ព័ត៌មានអន្តរជាតិ៖ ចាប់តាំងពី ព្រះមហាក្សត្រព្រះបាទ Maha Vajiralongkorn តែងតាំងលោក ស្រេតថា ថាវីស៊ីន (Srettha Thavisin) ជា​នាយក​រដ្ឋមន្ត្រី​ទី​៣០ របស់ប្រទេសថៃជាផ្លូវការ ព័ត៌មានផ្ទាល់ខ្លួនមួយចំនួន និងមនុស្សពាក់ព័ន្ធនឹងនាយករដ្ឋមន្ត្រីរូបនេះ ត្រូវគេតាមដាន និងជីកកកាយ សឹងគ្មានចន្លោះ។ ចំពោះកូនស្រីពៅរបស់លោក ស្រេតថា ត្បិតថាមានវ័យក្មេងនៅឡើយ ប៉ុន្តែស្រ្តីរូបនេះគឺជាសេដ្ឋីនីលំដាប់ប្រទេស ព្រោះកាន់កាប់អាជីវកម្មរាប់ពាន់លានបាតនៅក្នុងដៃ ចំណែកឯការសិក្សាក៏មានប្រវត្តិខ្ពស់ថែមទៀត។ បច្ចុប្បន្ន​ ចាណាន់ដា ថាវីស៊ីន គឺជា CEO និងជានាយិកា Sansiri ដែលជាក្រុមហ៊ុនអចលនទ្រព្យដ៏បំផុតមួយនៅក្នុងប្រទេសថៃ ខណៈតម្លៃភាគហ៊ុនមានតម្លៃដល់ទៅរាប់ពាន់លានបាតឯណោះ។ រីឯការអប់រំវិញ ចាណាន់ដា បានបញ្ចប់ថ្នាក់បរិញ្ញាបត្រផ្នែកប្រសាទវិទ្យា នៅមហាវិទ្យាល័យ Barnard និងបានបន្តថ្នាក់អនុបណ្ឌិតផ្នែកគ្លីនិកផ្តោតលើគ្រួសារ យុវជន និងកុមារ នៅសាកលវិទ្យាល័យ Columbia សហរដ្ឋអាមេរិក។ ជាមួយគ្នានោះ សមាជិកគ្រួសាររបស់លោក ស្ត្រេតថា ក៏ត្រូវបានបណ្ដាញអ្នកសារព័ត៌មានតាមស្វែងរក និងទម្លាយប្រវត្តិខ្លះៗរបស់ពួកគេផងដែរ។ លោក ស្រេតថា ថាវីស៊ីន បានរៀបការជាមួយវេជ្ជបណ្ឌិតថែទាំសម្រស់លោកស្រី Pakpilai Thavisin ដោយទទួលបានចំណងដៃកូនប្រុសពីរនាក់គឺ: ណាផាត់ ថាវីស៊ីន (Napat Thavisin) និង វ៉ារ៉ាត់ ថាវីស៊ីន (Warat Thavisin) និងកូនស្រីពៅឈ្មោះ ចាណាន់ដា ថាវីស៊ីន (Chananda Thavisin) ។ ក្រៅ​ពី​កាន់​ហ៊ុននៅ Sansiri នាង​ក៏​ជាម្ចាស់​ជំនួញជាច្រើន​ផ្សេង​ទៀតផង​ដែរ ហើយអ្នកជំនួញរូបនេះកំពុងកាន់កាប់ក្រុមហ៊ុនលក់ផលិតផលម្ហូបអាហារ និងហាងនំបុ័ង Kin Drink Co, Ltd ក្រុមហ៊ុនអាជីវកម្មផលិត និងចែកចាយអាហារ និងភេសជ្ជៈ Bev Babe Co., Ltd. ក្រុមហ៊ុន Taste Good Co., Ltd. ដែលកំពុងដំណើរការលើអាជីវកម្មសេវាកម្មម្ហូបអាហារនៅក្នុងភោជនីយដ្ឋាន ក្រុមហ៊ុនម៉ូទ័រអគ្គិសនី និងម៉ាស៊ីនភ្លើង Charger Management Co., Ltd. និងក្រុមហ៊ុនអាជីវកម្មផលិត និងបញ្ជូនអគ្គិសនី Iron Energy Corporation Co, Ltd ។ យ៉ាងណាមិញ ទ្រព្យសម្បត្តិសុទ្ធរបស់សេដ្ឋីនីវ័យក្មេងរូបនេះមិនត្រូវបានសារព័ត៌មានអង្គភាពណាមួយទម្លាយជាសាធារណៈនោះទេ៕ ដកស្រង់ពី៖ ព័ត៌មានកម្ពុជាថ្មី