ខេត្តបន្ទាយមានជ័យ៖ កាលពីម្សិលមិញយោងតាមគណនេយ្យ ផេកផ្លូវការ របស់ ឯកឧត្តម អ៊ុំ រាត្រី អភិបាល នៃគណ:អភិបាលខេត្តបន្ទាយមានជ័យ ឯកឧត្តម បានថ្លែងរិះគន់ថា កាលពីវេលាម៉ោង១០និង០៥នាទីយប់ ខ្ញុំបានបរិច្ចាគឈាមដើម្បីជួយសង្រ្គោះលោក អិន លីអាន មានឋានន្តរសក្ត័វរសេនីយ៍ទោ ជាក្រុមការងារអង្គរក្សសម្តេចតេជោ ដែលបានមកបំពេញបេសកកម្មនៅខេត្តបន្ទាយមានជ័យ ដែលត្រូវធ្វើការវះកាត់នៅមន្ទីរពេទ្យខេត្តស្រុកមង្គលបូរី ហើយដែលលោកប្រធានមន្ទីរពេទ្យប្រាប់ថា ជាគោលការណ៍ ត្រូវរកអ្នកអោយឈាមជំនួស និងបង់ថ្លៃសេវាមុនធ្វើការវះកាត់ទោះអ្នកជំងឺធ្ងន់ក៏ដោយ។ ឯកឧត្តម អភិបាលខេត្ត បានសង្កត់ធ្ងន់ៗ ទៅលោក ច័ន្ទ វុឌ្ឍីណាវុធ ប្រធានមន្ទីរពេទ្យ យ៉ាងដូច្នេះថា៖ តើការគ្រប់គ្រងរបៀបនេះគួរត្រូវសម្រេចយ៉ាងម៉េចចំពោះអ្នកគ្រប់គ្រងដែលមិនគិតពីក្រមសីលធម៌ និង មិនចេះចាត់ចែងការងារ ហើយមិនមែនលើកទីមួយទេ គឺច្រើនលើកហើយ ដែលប្រជាពលរដ្ឋតែងតែរអ៊ូរទាំលើការផ្តល់សេវារបស់មន្ទីរពេទ្យដែលលោក ច័ន្ទ វុឌ្ឍីណាវុធ ជាប្រធាន។ បើយោងប្រភពរិះគន់ពីប្រជាពលរដ្ឋទៅលើមន្ទីរពេទ្យខេត្តមិត្តភាព កម្ពុជា-ជប៉ុន មង្គលបូរី បានលើកឡើងថា៖ ការផ្ដល់សេវារបស់ក្រុមគ្រូពេទ្យខាងលើ គឺតែងតែតម្រូវអោយបង់ថ្លៃសេវាមុន ទើបព្យាបាលក្រោយដូច្នេះឯង មិនបានគិតពីការសង្គ្រោះអ្នកជម្ងឺឈឺធ្ងន់ធ្ងរជាមុននោះទេ តើក្រសួងសុខាភិបាល គួរចាត់វិធានការទៅលើលោក ច័ន្ទ វុឌ្ឍីណាវុធ ប្រធានមន្ទីរពេទ្យខេត្តមិត្តភាពស្រុកមង្គលបូរី យ៉ាងណាវិញ បើរឿងនេះ សូម្បីតែ ឯកឧត្តម អ៊ុំ រាត្រី ក៏ប្រតិកម្មដែរ៕ ដោយ: លោក វ័ន ប៊ុនរើន ជំនួយការ គេហទំព័រ ប៉ោយប៉ែត ប៉ុស្តិ៍ www.poipetpostnews.com