ស្រុកជីក្រែង ខេត្តសៀមរាប៖ ផ្ទះសង់ថ្មីមួយកន្លែង ដែលត្រូវជាកូន លោក ឡឹក ស៊ូ មេភូមិត្រពាំងភ្លោះ ទើបគាត់ហ៊ានបំពានលើច្បាប់ចាក់ដីលប់ដៃមាត់បឹងអូររមាស ដែលទីតាំងនោះស្ថិតនៅភូមិត្រពាំងភ្លោះ ឃុំពង្រលើ ស្រុកជីក្រែង ហើយដីនោះទៀតសោត ជាដីបឹងតំបន់អភិរក្សរបស់រដ្ឋ មិនតែប៉ុណ្ណោះ កូនលោកមេភូមិ ហ៊ានចាក់ដីបន្តលប់លូស្ពានបង្ហូរទឹករបស់រដ្ឋថែមទៀតផង ដើម្បីយកដីជំុវិញនោះ ធ្វើជាកម្មសិទ្ធិផ្ទាល់ខ្លួនរស់បានយ៉ាងសុខស្រួល ទាំងដែលឪពុកខ្លួនឈ្មោះ ឡឹក ស៊ូ ជាមេភូមិត្រពាំងភ្លោះ តើអាជ្ញាធរមានសមត្ថកិច្ចជំនាញពាក់ព័ន្ធក្នុងមូលដ្ឋានបានជ្រាបរឿងនេះហើយឬនៅ ឬក៏បានដឹងហើយ ទើបនាំគ្នារក្សាភាពស្ងៀមស្ងាត់អស់រយ:ពេលជាច្រើនខែមកដល់បច្ចុប្បន្ននេះ ដោយគ្មានចំណាត់ការទប់ស្កាត់ទៅលើលោក ឡឹក ស៊ូ មេភូមិត្រពាំងភ្លោះសោះ សង្ស័យបានទទួលសំណូកពីលោក ឡឹក ស៊ូ អស់ហើយរឺ.?។ សូមបញ្ជាក់ផងដែរថា៖ កាលពីម្សិលមិញត្រូវនឹងថ្ងៃទី១៦ ខែឧសភា ឆ្នាំ២០២៣ ក្រុមសារព័ត៌មានជាច្រើនអង្គភាពបានចុះទៅដល់ទីតាំងផ្ទះដែលបានសាងសង់នៅត្រង់ចំណុចចុងស្ពានបឹងអភិរក្សអូររមាស ឃើញថាមានការចាក់ដីលប់មាត់បឹងអូររមាស និងចាក់ដីលប់ស្ពានបិទលូបង្ហូរទឹករបស់រដ្ឋមួយកន្លែង នៅប៉ែកខាងជើងចុងស្ពាន ពិតប្រាកដ ដូចដែលប្រភពពីប្រជាពលរដ្ឋដែលរស់នៅក្នុងភូមិសាស្ត្រនោះរាយការណ៍មែន,,,ដែលទីតាំងនោះស្ថិតជាប់ចំណុចចុងស្ពាន បឹងអូររមាស ដែលជាតំបន់អភិរក្ស ចម្ងាយប្រហែល៥០ម៉ែត្រ ក្នុងភូមិ ត្រពាំងផ្លោះ ឃុំពង្រលើ ស្រុកជីក្រែង ខេត្តសៀមរាប។ បើយោងតាមប្រភពច្បាស់ការមួយពីប្រជាពលរដ្ឋដែលរស់នៅទីនោះបានបង្ហើបប្រាប់ក្រុមអ្នកសារព័ត៌មានយើងខ្ញុំឲ្យដឹងថា៖ ម្ចាស់ដីនោះគាត់ហ៊ានចាក់ដីលប់រំលោភយកដីរដ្ឋក៏ព្រោះតែគាត់អាងខ្លួនជាកូន លោក ឡឹក ស៊ូ មានតួនាទីជាមេភូមិ ត្រពាំងភ្លោះ និងជាប្រធានសហគមន៍ អភិរក្ស