ខេត្តរតនគិរី៖ បើយោងបណ្ដាញប្រភពនៃព័ត៌មាន បានអោយដឹងថា៖ ថ្មីៗនេះមហាជនគ្រប់មជ្ឈដ្ឋានបាននាំគ្នារិះគន់ទៅលើលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក ញ៉ែម សំអឿន ដែលទើបតែឡើងមកកាន់តំណែងជាអភិបាលខេត្តរតនគិរីថ្មី ពាក់ព័ន្ធទៅនិងរឿងមេឈ្មួញឧក្រិដ្ឋកម្មកាប់បំផ្លាញព្រៃឈើឈ្មោះ មករា ដែលបច្ចុប្បន្ន មេឈ្មួញរូបនេះ កំពុងឡើងហ៊ុងស៊ុយខ្លាំង មមាញឹក ក្នុងការដឹកជញ្ជូនឈើ យ៉ាងសកម្ម ឆ្លងដែនចូលទៅលក់អោយមេឈ្មួញធំៗ នៅប្រទេសវៀតណាម តាមច្រកទ្វារអន្តរជាតិអូរយ៉ាដាវ បានយ៉ាងសុខស្រួល ដោយមិនរំខានដល់អាជ្ញាធរ មានសមត្ថកិច្ចជំនាញពាក់ព័ន្ធថ្នាក់ខេត្ត ធ្វើការបង្ក្រាបឡើយ,,,បែជានាំគ្នា ធ្វើជាដេកលក់ទៅវិញ!សង្ស័យខ្លាចបាត់ប្រាក់ចំណូលមិនស្របច្បាប់ហើយមើលទៅ.?។ ដោយឡែក បើយោងប្រភពពីមន្រ្តីម្នាក់ ប្រចាំការនៅច្រកទ្វារអន្តរជាតិអូរយ៉ាដាវ ដែលអត់លិឌ សុំមិនបញ្ចេញឈ្មោះ បានបង្ហើបអោយសារព័ត៌មានដឹងថា៖ មេឈ្មួញឈ្មោះ មករា ដឹកជញ្ជូនឈើទៅលក់នៅប្រទេសវៀតណាម តាមច្រកទ្វារអន្តរជាតិអូរយ៉ាដាវ មិនក្រោមពី៦ទៅ៧ រថយន្តទេ គឺដឹកបានដោយរលូន ព្រោះមេឈ្មួញឈ្មោះ មករា ម្នាក់នេះ មានអ្នកធំជាច្រើនរូប ជាអ្នកបើកភ្លើងខៀវនិងជាអ្នកសម្របសម្រួលនៅក្នុងខេត្តរតនគិរី។ ប្រភពបានអោយដឹងទៀតថា មេឈ្មួញឈើឈ្មោះ មករា ប្រើរថយន្តសាំយ៉ុង ៦ទៅ៧ គ្រឿង ដើម្បីដឹកជញ្ជូនឈើចេញទៅស្រុកយួន ហើយក្នុងមួយថ្ងៃៗ គេដឹកជញ្ជូនឈើចេញទៅស្រុកយួនមិនក្រោមពី៤ទៅ៥ជើងនោះទេ គឺដឹកបានយ៉ាងរលូន គ្មានមន្រ្តីជំនាញ​ណាម្នាក់ ហ៊ានប៉ះពាល់ លោក មករា នោះទេ។ រីឯ! ប្រធានមន្ទីរកសិកម្មខេត្តរតនគិរី និងមេរដ្ឋបាលព្រៃឈើខេត្តរតនគិរី វិញ នាំគ្នាសម្ងំស្ងាត់ឈឹង សង្ស័យត្រូវថ្នាំសន្តំហើយ បើ ទោះបីឈ្មួញឈើឈ្មោះ មករា ដឹកជញ្ជូនឈើទៅស្រុកយួន យ៉ាងពេញបន្ទុកក៏ដោយ មិនដែលឃើញបង្ក្រាបសោះ,,,ឃើញបង្ក្រាបបានតែឈ្មួញឈើ ដែលរកស៊ីតូចតាចតែប៉ុណ្ណោះ.!។ ប្រជាពលរដ្ឋ និងបងប្អូនជនជាតិភាគតិចដែលរស់នៅក្នុងខេត្តរតនគិរី សូមសំណូមពរ ទៅដល់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយុទ្ធពលខេមរ:ភូមិន្ន និងជាមេបញ្ជាការកងរាជអាវុធហត្ថលើផ្ទៃប្រទេស បង្ក្រាបធនធានធម្មជាតិ សូមឯកឧត្តម មេត្តាចាត់វិធានការ ដាក់កម្លាំងក្រោមឱវាទស៊ើបអង្កេត លើមេឈ្មួញជើងខ្លាំងឈ្មោះមករា រួមនិងបក្សពួក ដែលកំពុងតែកម្រើកឡើងវិញ ក្នុងសកម្មភាពដឹកជញ្ជូនឈើដោយខុសច្បាប់ ទៅលក់នៅស្រុកយួនយ៉ាងគំហ៊ុកខាងលើ ផងទាន សូមអរព្រះគុណ និងសូមអរគុណ៕