ភ្នំពេញ៖ មានសេចក្តីរាយការណ៍ពីប្រជាពលរដ្ឋក្នុងមូលដ្ឋានមកថា ទីតាំងល្បែងស៊ីសងខុសច្បាប់(អាប៉ោង) កំពុងប្រមូលផ្ដុំគ្នាលេងភ្នាល់ដាក់លុយយ៉ាង គគ្រឹកគគ្រេង នៅចំណុចការ៉ាស់លាងឡាន(ថ្មីជានិច្ច) ស្ថិតនៅផ្លូវលេខ ៧៥ សង្កាត់ស្រះចក ខណ្ឌដូនពេញ រាជធានីភ្នំពេញ តែពុំទាន់ឃើញសមត្ថកិច្ចចុះមកបង្ក្រាបនៅឡើយទេ សង្ស័យជាឆ្នាំងបាយអាជ្ញាធរមានសត្ថកិច្ចក្នុងមូលដ្ឋានអស់ហើយមើលទៅ។ ប្រភពពីប្រជាពលរដ្ឋក្នុងមូលដ្ឋានបានបន្តថា៖ ទីតាំងការ៉ាស់លាងឡាន(ថ្មីជានិច្ច) គេបើកលេងចាប់ពីម៉ោង១២ថ្ងៃត្រង់ រហូត​ដល់​ម៉ោង​៥ល្ងាច ហើយលេងទឹកលុយធំៗណាស់ គឺលេងលំដាប់ VIP ។ ប្រភពដដែលបានបញ្ជាក់ថា៖ ទីតាំងលេងល្បែង អាប៉ោង ស៊ីសងខុសច្បាប់ ក្នុងការ៉ាស់លាងឡាន(ថ្មីជានិច្ច) មហាជនក៏ធ្លាប់ឃើញ សមត្ថកិច្ចខណ្ឌដឹកនាំកម្លាំចុះមកបង្ក្រាប និង អោយម្ចាស់ទីតាំងធ្វើកិច្ចសន្យាម្តងរួចមកហើយ កាលពីថ្ងៃទី៩ ខែកុម្ភះ ឆ្នាំ២០២២ កន្លងថ្មីៗនេះ។ ប្រជាពលរដ្ឋស្នើសុំអោយសារព័ត៌មានយើងខ្ញុំ ធ្វើការចុះផ្សាយរិះគន់ក្នុងន័យស្ថាបនា ដើម្បីអោយព័ត៌មានមួយនេះ បានដល់ លោក សុខ ពេញវុធ អភិបាលខណ្ឌដូនពេញ និង លោក ទៀង ចន្ទសា អធិការនគរបាលខណ្ឌ បានដឹង បានជ្រាប និងធ្វើការទប់ស្កាត់ទីតាំងល្បែងស៊ីសងខុសច្បាប់ខាងលើនេះអោយខានតែបាន ដើម្បីភូមិឃុំមានសុវត្តិភាពទាំង ៧ ចំណុច របស់ក្រសួងមហាផ្ទៃ។ អាស្រ័យហេតុនេះ ប្រជាពលរដ្ឋសំណូមពរទៅដល់ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និង ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគបាលជាតិ សូមឯកឧត្តមទាំងពីរ មេត្តាចាត់មន្ត្រីជំនាញនៃគណៈបញ្ជាការឯកភាពចុះស្រាវជ្រាវ និង ធ្វើការបង្ក្រាបទាន់ពេលវេលាផងទាន៕ ដោយ: លោក សេង រ័ត្ន និពន្ធនាយករង