កម្លាំងកងអាវុធហត្ថរាជធានីភ្នំពេញ ចុះបង្ក្រាបទីតាំងជល់មាន់២កន្លែង ឃាត់ខ្លួនអ្នកលេងបានចំនួន៨នាក់ ចាត់ការតាមនីតិវិធី.!!!
រាជធានីភ្នំពេញ៖ កាលពីសៀល ថ្ងៃទី១៧ ខែឧសភា ឆ្នាំ២០២២ សមត្ថកិច្ចជំនាញ នៃការិយាល័យប្រឆាំងបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ ០៨ នាក់ ទៅតុលាការ ដើម្បីផ្តន្ទាទោស ទៅតាមច្បាប់ ពាក់ព័ន្ធករណីលេងល្បែងភ្នាល់ ជល់មាន់ ខុសច្បាប់ បន្ទាប់ពីឃាត់ខ្លួនបានភ្លាមៗ ខណៈពេលពួកគេកំពុងតែធ្វើសកម្មភាពប្រមូលផ្តុំគ្នា ជល់មាន់ ភ្នាល់គ្នា ដាក់ប្រាក់ ដែលមានទីតាំងចំនួន២ ចំណុច៖ ទីតាំងទី១-ភូមិត្រពាំងថ្លឹង២ សង្កាត់ ចោមចៅ៣ ខណ្ឌពោធិ៍សែនជ័យ។ និងទីតាំងទី២-ស្ថិតនៅភូមិលូ សង្កាត់ស្វាយប៉ាក ខណ្ឌឫស្សីកែវ ។
ជនសង្ស័យទាំង០៨នាក់មានឈ្មោះដូចខាងក្រោម ៖
១-ឈ្មោះ ជ័យ ឌីណា ភេទប្រុស អាយុ ៤២ឆ្នាំ
២-ឈ្មោះ សេង ឆវី ភេទប្រុស អាយុ ៣៧ឆ្នាំ
៣-ឈ្មោះ ជូ ប៊ុនថន ភេទប្រុស អាយុ ២២ឆ្នាំ
៤-ឈ្មោះ សែម សំបូរ ភេទប្រុស អាយុ ៣៦ឆ្នាំ
៥-ឈ្មោះ កែវ ភក្តី ភេទប្រុស អាយុ ៣៧ឆ្នាំ
៦-ឈ្មោះ ភិន ប៊ុនលី ភេទប្រុស អាយុ ៣៥ឆ្នាំ
៧-ឈ្មោះ ង្វៀង យ៉ាំងតាំង ភេទប្រុស អាយុ ៤៣ឆ្នាំ
៨-ឈ្មោះ ហ្វាង ហ្វឹងជីវ ភេទប្រុស អាយុ ៤៥ឆ្នាំ
សមត្ថកិច្ចកងរាជអាវុធហត្ថបានអោយភ្ញាក់ងារសារព័ត៌មានយើងខ្ញុំដឹងថា៖ ការចុះបង្ក្រាបជាក់ស្តែង ទីតាំងសង្វៀនជល់មាន់ នៅទីតាំង២ចំណុចខាងលើនេះ កម្លាំងយើងបានចាប់យកវត្ថុតាងបានរួមមាន៖ មាន់ជល់ បានចំនួន ០៨ ក្បាល ក្នុងនោះ មាន់ងាប់០៦ក្បាល និងវត្ថុតាងផ្សេងៗ មួយចំនួនទៀតផងដែរ។ រីឯ ក្រុមអ្នកលេង ឃាត់ខ្លួនបានចំនួន០៨នាក់ ហើយ បានឆ្លើយសារភាពអោយដឹង ដូចៗគ្នាថា ពួកខ្លួន ពិតជាបានលួចលេងល្បែងភ្នាល់ ជល់មាន់ ខុសច្បាប់ ប្រាកដមែន៕
ដោយ: លោក ឈុន តុលា ប្រចាំភ្នំពេញ
