ខេត្តបន្ទាយមានជ័យ៖ មានសេចក្តីរាយការណ៍ពីបងប្អូន កសិករ នៅខេត្តបន្ទាយមានជ័យ នៅរសៀលថ្ងៃទី០៦ ខែសីហា ឆ្នាំ២០២១ នេះ មកថា៖ ឆ្នាំនេះការជំរុញក្នុងការដាំដុះ ស្រូវស្រាល បង្កើនរដូវ ដោយទទួលផលស្រូវបានច្រើន ប៉ុន្តែ អ្វីដែលធ្វើអោយពួកគាត់សម្តែងការខកចិត្តនោះគឺរឿងតម្លៃស្រូវនៅដើម​រដូវប្រមូលផលនេះ មានការធ្លាក់ថ្លៃជាងឆ្នាំមុនយ៉ាងគំហ៊ុក។ សេចក្តីរាយការណ៍បន្តថា៖ នៅភូមិអន្លង់ថ្ងាន់ ឃុំបត់ត្រង់ ស្រុកមង្គលបូរី ខេត្តបន្ទាយមាន​ជ័យ នៅរសៀលថ្ងៃទី០៦ ខែសីហា ឆ្នាំ២០២១ នេះ ការធ្វើស្រែឆ្នាំនេះដោយសារតែមានទឹកស្រោចស្រពគ្រប់គ្រាន់បានធ្វើអោុដំណាំ ស្រូវស្រាល បង្កើនរដូវនៅក្នុងតំបន់របស់ពួកគាត់ ទទួលបានទិន្នផលខ្ពស់ ធ្វើអោយប្រជាកសិករក្នុងមូលដ្ឋាន មានការសប្បាយចិត្តនឹងភោគផលស្រូវ ដែលទទួល ទិន្នផល បានច្រើន។ សេចក្តីរាយការណ៍ពីកសិករបានបញ្ចប់ថា៖ ការទទួលទិន្នផលស្រូវស្រាល បានច្រើនម៉ែន តែក៏ជាការខកចិត្តសម្រាប់ពួកគាត់ផងដែរ ដោយសារតម្លៃស្រូវឆ្នាំនេះ បានធ្លាក់ថ្លៃ ដោយពួកឈ្មួលដែលកំពុងដើរទិញនៅពេលប្រមូលផលស្រូវសើមប្រភេទ ៥៤មានតម្លៃ ៥,៤ បាត (ប្រាក់ថៃ)ក្នុង១គីឡូ​ក្រាម (ប្រហែល៦៨០រៀល) និងស្រូវសើមប្រភេទសែនក្រអូប មានតម្លៃពី ៧,៤​ បាត ទៅ ៧,៥បាត(ប្រាក់ថៃ) ក្នុង១គីឡូក្រាម (ប្រហែល៩៤០រៀល)។ ដោយឡែក៖ កាលពីឆ្នាំទៅមិញ ក្នុងរយៈពេលដូចគ្នា ស្រូវសើមប្រភេទ ៥៤ មានតម្លៃពី ៦,២ បាត ទៅ៦,៦បាត​ (ប្រាក់ថៃ) ក្នុង១គីឡូក្រាម និងស្រូវសើមប្រភេទសែនក្រអូប មានតម្លៃ ៨,២ បាត (ប្រាក់ថៃ) ក្នុង១គីឡូ​ក្រាម។ ការលើកឡើងស្រដៀងគ្នានេះដែរ ពី កសិករ សុខ វ៉ាន់ថន ភេទប្រុសអាយុ៦០ឆ្នាំ បានលើកឡើងថា ការធ្លាក់ចុះខ្លាំងនៃតម្លៃស្រូវនេះ ធ្វើអោយកសិករប្រឈមនឹងការខាតខ្លាំង ព្រោះការធ្វើស្រែត្រូវចំណាយប្រាក់ច្រើន ដូច​ជាចំណាយទៅលើការភ្ជួររាស់ ថ្លៃជី ថ្លៃថ្នាំ និងថ្លៃ ពូជ ស្រូវ។ លោកបានបន្ដថា តម្លៃស្រូវធ្លាក់ថ្លៃដូច្នេះ គួរតែតម្លៃ ជី ថ្នាំ និង ពូជស្រូវ ចុះថ្លៃដូចគ្នាដែរ ទើបកសិករអាចទូទាត់ក្នុងការចំណាយបាន និងមិនទទួល​រងការបង់ខាតច្រើន។ ប៉ុន្តែផ្ទុយទៅវិញសម្ភារទាំងអស់នេះនៅតែឡើងថ្លៃដដែល ហើយតម្លៃស្រូវវិញចេះតែចុះថ្លៃ ដែលមិនអាចទទួលយកបាន។ ពាក់ព័ន្ធនឹងបញ្ហាស្រូវធ្លាក់ថ្លៃខាងលើ លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ បានទទួលស្គាស់ពីការធ្លាក់ចុះតម្លៃស្រូវនេះ និងបានលើកឡើងថា បរិមាណធ្វើស្រែស្រូវស្រាលបង្កើនរដូវរបស់ប្រជាកសិករ ទូទាំងខេត្តបន្ទាយមានជ័យ សម្រាប់ឆ្នាំ២០២១នេះ សរុបមានប្រមាណជាង ៥ ម៉ឺនហិកតា។ លោកបានបន្ថែមថា ចំពោះទិន្នផលក្នុងឆ្នាំនេះ ជាមធ្យមទទួលបានជាង ៤ តោន ក្នុង១ហិកតា។ លោកប្រធានមន្ទីរបានលើកឡើងថា ចំពោះបញ្ហាតម្លៃស្រូវធ្លាក់ថ្លៃជាងឆ្នាំមុន ដោយសារតែប្រជាកសិករសម្រុកធ្វើស្រូវប្រភេទ៥៤ ច្រើនពេក និងម្យ៉ាងទៀតវាជាបញ្ហារបស់ឈ្មួញដែលដើរប្រមូលទិញតែងតែបន្ថោកតម្លៃនៅពេលរដូវប្រមូល​ផលស្រូវ៕ ដោយ: លោក វ័ន ប៊ុនរើន ចំនួនការ