តុលាការសម្រេចឃុំខ្លួន លោក ស៊ឹង ប៊ុណ្ណាក្រោយផ្ទុះអាវុធ៤គ្រាប់ កាលពីយប់ថ្ងៃទី៣០.!!!
ខេត្តសៀមរាប៖ សាលាដំបូងខេត្តសៀមរាបបានសម្រេចបញ្ជូនលោកស៊ឹងប៊ុណ្ណាដែលមានងារជាឧកញ៉ាទៅឃុំខ្លួនបណ្ដោះអាសន្ន ក្រោយករណីផ្ទុះអាវុធ៤គ្រាប់ នៅគេហដ្ឋានរបស់លោកនៅក្រុងសៀមរាប។ លោក ស៊ឹង ប៊ុណ្ណា ដែលជាអ្នកជំនួញដ៏មានឥទ្ធិពលម្នាក់ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប ឃាត់ខ្លួននិងបញ្ជូនទៅតុលាការនៅល្ងាចថ្ងៃទី៣១ ខែកក្កដា ពាក់ព័ន្ធករណីប្រើប្រាស់អាវុធខុសច្បាប់ ដោយបាញ់បោះចំនួន៤គ្រាប់ នៅក្នុងផ្ទះ។
មូលហេតុ ត្រូវបានអះអាងថា ដោយសារខឹងប្រពន្ធ ដើរលេងយប់ជ្រៅពេក។
តាមរបាយការណ៍របស់សមត្ថកិច្ច ករណីផ្ទុះអាវុធកើតឡើងវេលាម៉ោង២៣និង០០នាទី នាថ្ងៃទី៣០ ខែកក្កដា ភ្លាមៗសមត្ថកិច្ចបានទៅដល់កន្លែងកើតហេតុ និងសម្របសម្រួលដោយ លោក ថេង សំណាង ព្រះរាជអាជ្ញារងខេត្តសៀមរាប ដោយមានឡោមព័ទ្ធទីតាំងកើតហេតុ ដែលស្ថិតនៅបរិវេណខាងក្រោយអតីតសណ្ឋាគារឡឺមេរឺឌាន។
តាមការបំភ្លឺពី ឈ្មោះ ប៊ុន សុគន្ធតា ត្រូវជាប្រពន្ធជនសង្ស័យ បានបំភ្លឺថា មានករណីផ្ទុះអាវុធចំនួន០៤គ្រាប់ពិតប្រាកដមែន បង្កឡើងដោយប្ដីរបស់គាត់ឈ្មោះ ស៊ឹង ប៊ុណ្ណា ជាអ្នកបាញ់ ដោយមូលហេតុ ខឹងនឹងរូបគាត់ត្រឡប់មកផ្ទះយប់ជ្រៅ។ លុះដល់ព្រឹកថ្ងៃទី៣១ ខែកក្កដា សមត្ថកិច្ចបានធ្វើការឃាត់ខ្លួនជនសង្ស័យឈ្មោះ ស៊ឹង ប៊ុណ្ណា ភេទប្រុស អាយុ៤៧ឆ្នាំ មានទីកំណើត នៅខេត្តកំពង់ស្ពឺ បច្ចប្បន្នស្នាក់នៅក្រុមទី០៦ ភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ពីបទប្រើប្រាស់អាវុធខុសច្បាប់ និងដកហូតអាវុធខ្លីចំនួន ០១ដើម ម៉ាកK59 បង់ចំនួន០២ (បង់មួយមានចំនួន០៦គ្រាប់ និងបង់មួយទៀតគ្មានគ្រាប់) គ្រាប់មិនទាន់ប្រើចំនួន០៧គ្រាប់ និងសំបកគ្រាប់ដែលបាញ់រួចចំនួន០៣គ្រាប់៕
