ក្រសួងមហាផ្ទៃ ចេញសេចក្តីប្រកាសបដិសេធចំពោះការផ្សាយរបស់វិទ្យុអាស៊ីសេរី RFA Khmer.!!!
សេចក្តីប្រកាសបដិសេធន៍ព័ត៌មានរបស់ក្រសួងមហាផ្ទៃលេខ: ០០៨សប្រក រាជធានីភ្នំពេញ ចុះថ្ងៃសៅរ៍ ទី២៦ ខែសីហា ឆ្នាំ២០២៣ ឆ្លើយតបទៅនឹងការផ្សាយព័ត៌មានតាមគេហទំព័ររបស់វិទ្យុអាស៊ីសេរីជាភាសាខ្មែរ (RFA Khmer) នាថ្ងៃទី២៥ ខែសីហា ឆ្នាំ២០២៣. ក្រោមចំណងជើងថា «អ្នកឃ្លាំមើលរិះគន់ការតែងតាំងកូនចៅ និងសាច់ញាតិ លោក ស ខេង ស្អេកស្កះក្នុងក្រសួងមហាផ្ទៃ»
អ្នកនាំពាក្យក្រសួងមហាផ្ទៃ សូមប្រកាសបដិសេធ និងច្រាន ចោលជាដាច់ខាត ដោយសូមបកស្រាយជូនមហាជនបានជ្រាបដូចខាងក្រោម៖
១. ករណីផ្សាយថា សម្តេចក្រឡាហោម ស ខេង ផ្ទេរអំណាចឱ្យកូនប្រុស គឺ ឯកឧត្តមបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មកកាន់តំណែងជំនួសសម្តេច គឺជាការផ្សាយដែលមិន យល់ពីរដ្ឋធម្មនុញ្ញ ច្បាប់ និងគោលការណ៍របស់គណបក្សនយោបាយនានា ជុំវិញការរៀបចំនិងតែងតាំង សមាសភាពរាជរដ្ឋាភិបាល។ ពោលគឺ តំណែងដែលឯកឧត្តមបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃទទួលនាពេលនេះ ទី១- គឺជាការផ្គូផ្គងរបស់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ទី២- ជាការផ្តល់សេចក្តីទុកចិត្តដោយរដ្ឋសភា ដែលកើតចេញពីការ បោះឆ្នោតរបស់ប្រជាពលរដ្ឋ ទី៣-គឺជាការគោរពតាមព្រះរាជក្រឹត្យតែងតាំងរបស់ព្រះករុណាជាអម្ចាស់ជីវិត តម្កល់លើត្បូង។
២. ចំពោះការដែលនិយាយថា សម្ដេចក្រឡាហោម ស ខេង តែងតាំង លោក ស រដ្ឋា កូនប្រុសពៅ ជាអគ្គស្នងការរង នៃអគ្គស្នងការដ្ឋាននគរបាលជាតិនោះ គឺកាន់តែខុសធ្ងន់ទៅទៀត ព្រោះ ទី១-សម្តេច ក្រឡាហោម ស ខេង ពុំមានសិទ្ធិអំណាចក្នុងការតែងតាំងមន្ត្រីរាជការ និងអ្នកមុខអ្នកការក្នុងក្រសួងមហាផ្ទៃ តទៅទៀតឡើយ ដោយសាររាជរដ្ឋាភិបាលចាស់ត្រូវបានរំសាយ ក្រោយរាជរដ្ឋាភិបាលថ្មីចូលកាន់តំណែង។ ទី២-លោក ស រដ្ឋា ចូលបម្រើការងារជានគរបាលជាតិក្នុងក្របខ័ណ្ឌក្រសួងមហាផ្ទៃ រយៈពេល១៨ឆ្នាំ បន្ទាប់ពីរៀនចប់បរិញ្ញាបត្រ។ លោក បានឆ្លងកាត់ការរៀនជំនាញនគរបាលនៅប្រទេសអូស្ត្រាលី ០១ឆ្នាំ រួច បន្តរៀនជំនាញប្រឆាំងភេរវកម្ម ០១ឆ្នាំនៅសហព័ន្ធអាល្លឺម៉ង់ និងបានឆ្លងកាត់ការបណ្តុះបណ្ដាលនៅសាលា ភូមិន្ទរដ្ឋបាល ផងដែរ។ ផ្អែកតាមចំណេះដឹង បទពិសោធន៍ និងអតីតភាពការងារ លោក ស រដ្ឋា ត្រូវបាន ទទួលការតែងតាំងជាអគ្គនាយករង នៃអគ្គនាយកដ្ឋានអន្តោប្រវេសន៍ ដោយបានបំពេញការងារបានយ៉ាងល្អប្រសើរប្រកបដោយប្រសិទ្ធផល ជាអាទិ៍ ករណីចុះបង្ក្រាបបទល្មើសយ៉ាងក្តៅគគុកក្នុងខេត្តព្រះសីហនុ កន្លងទៅថ្មីៗនេះជាដើម។
