មានវីដេអូ! រដ្ឋបាលក្រុងប៉ោយប៉ែត លាងសម្អាតផ្លូវថ្នល់ ដើម្បីបណ្តេញឧបទ្រពចង្រៃ គ្រោះកាច គ្រោះមហន្តរាយ សុំសេចក្តីសុខ សេចក្តីចំរើន ជូនប្រជាពលរដ្ឋ ក្នុងឱកាសចូលឆ្នាំថ្មីឆ្នាំសកល២០២៤
ខេត្តបន្ទាយមានជ័យ៖ រដ្ឋបាលក្រុងប៉ោយប៉ែត លាងសំអាតផ្លូវថ្នល់ ដើម្បីបណ្តេញឧបទ្រពចង្រៃ គ្រោះកាច គ្រោះមហន្តរាយ សុំសេចក្តីសុខ សេចក្តីចំរើនជូនប្រជាពលរដ្ឋក្នុងឱកាសចូលឆ្នាំថ្មីឆ្នាំសកល២០២៤ ដែលធ្វើឡើងនៅថ្ងៃទី៣១ ខែធ្នូ ឆ្នាំ២០២៣ នៅតាមបណ្តោយផ្លូវជាតិលេខ ចាប់ពីភ្លើងស្តុបផ្សារកណ្តាល រហូតដល់រង្វង់មូលច្រកទ្វារព្រំដែនអន្តរជាតិប៉ោយប៉ែត។
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានមានប្រសាសន៍ថា៖ រដ្ឋបាលក្រុងប៉ោយប៉ែតធ្វើការលាងសំអាតផ្លូវជាតិលេខ៥ ដែលលោកដឹកនាំផ្ទាល់ចែកជាពីរក្រុម ក្រុមទីមួយចាប់ពីសួនប៉ោយប៉ែតតេជោឈ្នះឈ្នះទៅកាន់រង្វង់មូលប៉ោយប៉ែតច្រកទ្វារព្រំដែនអន្តរជាតិប៉ោយប៉ែត និងក្រុមទី២ចាប់ពីសួនប៉ោយប៉ែតេជោឈ្នះឈ្នះ ទៅកាន់ភ្លើងស្តុបផ្សារកណ្តាល។ ក្រុមនីមួយៗត្រូវយករថយន្តបាញ់ទឹក អំបោស ធ្វើការលាងសំអាតផ្លូវឲ្យបានស្អាត ដើម្បីទទួលស្វាគមន៍ឆ្នាំថ្មីឆ្នាំសកល២០២៤។
លោក អភិបាលក្រុងបញ្ជាក់ថា៖ ការលាងសំអាតផ្លូវថ្នល់ នៅថ្ងៃបំណាច់ឆ្នាំចាស់ ផ្លាស់ចូលឆ្នាំថ្មី ឆ្នាំសកល២០២៤នេះ ក្នុងគោលបំណង បណ្តេញឧបទ្រពចង្រៃ គ្រោះកាច គ្រោះមហន្តរាយ សុំសេចក្តីសុខ បញ្ជៀសគ្រោះថ្នាក់ចរាចរណ៍ សូមឲ្យជូនប្រជាពលរដ្ឋទទួលបានសេចក្តី សេចក្តីចំរើន ក្នុងឱកាសចូលឆ្នាំថ្មីឆ្នាំសកល២០២៤នេះ៕
