មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ សៀមរាប កំពុងរង់ចាំពិនិត្យព្យាបាលជំងឺកុមារប្រមាណ ៧០០នាក់
ខេត្តសៀមរាប៖ នៅមន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប កំពុងរង់ចាំពិនិត្យព្យាបាលជំងឺកុមារប្រមាណ ៧០០ នាក់ ក្នុងនោះក៏មានកុមារ ២,៣០០ នាក់ទៀតកំពុងសម្រាកព្យាបាលក្នុងមនមន្ទីរពេទ្យ។
បើយោងតាមរយៈផេកហ្វេសប៊ុក Dr.beat Richner បានបង្ហោះព្រឹកនេះអោយដឹងថា នាថ្ងៃអាទិត្យ ទី៣០ ខែកក្កដា ឆ្នាំ២០២៣ ដែលជាថ្ងៃឈប់សម្រាក នៅមន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ក្នុងខេត្តសៀមរាប មានកុមារច្រើនជាអតិបរមាប្រមាណ ៧០០ នាក់ កំពុងរង់ចាំពិនិត្យព្យាបាលនៅផ្នែកពិគ្រោះជំងឺក្រៅ។ ដោយឡែក ចំពោះកុមារចំនួន ២,៣០០ នាក់ ទៀត កំពុងសម្រាកព្យាបាលក្នុងមន្ទីរពេទ្យ (inpatients)។
មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប បានអរគុណដល់បុគ្គលិកយាមប្រចាំការថ្ងៃឈប់សម្រាកចំនួន ១ ភាគ ៤ នៃបុគ្គលិកទាំងអស់ ដែលខិតខំបំពេញការងារយ៉ាងនឿយហត់ ប្រកបដោយវិជ្ជាជីវៈ។
ជាមួយនោះ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប ក៏បានអរគុណមូលនិធិគន្ធបុប្ផាស្វីស (KFS) និងមូលនិធិគន្ធបុប្ផាកម្ពុជា (CKF) ព្រមទាំងសប្បុរសជនគ្រប់ៗរូប ដែលតែងតែឧបត្ថម្ភគាំទ្រដំណើរការ នៃមន្ទីរពេទ្យគន្ធបុប្ផា។
សូមជម្រាបថា រាល់ការព្យាបាលទាំងអស់ គឺ ឥតគិតថ្លៃសម្រាប់គ្រប់ៗគ្នា ដោយគ្មានការរើសអើងឡើយ៕
ដោយ: ហៀប ចាន់ថា ប្រចាំខេត្តសៀមរាប
