កម្លាំងជំនាញនិងសមត្ថកិច្ចចម្រុះ សហការចាប់ឡាន ដឹកអុស ព្រៃ ខុសច្បាប់ ចំនួន ២០ ម៉ែត្រគូប នៅចំណុចគល់ស្ពានព្រៃប្រស់.!!!
ខេត្តកំពង់ធំ៖ កម្លាំងជំនាញសមត្ថកិច្ចចម្រុះ បានធ្វើការឆ្មក់ចាប់រថយន្តដឹកផលអនុផលព្រៃឈើ (អុសព្រៃ) ខុសច្បាប់ ខណៈឈ្មួញព្យាយាមបើករត់គេចពីជំនាញរដ្ឋបាលព្រៃឈើខេត្តកំពង់ធំ លុះមកដល់ចំណុចគល់ស្ពានព្រៃប្រស់ ក្នុងស្រុកកំពង់ស្វាយ ត្រូវបានចាប់បាន។
ប្រតិបត្តិការបង្ក្រាបរថយន្តដឹកផលអនុផលព្រៃឈើខុសច្បាប់នេះ ដឹកនាំដោយលោក ស៊ី កុលស នាយរងខណ្ឌរដ្ឋបាលព្រៃឈើ កំពង់ធំ សហការជាមួយនឹងកម្លាំងនគរបាលស្រុកកំពង់ស្វាយ កាលពីល្ងាចថ្ងៃទី០៣ ខែតុលា ឆ្នាំ២០២២ ត្រង់ចំណុចភូមិព្រៃព្រាល ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។
លោក ស៊ី កុលស នាយរងខណ្ឌរដ្ឋបាលព្រៃឈើ ខេត្តកំពង់ធំ បានអោយដឹង កាលពីថ្ងៃទី០៣ ខែតុលា ឆ្នាំ២០២២ ថា ក្នុងប្រតិបត្តិការបង្ក្រាបខាងលើនេះ គឺកម្លាំងជំនាញបានធ្វើការស្រាវជ្រាវយ៉ាងល្អិតល្អន់ រហូតឈានមកដល់ការបង្ក្រាបបានលទ្ធផលល្អ។
យោងតាមប្រភពព័ត៌មានច្បាស់ការពីសមត្ថកិច្ចជំនាញ បានអោយដឹងងថា ជនល្មើសដែលដឹកជញ្ជូនផលអនុផលព្រៃឈើ (អុសព្រៃ) ខុសច្បាប់ ជាង ២០ ម៉ែត្រគូប ឃាត់រថយន្តកូរ៉េ ១គ្រឿង ប្រភេទ ២ តោនកន្លះ ក្បាលពណ៌ស ទ្រុងពណ៌ខៀវ ស្លាកលេខ ហ-០១២៤ ភព៣។ ម្ចាស់រថយន្ត ឈ្មោះ ហេង បូរ៉ា ភេទប្រុស អាយុ២២ឆ្នាំ រស់នៅភូមិពពិជ ឃុំចុងដូង ស្រុកបារាយណ៍។
យោងប្រភពព័ត៌មាន បានបង្ហើបអោយដឹងថា ផលអនុផលព្រៃឈើនេះ គឺដឹកជញ្ជូនចេញពីព្រៃសហគមន៍ ស្រែក្រសាំង ស្ថិតនៅភូមិក្រសាំង ឃុំទ្រា ស្រុកស្ទោង។
រថយន្តដឹកបទល្មើសខាងលើ រួមទាំងជនល្មើស ត្រូវបានកម្លាំងសមត្ថកិច្ចជំនាញកសាងសំណុំរឿង បញ្ជូនទៅសាលាដំបូងខេត្តកំពង់ធំ ដើម្បីចាត់ការបន្តតាមនីតិវិធី៕
