ខេត្តបន្ទាយមានជ័យ៖ បើយោងប្រភពពីមហាជន ដែលរស់នៅក្នុងខេត្តបានអោយដឹងថា៖ កាលពីវេលាម៉ោង៧ ឬ៨ព្រឹក កាលពីថ្ងៃទី១០​ ខែមិថុនា​ ឆ្នាំ២០២២​ ឃើញមាន កម្លាំងរាជអាវុធហត្ថខេត្ត បានចាប់ខ្លួនលោក គឹង វណ្ណ: អភិបាលរងនៃគណ:អភិបាលខេត្តបន្ទាយមានជ័យ លើដងផ្លូវធ្វើដំណើរទៅសាលាខេត្តបន្ទាយមានជ័យ ដែលជាកន្លែងលោកធ្វើការ តែពុំទាន់ដឹងមូលហេតុ។ បើយោងប្រភពផ្សេងគ្នាបានអោយដឹងថា៖ ការចាប់ខ្លួនលោក គឹង វណ្ណៈ អភិបាលរងខេត្តបន្ទាយមានជ័យ គឺមានមន្ត្រីកងរាជអាវុធហត្ថលើផ្ទៃប្រទេស សហការ ជាមន្ត្រីកងរាជអាវុធហត្ថខេត្ត តាមដីការបស់តុលាការ​ ពាក់ព័ន្ធការចេញសែកស្អុយ មិនមានសាច់ប្រាក់។ បើយោងប្រភពច្បាស់ការណ៍សុំមិនបញ្ចេញឈ្មោះបានអោយដឹងថា៖ លោក គឹង​ វណ្ណ:​ អភិបាលរងខេត្តបន្ទាយមានជ័យ​ ត្រូវជាប្អូនថ្លៃរបស់មន្ត្រីជាន់ខ្ពស់ម្នាក់​។ ប្រភពដដែលបានបញ្ជាក់ថា ក្រោយពីចាប់ខ្លួនភ្លាមៗ មន្ត្រីកងរាជអាវុធហត្ថលើផ្ទៃប្រទេស បាននាំខ្លួនលោកទៅកាន់រាជធានីភ្នំពេញ ហើយកំពុងតែមានអ្នកជួយអន្តរាគមន៍ ដើម្បីអោយបាននៅក្រៅឃុំ​ និងសម្របសម្រួលជាមួយដើមបណ្តឹង ដែលជាអ្នកកាន់សែកស្អុយ។ យោងតាមច្បាប់ស្ដីពីឧបករណ៍អាចជួញដូរបាន និងប្រតិបត្តិការទូទាត់ប្រាក់ ដែលរដ្ឋសភាអនុម័តនៅឆ្នាំ២០០៥ ប្រសិនបើតុលាការអោយឃើញថា លោក គឹង វណ្ណៈ ពិតជាចេញសែកស្អុយមែននោះ អាចប្រឈមមុខជាប់ពន្ធ និងពិន័យជាប្រាក់ផងដែរ។ -មាត្រ ២៣១ បានចែងថា «មិនបំពេញកាតព្វកិច្ចចំពោះឧបករណ៍អាចជួញដូរបាន នៅពេលដល់ឥណប្រតិទាន ដោយមានបំណង និងដោយមានចេតនាធ្វើអោយខូចប្រយោជន៍អ្នកដទៃ ត្រូវផ្តន្ទាទោសពិន័យជាប្រាក់ចំនួនពីរលាន ដល់ប្រាំមួយលានរៀល និងត្រូវផ្តន្ទាទោសជាប់ពន្ធនាគារពី១ឆ្នាំ ទៅ៣ឆ្នាំ ដោយមិនទាន់គិតដល់កាតព្វកិច្ចទូទាត់សងចំនួនប្រាក់នៃឧបករាណ៍អាចជួញដូរបាននោះទៅអ្នកកាន់»។ នៅព្រឹកថ្ងៃទី១១ ខែមិថុនា ឆ្នាំ២០២២នេះ សារព័ត៌មានយើងខ្ញុំបានទទួលប្រភពមួយចេញពីសាលាខេត្តបន្ទាយមានជ័យ មកថា ការឃាត់ខ្លួនលោក គឹង វណ្ណៈ ពិតជាមានមែន ហើយក៏អោយលោកត្រឡប់មកវិញដែរ តែពុំទាន់ដឹងពាក់ព័ន្ធករណីអ្វីមួយអោយប្រាកដនៅឡើយទេ។ ពាក់ព័ន្ធករណីខាងលើនេះ អ្នកសារព័ត៌មានមិនអាចសុំការបំភ្លឹពីលោក​ គឹង វណ្ណៈ ឬតំណាងណាមួយបាននៅឡើយទេ នៅព្រឹកថ្ងៃទី១១ ខែមិថុនា ឆ្នាំ២០២២នេះ ហើយសារព័ត៌មានយើងខ្ញុំរងចាំបកស្រាយពីសាមីខ្លួនដែលជាប់ពាក់ព័ន្ធរៀងរាល់ម៉ោងធ្វើការការិយាល័យនិពន្ធ ឬតាមរយៈលេខទូរស័ព្ទអង្គភាពផ្ទាល់ចំនួនពីរខ្សែ៖ ☎️Tell.092190098/☎️Tell 0886606773 សូមអរគុណ៕