ក្រុងប៉ោយប៉ែត៖ កម្លាំងជំនាញនៃអធិការដ្ឋាន នគរបាលក្រុងប៉ោយប៉ែត ឃាត់ខ្លួនក្រុមចោរឆក់កូបូប ទូរស័ព្ទ យ៉ាងសកម្មចំនួន៣នាក់នៅក្រុងប៉ោយប៉ែត បញ្ជូនទៅជំនាញនគរបាលនៃស្នងការដ្ឋាននគរបាលខេត្តបន្ទាយមានជ័យ ចាត់ការបន្តតាមនីតិវិធី នៅរសៀលថ្ងៃទី២០ ខែមករា ឆ្នាំ២០២២។ លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែតបានប្រាប់ថា ក្រោមការបញ្ជាផ្ទាល់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលក្រុងប៉ោយប៉ែតបានចុះស្រាវជ្រាវមុខសញ្ញាក្រុមចោរឆក់ យ៉ាងសកម្មនៅក្រុងប៉ោយប៉ែត ឈានដល់ការឃាត់ខ្លួនជនសង្ស័យបានចំនួន៣នាក់រួមមាន៖ ទី១-ឈ្មោះ ខន វុទ្ធី ហៅ(ធី) ភេទប្រុស អាយុ២១ឆ្នាំ ជនជាតិខ្មែរ ឃាត់ខ្លួននៅថ្ងៃទី១៨ ខែមករា ឆ្នាំ២០២២ នៅចំណុច(អគារថ្មី) ស្ថិតនៅក្នុងភូមិ អូរជ្រៅ សង្កាត់/ ក្រុងប៉ោយប៉ែត ឆ្លើយសារភាពថា ខ្លួនធ្លាប់ធ្វើសកម្មភាពឆក់ជាមួយឈ្មោះ អាហុងហៅ(ចយ)បានប្រហែលចំនួន៦លើក។ ទី២-ឈ្មោះ សៀង ដែន ភេទប្រុស អាយុ១៤ ឆ្នាំជនជាតិខ្មែរ ឃាត់ខ្លួនបាននៅចំនុច ខាងជើងវត្តត្រាច ស្ថិតក្នុងភូមិក្បាលស្ពាន១ សង្កាត់និងក្រុងប៉ោយប៉ែត និងបានឆ្លើយសារភាពថា ខ្លួនធ្លាប់ធ្វើសកម្មភាពបានសម្រេច៤ដង។ ទី៣-ឈ្មោះ អេង អយ ភេទប្រុស អាយុ១៨ឆ្នាំ ជនជាតិខ្មែរ ស្នាក់នៅភូមិ មិត្តភាព សង្កាត់/ក្រុងប៉ោយប៉ែត ឃាត់ខ្លួនបាននៅជិតផ្ទះ និងបានឆ្លើយសារភាពថា នៅថ្ងៃទី១៨ ខែមករា ឆ្នាំ២០២២ វេលាម៉ោង២២យប់ ខ្លួនបានចេញធ្វើសកម្មភាពឆក់ មានគ្នា៦នាក់ ម៉ូតូ៣គ្រឿង ឈ្មោះ ចាន់ ណា ជាអ្នកឌុបខ្លួន ហើយខ្លួនជាអ្នកឆក់ទូរស័ព្ទមួយគ្រឿង។ លោកអធិការបញ្ជាក់ថា៖ ជនសង្ស័យទាំង៣នាក់ខាងលើនេះ ជាមុខសញ្ញាឆក់កាបូប និងទូរស័ព្ទយ៉ាងសកម្ម ដែលមានទីលំនៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ ហើយក្រុមជនសង្ស័យខាងលើនេះ ពិតជាដឹងភូមិសាស្ត្រក្រុងប៉ោយប៉ែតយ៉ាងច្បាស់ ពេលនេះកម្លាំងជំនាញកំពុងស្រាវជ្រាវស៊ើបអង្កេត រកជនសង្ស័យ ជាមុខសញ្ញាឆក់ នៅក្នុងភូមិសាស្រ្តក្រុងប៉ោយប៉ែតបន្តរទៀត៕ ដោយ: លោក ជួង វិសិដ្ឋ និពន្ធនាយក