ដូច្នេះ តំណែងអគ្គស្នងការរង នៃអគ្គស្នងការដ្ឋាននគរបាលរបស់លោក ស រដ្ឋា នាពេលនេះ គ្រាន់តែផ្ទេរពីអង្គភាពមួយទៅអង្គភាពមួយចំណុះក្រសួងមហាផ្ទៃដ៏ដែលប៉ុណ្ណោះ។
៣. ជារួម ការនិយាយថា សម្ដេចក្រឡាហោម តែងតាំងកូនចៅសាច់ញាតិស្កេកស្កះក្នុងសួងមហាផ្ទៃ បែបគ្រួសារនិយម គឺជាការផ្សាយដែលពុំបានស្វែងយល់ពីគោលការណ៍តែងតាំងឡើយ ផ្ទុយពីភាពប្រាកដនិយម និងមានចេតនាមួលបង្កាច់ ធ្វើឱ្យមតិសាធារណជនយល់ច្រឡំមកលើសម្ដេចក្រឡាហោម ស ខេង។
ផ្ទុយមកវិញ មានមហាជនជាសាក្សី, សម្តេចក្រឡាហោម ស ខេង ពុំមែនជា បុគ្គលសួនតួនិយម គិតតែអំពីគ្រួសារនិយម ផលប្រយោជន៍ឯកជន ដូចការផ្សព្វផ្សាយនោះឡើយ។ ពោលគឺ សម្ដេចក្រឡាហោម ស ខេង ពុំមែនជាបុគ្គលដែលគិតតែពីផលប្រយោជន៍ផ្ទាល់ខ្លួននោះទេ គឺលោកតែង តែតម្កល់សុខទុក្ខប្រជាពលរដ្ឋ ផលប្រយោជន៍មហាជន ផលប្រយោជន៍សាធារណៈ និងផលប្រយោជន៍ ប្រទេសជាតិជាធំ ។
តាមការពិត មហាជនបានដឹងអស់ទៅហើយថា ការផ្សាយរបស់វិទ្យុមួយនេះ មានចរិតបែបណា និង ក្នុងគោលបំណងអ្វីនោះ។ និយាយឱ្យចំវិទ្យុនេះលែងជាវីទ្យុវិជ្ជាជីវៈក្នុងរបបសារព័ត៌មានទៀតហើយ គឺក្លាយជា វិទ្យុបម្រើឱ្យមនោគមន៍វិជ្ជាបរទេស និងពួកឧទ្ទាម ដែលនិរទេសខ្លួនតែប៉ុណ្ណោះ។ ជាក់ស្តែង វិទ្យុនេះធ្លាប់បានផ្សាយបទសម្ភាសជាមួយអ្នកវិភាគមានរោគសរសៃប្រសាទម្នាក់ ដែលនិរទេសខ្លួនទៅក្រៅស្រុក បាននិយាយថា មានការដោះដូរដីក្រសួងមហាផ្ទៃ។ តែជាការផ្សាយខុសស្រឡះ។ ពោលគឺ: មិនត្រឹមតែពុំមែនការ ដោះដូរដូចការផ្សាយ បែរជាមានការសាងសង់អគារទីស្ដីការក្រសួងកម្ពស់៩ជាន់យ៉ាងស្កឹមស្កៃអមដោយ រចនាប័ទ្មខ្មែរ យ៉ាងល្អប្រណិត ជាទីមោទករបស់មហាជនគ្រប់និន្នាការទៅវិញ។
ជាថ្មីម្ដងទៀត អ្នកនាំពាក្យក្រសួងមហាផ្ទៃ ចាត់ទុកការផ្សាយរបស់វិទ្យុអាស៊ីសេរីលើករណីនេះ ជាការផ្សាយគ្មានវិជ្ជាជីវៈ និងមានចរិតនយោបាយ ក្នុងគោលបំណងទុច្ចរិតធ្វើឱ្យប្រជាពលរដ្ឋមានការភាន់ច្រឡំ ប៉ះពាល់ដល់កិត្តិយស និងសេចក្តីថ្លៃថ្នូររបស់សម្ដេចក្រឡាហោម ដែលស្ទើរពេញមួយជីវិត លោកបាន និងកំពុងខិតខំបម្រើជាតិ សាសនា ព្រះមហាក្សត្រ និងបានចូលរួមចំណែកយ៉ាងធំធេង ក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន ធ្វើឲ្យមាតុភូមិកម្ពុជារបស់យើង មានសន្តិភាព ស្ថិរភាព នយោបាយ សន្តិសុខ និងសណ្តាប់ធ្នាប់សាធារណៈ និងមានការរីកចម្រើនគ្រប់វិស័យ៕
