជម្រុញដល់ថ្នាក់ដឹកនាំខេត្ត​ ក៏ដូចជាក្រុមការងាសាងសង់ ត្រូវពន្លឿនដំណេីរការសាងសង់អោយបានឆាប់រួចរាល់ ដេីម្បីដាក់ដំណេីការព្យាបាលជូនអ្នកជំងឺកូវីដ-១៩។ ទន្ទឹមនិងនោះ ឯកឧត្តម ក៏បានថថ្លែងការកោតសរសេីរចំពោះថ្នាក់ដឹកនាំខេត្តបន្ទាយមានជ័យ មន្ត្រីរាជការ កងកម្លាំង​ ដែលបានខិតខំយ៉ាងសស្រាក់សស្រាំក្នុងយុទ្ធនាការប្រយុទ្ធប្រឆាំងជំងឺកូវីដ-១៩​ ដែលយេីងត្រូវតែរួបរួមគ្នាដេីម្បីទប់ស្កាត់អោយបាននូវការឆ្លងរាលដាលនៃជំងឺកូវីដ-១៩ ចូលក្នុងសហគមន៍​ ពិសេសប្រភេទបំប្លែងថ្មី​ Delta ដែលវាមានលទ្ធភាពចម្លងលឿន​ នឹងគ្រោះថ្នាក់ធ្ងន់ធ្ងរ បេីសិនយេីងព្យាបាលមិនបានទាន់ពេលវេលា។ ឯកឧត្តម​​ អ៊ុំ​ រាត្រី​ អភិបាលនៃគណៈអភិបាលខេត្តបន្ទាយមានជ័យ​ ក៏បានបញ្ជាក់ថា​៖​ រហូតមកទល់ពេលនេះខេត្តបានរៀបចំមណ្ឌល ចត្តាឡីស័ក​មានរហូតទៅដល់១៩ទីតាំង ទូទាំងខេត្តបន្ទាយមានជ័យ​ ដែលពលករកំពុងស្នាក់នៅ​ធ្វេីចត្តាឡីស័កមានចំនួន៣៩០០នាក់ នឹងត្រៀមសម្រាប់បងប្អូនពលករដែលនឹងវិលត្រលប់មកកម្ពុជាវិញ​ បន្ទាប់ពីមានការបេីកព្រំដែនវិញនៅពេលខាងមុខផងដែរ។ ក្នុងនោះដែលនៅក្នុងខេត្តក៏មានមណ្ឌលព្យាបាល​ ចំនួន១៥ទីតាំង​ ដែលអាចទទួលបានអ្នកជំងឺបានប្រមាណ៥០០០នាក់ហេីយ។ ឯកឧត្តម អ៊ុំ រាត្រី បានបន្ថែមថា៖ មកទល់ពេលនេះមានអ្នកជំងឺជាពលករ និង អ្នកជំងឺក្នុងសហគមន៍មានចំនួន៣៨០០នាក់ ដែលកំពុងសម្រាក់ព្យាបាលនៅក្នុងខេត្ត។ ជាមួយគ្នានេះខេត្តក៏បាានរៀបចំកន្លែងមណ្ឌលព្យាបាលធំចំនួន២កន្លែងទៀត ដែលក្នុងមួយទីតាំងមានចំនួន៣០០០គ្រែ​ ដែលទទួលអ្នកជំងឺបានចំនួន៣០០០នាក់៕​