ខេត្តបន្ទាយមានជ័យ៖ កាលនៅថ្ងៃច័ន្ទ ៧កើត ខែជេស្ឋ ឆ្នាំខាល ចត្វាស័ក ព.ស២៥៦៦ ត្រូវនិងថ្ងៃទី០៦ ខែមិថុនា ឆ្នាំ២០២២ វេលា១០និង៣០នាទី កម្លាំងជំនាញផែនព្រហ្មទណ្ឌ បានទទួលបណ្តឹងពីជនរងគ្រោះឈ្មោះ ហូបាងថាញ់ (HOBANG THANH) ភេទស្រី អាយុ៣២ឆ្នាំ ជាជនជាតិវៀតណាម ស្នាក់នៅបុរីដួងច័ន្ទ ភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បានប្តឹងរាយការណ៍ថា៖កាលពីយប់ថ្ងៃទី០៥ ខែមិថុនា ឆ្នាំ២០២២ វេលាម៉ោង២៤និង៤០ នាទី ឈានចូល ថ្ងៃទី ០៦ ខែមិថុនា ឆ្នាំ២០២២ រូបគាត់ (ហូបាងថាញ់) បានជួលម៉ូតូផាសអាប់ជិះចេញពីបុរីដួងច័ន្ទ ទៅខារ៉ាអូខេអេហ្វផា្លស ហើយដកទូរស័ព្ទកាន់ចុចនឹងដៃ ម៉ាក IPhone12pro Max ពណ៌ទឹកសមុទ្រ។ នារីរងគ្រោះបានអោយ សមត្ថកិច្ចនគរបាលក្រុងប៉ោយប៉ែតដឹងថា ពេលកំពុងតែធ្វើដំណើរតាមផ្លូវ ក៏ស្រាប់តែមានជនសង្ស័យចំនួន០២នាក់ ភេទប្រុស ជិះម៉ូតូ០១គ្រឿង មកពីក្រោយ ហើយឆក់ កន្ត្រាក់យកទូរស័ព្ទចេញពីដៃ បណ្តាលអោយ ឈ្មោះ ហូបាងថាញ់ ធ្លាក់ពីលើផាសអាប់ រងរបួសបែកមុខ(ដេរជាច្រើនថ្នេរ)។ បន្ទាប់ពីបានទទួលព័ត៌មានភ្លាមកម្លាំងជំនាញបានចុះស្រាវជ្រាវ ឈានដល់ការនាំខ្លួនឈ្មោះ សឿន ពិសី ភេទប្រុស អាយុ២៦ឆ្នាំ ស្នាក់នៅភូមិមិត្តភាព សង្កាត់/ក្រុងប៉ោយប៉ែត ខេត្តបន្ទាយមានជ័យ ជាអ្នកទទួលទិញទូរស័ព្ទ ដែលជនល្មើសឆក់បាន ហើយបានដកហូតទូរស័ព្ទបានចំនួន២គ្រឿង របស់ជនរងគ្រោះ ដើម្បីប្រគល់ជូនម្ចាស់វិញ ។ លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យសារព័ត៌មានយើងដែរថា ក្រោយពីបានស្រាវជ្រាវកំលាំងជំនាញលោកបានឃាត់ខ្លួនជនសង្ស័យនិងបក្សពួកចំនួន០៦នាក់ ស្រីម្នាក់ ប្រពន្ធជនដៃដល់ ថោង ហាំង ហៅហាក់ឈ្មោះ ដូចខាងក្រោម៖ ១/ឈ្មោះ ថោង ហាំងហៅហាក់ ភេទប្រុស អាយុ១៦ឆ្នាំ ជនជាតិខ្មែរមុខរបរកម្មករ(ជនដៃដល់) ២/ឈ្មោះ ហុង ចាន់ឌី ភេទប្រុស អាយុ១៦ឆ្នាំមុខរបរកម្មករ (អ្នកបិតគូទ)ពេលឆក់បាន ។ ៣/ឈ្មោះ ស៊ុន លាភ ភេទប្រុស អាយុ១៦ឆ្នាំ មុខរបរកម្មករបក្សពួក ៤/ឈ្មោះ អូន សាវ័ន ភេទប្រុស អាយុ១៦ឆ្នាំមុខរបរកម្មករ បក្សពួក ៥/ឈ្មោះ សែត សុខជា ភេទប្រុស អាយុ១៥ឆ្នាំ មុខរបរកម្មករ បក្សពួក ៦/យឿម ណារី ភេទស្រី អាយុ១៧ឆ្នាំ ប្រពន្ធជនដៃដល់ជាបក្សពួកនិងផ្សំគំនិត ៧/ឈ្មោះ សឿន ពិសី (ហៅសី) ភេទប្រុស អាយុ២៦ឆ្នាំ ជនជាតិខ្មែរ មុខរបរទទួលបញ្ចាំ ទទួលទិញ និង ជួសជុលទូរស័ព្ទ។ លោកអធិការបន្តអោយដឹងថា៖ ក្រោយបានសាកសួរកំលាំងជំនាញឈានដល់ការឃាត់ខ្លួនជនសង្ស័យ២នាក់ទៀត ១/ឈ្មោះ ផឹង អូនរាជ ភេទប្រុសអាយុ១៧ឆ្នាំមុខរបរគ្មាន អ្នកបើកម៉ូតូធ្វើសកម្មភាពឆក់ ។ ២/ឈ្មោះ សែត គឹមហេង (ហៅប្រេម) ភេទប្រុស អាយុ១៦ឆ្នាំមុខរបរគ្មានអ្នកបើកម៉ូតូធ្វើសកម្មភាពឆក់ ។ ក្នុងករណីបង្ក្រាបនេះដែរ កម្លាំងជំនាញក្រុងបានដកហូតម៉ូតូជិះធ្វើសកម្មភាពចំនួន៤គ្រឿង ក្នុងនោះរួមមាន Dream c125 ព័ណខ្មៅ២គ្រឿង,អឹមស្លះ ១គ្រឿងនិង MSX ១គ្រឿង, កាំបិតចំនួន៥ដើម សាម៉ូរ៉ៃ៣ដើម និងកាំបិតខ្វែវ២ដើម ។ បច្ចុប្បន្ន: កម្លាំងជំនាញអធិការដ្ឋាននគរបាល ក្រុងប៉ោយប៉ែត ស្នើរសុំឃាត់ខ្លួនជនទាំង០៩នាក់ខាងលើ ដើម្បីកសាងសំណុំរឿងបញ្ជូនបន្តតាមនីតិវិធី៕ ដោយ: លោក ជួង វិសិដ្ឋ និពន្ធនាយក គេហទំព័រ ប៉ោយប៉ែត ប៉ុស្តិ៍ www.poipetpostnews.com