ខេត្តបាត់ដំបង៖ ថ្មីៗនេះបែកធ្លាយរឿងអាស្រូវ លោកស្រីឧត្តមសេីយ៍ត្រី ស៉ឹម សុខុន មន្ដ្រីពន្ធនាគារខេត្តបាត់ដំបង ត្រូវបានប្រជាពលរដ្ឋ ១១គ្រួសារ រស់នៅភូមិឆករកា ឃុំសំឡូត ស្រុកសំឡូត ខេត្តបាត់ដំបង បានដាក់ពាក្យបណ្ដឹងរួមគ្នា ប្តឹងទៅសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សុំជួយអន្តរាគមន៍ រឿងបោកលុយជាង៩ម៉ឺនដុល្លារ ដើម្បីរត់ការចូលក្របខ័ណ្ឌមន្ដ្រីនគរបាលជាតិ។ នៅក្នុងពាក្យបណ្តឹង រៀបរាប់ជូនសម្ដេចក្រឡាហោម ស ខេង ថា កាលពីថ្ងៃទី២៨ ខែមីនា ឆ្នាំ២០២១ យើងខ្ញុំទាំង១១នាក់ បានយកថវិកាទៅប្រគល់ជូនលោកស្រី ស៊ឹម សុខុន នៅគេហដ្ឋានរបស់លោកស្រីផ្ទាល់ ដោយមាន លោក ម៉ៅ ណាត លោកប្រាជ្ញ សុវណ្ណមន្នី និងលោក ម៉ៅ សំរេច ជាអ្នកបានឃើញ យើងខ្ញុំទាំង១១នាក់ ជួបប្រគល់ថវិកាទៅលោកស្រីពិតប្រាកដមែន ដោយគាត់សន្យា និងជួយរត់ការប្រឡងចូលក្របខណ្ឌមន្ត្រីនគរបាលជាតិ ប្រសិនបើមិនបាន គាត់និងប្រគល់ថវិកាជូនវិញគ្រប់ចំនួន ដោយគាត់អះអាងថា គេនិងរើសចេញពីជួរយុវជន គណបក្សប្រជាជនកម្ពុជា។ ក្រោយពេល ដល់ថ្ងៃកំណត់ប្រឡងរួចតែលទ្ធផល មិនបានជាប់ដូចការសន្យា ទើបយើងខ្ញុំទាំងអស់គ្នាសម្រេចចិត្ត សុំដកយកថវិកាមកវិញ តែរយ:ពេលមួយឆ្នាំហើយមិនព្រមអោយ យើងខ្ញុំសម្រេចចិត្តដាក់ពាក្យបណ្តឹងទៅ សាលាខេត្តបាត់ដំបង ហើយអភិបាលរងនៃគណៈអភិបាលខេត្ត បានព្យាយាមដោះស្រាយចំនួន៣លើក តែមិនបានថវិកាមកវិញ។ ទើបយើងខ្ញុំសម្រេចចិត្តដាក់ពាក្យបណ្តឹងជូនសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជួយដោះស្រាយ និងរកយុត្តិធម៌ ជូនយើងខ្ញុំអោយបានថវិកាគ្រប់ចំនួន៩៤,៧០០ដុល្លារអាមេរិក មកវិញផងតាមឈ្មោះ និងចំនួនថវិកាដូចតារាងជូនភ្ជាប់។ សេចក្ដីដូចបានគោរពជម្រាបជូនខាងលើសូម សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ មេត្តាពិនិត្យ និងសម្រេចដោយសេចក្ដីអនុគ្រោះ។ ពាក់ព័ន្ធបញ្ហាខាងលើនេះ ធ្វើអោយមហាជនគ្រប់មជ្ឈដ្ឋានទូទៅបានលើកឡើងថា បើយើងមិនមានសមត្ថភាពក្នុងការប្រលងចូលមន្ត្រីនគរបាលជាតិទេ កុំប្រើ យុទ្ធសាស្ត្រ ឬប្រើ វប្បធម៌ក្នុងការរត់ការ ដែលនេះជាអំពើខុសច្បាប់ ហើយគឺជាទម្រង់នៃការប្រព្រឹត្តអំពើពុករលួយ មានន័យថាអ្នកសូកប៉ាន់គេ និងអ្នកទទួលសំណូក សុទ្ធតែមានទោសដូចគ្នា បញ្ហានេះសង្ឃឹមថា អង្គភាពប្រឆាំងអំពើពុករលួយ ដែលហៅកាត់ថា ACU សូមអោយមានការបើកការស៊ើបអង្កេត ពាក់ព័ន្ធករណីខាងលើ ទាំងមន្ត្រីជាន់ខ្ពស់ នៃពន្ធនាគារខេត្តបាត់ដំបង និងអ្នករត់ការទាំង១១នាក់នោះ៕