ករណីឃាតកម្មផ្ទុះអាវុធជាច្រើនគ្រាប់នៅផ្ទះជនរងគ្រោះកាលពីរសៀលម្សិលមិញនេះត្រូវបានលាតត្រដាង ព្រោះតែរឿងកប់ផ្នូរលើដីរបស់គាត់ ដែលជនសង្ស័យ ត្រូវជា (ប្អូនជីទួតមួយនិងគ្នា)។ សមត្ថកិច្ចប៉ុស្តិ៍នគរបាលរដ្ឋបាលស្រម៉រ បានអោយដឹងថា៖ មុនពេលកើតហេតុ ជនរងគ្រោះបានទាក់ទងទៅជនសង្ស័យ ដែលជាប្អូនជីទួតមួយ អោយមកពិភាក្សាគ្នាពាក់ព័ន្ធនឹងរឿងផ្នូរដែលបានកប់លើដីរបស់គាត់។ ក្រោយមកជនសង្ស័យបានបើករថយន្តទៅដល់ផ្ទះជនរងគ្រោះពិភាក្សាគ្នាតែមិនត្រូវគ្នា ក៏មានការឈ្លោះប្រកែកពាក្យសំដី ជនសង្ស័យ បានស្ទុះទៅដាល់ជនរងគ្រោះចំផ្ទៃមុខមួយដៃ រួចដកកាំភ្លើងខ្លីពីចង្កេះបាញ់រះចំនួន ៥ទៅ៦គ្រាប់ ទៅលើជនរងគ្រោះ បណ្ដាលអោយជនរងគ្រោះ របួសចំប្រអប់ដៃខាងស្ដាំ និងប្រពន្ធត្រូវចំខ្ទង់ច្រមុះ បណ្ដាលឱ្យស្លាប់ភ្លាមៗនៅនឹងកន្លែងកើតហេតុ។ ក្រោយធ្វើសកម្មភាពខ្មាន់កាំភ្លើង បានបើករថយន្តគេចខ្លួនបាត់។ សមត្ថកិច្ចបានបញ្ធាក់ថា៖ ជនរងគ្រោះទាំងពីរនាក់ប្តីប្រពន្ធមានឈ្មោះ៖ ឈ្មោះ ផុន សុភ័ណ្ឌ រងរបួសធ្ងន់(ត្រូវជាប្តី)។ ឈ្មោះ ជិន ចាន់ណា ស្លាប់(ត្រូវជាប្រពន្ធ)។ សង្ស័យមានឈ្មោះ ឆេង សេង ហៅធីវ (ខ្មាន់កាំភ្លើង កំពុងរត់គេចខ្លួន) ខណៈនេះកម្លាំងសមត្ថកិច្ចជំនាញស្រុកជើងព្រៃ កំពុងសហការជាមួយកម្លាំងប៉ុស្តិ៍នគរបាលស្រម៉រ ធ្វើការស្រាវជ្រាវបន្ត ដើម្បីយកមកផ្តន្ទាទោសតាមច្បាប់។ សមត្ថកិច្ចបន្តអោយដឹងថា៖ ហេតុការណ៍ខាងលើ កើតឡើងនៅភូមិអណ្ដូងត្រាំង ឃុំស្រម៉ ស្រុកជើងព្រៃ ខេត្តកំពង់ចាម កាលពីវេលាម៉ោង១២និង០០នាទី ថ្ងៃទី១១ ខែឧសភា ឆ្នាំ២០២៣។ រីឯជនសង្ស័យក្រោយធ្វើសកម្មភាព បានបើករថយន្តម៉ាក ព្រូស PRiUS ផ្លាកលេខ ភ្នំពេញ 2BL-8356 គេចខ្លួន ហើយបើករថយន្តនោះទៅផ្លុងចោលនៅក្នុងវត្តចាន់មលី ស្ថិតនៅភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម៕