ខេត្តឧត្ដរមានជ័យ៖ បើយោងប្រភពរិះគន់ពីប្រជាពលរដ្ឋចំនួនពីរភូមិ​ មានការមិនសប្បាយចិត្ត​ និងខកចិត្តយ៉ាងខ្លាំង ក្រោយការសាងសង់ទំនប់ បង្ហូរទឹក រួចរាល់ នៅចំណុចអូរព្រំប្រទល់ភូមិរំចេកលិច និងភូមិរំចេកកណ្ដាល ឃុំអន្លង់វែង ស្រុកអន្លង់វែង ខេត្តឧត្ដរមានជ័យ ដែលថ្មីៗនេះត្រូវបានប្អូនប្រុសបង្កើត ឯកឧត្ដម លឹម គានហោ រដ្ឋមន្រ្ដីក្រសួងធនធានទឹក និង ឧតុនិយម ឈ្មោះ​ លឹម ជា បានឃុបឃិតជាមួយអាជ្ញាធរភូមិ.ឃុំ ធ្វើឯកសាររំលោភយកដីច្រាំងអូរ​ និងចាក់ដីលុបអូរ ចាក់ដីលុបខឿនទំនប់បង្ហូរទឹក ដែលសុទ្ធសឹងជាសម្បត្តិរដ្ឋ​ រំលោភយកដោយគ្មានការខ្មាស់អៀនមហាជនស្រុកអន្លង់វែងបន្តិចសោះ.! ដោយអាងខ្លួនជាប្អូនរបស់រដ្ឋមន្រ្ដីក្រសួងធនធានទឹក និង ឧតុនិយម។ ពលរដ្ឋសូមសំណូមពរដល់សម្ដេចតេជោ​ ហ៊ុន​ សែន និងឯកឧត្ដម​ លឹម​ គានហោ ជួយអន្តរាគម​ន៍ ដេីម្បីរក្សាដីរដ្ឋនៅទីតាំងខាងលើ​ ទុកជាសម្បត្តិសារធារណៈវិញផង​ ទុកសំរាប់ពលរដ្ឋសំរាក​ និងលំហែកាយ នៅពេលទៅលេងទឹកកម្សាន្ដទីនោះ។ ចំពោះករណីនេះ​ លោក​ ឡេវ សែត មេភូមិរំចេកកណ្ដាល​ បានអោយដឹងថា ដីទីតាំងខាងលើ​ ត្រូវឈ្មោះ​ អួន វិបុល លក់ទៅអោយឈ្មោះ​ លឹម ជា ហើយបានធ្វើលិខិតត្រឹមអាជ្ញាធរឃុំ ដោយមានការចុះហត្ថលេខាមេភូមិរហូតដល់ទៅបីភូមិ ក្នុងនោះមានហត្ថលេខា លោក​ ឡេវ សែត មេភូមិរំចេកកណ្ដាល លោក​ ទៀង សាលាវ មេភូមិរំចេកខាងកើត និងលោក​ យ៉េ អ៊ុន​ មេភូមិរំចេកខាងលិច។​ ចំណែកលោក​ ទៀង សាលាវ មេភូមិរំចេកខាងកើត បានបញ្ជាក់យ៉ាងច្បាស់ថា​ ទីតាំងខាងលើ​ ជាសម្បត្តិរដ្ឋ គ្មានប្រវត្តិបុគ្គលណាម្នាក់កាន់កាប់ទេ។​ លោក​ ស្ដើង វ៉ាន់ណេត ប្រធានការិយាល័យភូមិបាលស្រុកអន្លង់វែង បានអោយដឹងថា​ ឯកសារខាងលើ​មកដល់ឃុំហើយ​និងបញ្ជូនមកអោយលោក​តែមិនទាន់បានពិនិត្យទេ។ នៅថ្ងៃទី០៣ ខែសីហា ឆ្នាំ២០២១ នេះក្រុមការងារយើងខ្ញុំ មិនទាន់អាចសុំការបំភ្លឺបកស្រាយពីលោក លឹម ជា បាននៅឡើយទេ ព្រោះគ្មានលេខទូរសព្ទ័ រាល់ព័ត៏មាននឹងខ្លឹមសារខាងលើ ក្រុមការងារយើងនឹងរងចាំការបំភ្លឺជានិច្ចរាល់ម៉ោងធ្វើការ៕ ដោយ: លោក សួន ចំណាប់ គេហទំព័រ ប៉ោយប៉ែត ប៉ុស្ដិ៍ www.poipetpostnews.com