បឹងអូររមាសមួយរូបផងដែរ។ ប្រភពបន្ថែមថា៖ បឹងអភិរក្សអូររមាស ជាតំបន់អភិរក្ស គ្មានប្រជាពលរដ្ឋ និងមន្ត្រីរាជការរូបណា ហ៊ានទៅរំលោភសាងសង់យកធ្វើជាកម្មសិទ្ធិផ្ទាល់ខ្លួននោះទេ ព្រោះតំបន់នេះគឺជារបស់រដ្ឋ ហើយក៏ជាសម្បត្តិរួមផងដែរ និងទៅថ្ងៃខាងមុខតំបន់រមណីយដ្ឋានមួយនេះអាជ្ញាធរ និងកែលម្អ អភិវឌ្ឃន៍ ទៅជាតំបន់កម្សាន្តមួយ ទាក់ទាញភ្ញៀវជាតិ និងភ្ញៀវអន្តរជាតិ មកទស្សនាលេងកម្សាន្តនៅស្រុកជីក្រែងយើងផងដែរ។ នៅរសៀលថ្ងៃទី១៧ ខែឧសភា ឆ្នាំ២០២៣ ក្រុមអ្នកសារព័ត៌មានយើងខ្ញុំ បានខលទំនាក់ទំនងទៅលោក ឡឹក ស៊ូ ដែលជាមេភូមិត្រពាំងភ្លោះ លោកបានបកស្រាយតាមទូរស័ព្ទថា ក្នុងការចាក់ដីនិងសង់ផ្ទះ លោកបានប្រាប់ទៅមន្ត្រីបរិស្ថានអស់ហើយ ព្រោះដីនោះ ជាដីរបស់ខ្ញុំ ហើយខាងបរិស្ថាន ក៏បានអនុញ្ញាតដែរ តែខ្ញុំមិនបានស្នើសុំទៅដល់មន្ត្រីធនធានទឹក និងលោកអភិបាលស្រុកជីក្រែង ទេ។ ប្រជាពលរដ្ឋដែលរស់នៅភូមិត្រពាំងភ្លោះ សូមស្នើអោយលោកអភិបាលស្រុកជីក្រែង និងមន្ត្រីធនធានទឹក សូមមានចំណាត់ការ បើកកិច្ចសហការ ចុះត្រួតពិនិត្យ នៅចំណុចទីតាំងខាងលើ និងចាត់វិធានការទៅលើលោក ឡឹក ស៊ូ ម្ចាស់ផ្ទះនោះតាមច្បាប់ ដើម្បីជាការព្រមានដល់ជនដទៃទៀត (ព្រោះនេះជាបញ្ហានៃដើមចម)។ ជាចុងក្រោយប្រជាពលរដ្ឋសូមសំណូមទៅដល់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងជាប្រធានគណៈបញ្ជាការឯកភាពខេត្ត សូមឯកឧត្តមមេត្តាចាត់កម្លាំងមន្ត្រីជំនាញថ្នាក់ខេត្តចុះបើក ការស៊ើបអង្កេតក្នុងករណីខាងលើអោយបានស៊ីជម្រៅផងទាន។ អង្គភាពយើងខ្ញុំចុះផ្សាយទៅនេះរិះគន់ក្នុងន័យស្ថាបនា មិនបង្អាប់បង្អោន ឬជាន់ពន្លិចអោយបុគ្គលណាម្នាក់រើសអើងឡើយ ហើយអង្គភាពយើងខ្ញុំរង់ចាំស្រាយបំភ្លឺឡើងវិញរៀងរាល់ម៉ោងធ្វើការ បើសាមីខ្លួនដែលជាប់ពាក់ព័ន្ធគិតថា ការចុះផ្សាយមួយនេះមិនសុក្រិត និងយុត្តិធម៌ សម្រាប់ខ្លួនទេនោះ៕