ខេត្តកណ្តាល៖ មានសេចក្ដីរាយការណ៍ព័ត៌មានថា នៅមូលដ្ឋានទឹកដីស្រុកលើកដែក មានទីតាំងកាស៊ីណូមួយកន្លែង ដែលមានស្លាកយីហោ «ថ្មពេជ្រ» នៅតំបន់ព្រំដែនច្រកទ្វារអន្តរជាតិក្អមសំណ ស្ថិតក្នុងភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្តាល មានការបើកសង្វៀនបញ្ជល់មាន់ និងល្បែងស៊ីសងគ្រប់ប្រភេទ ដោយអនុញ្ញាតិអោយជនជាតិខ្មែរចូលលេងភ្នាល់ដាក់លុយរាប់ពាន់ដុល្លារ ម៉ាសសេរី។ យោងតាមប្រភពបានឲ្យដឹងថា អ្នកចូលលេងល្បែងមានទាំងពលរដ្ឋខ្មែរ និងជនជាតិវៀតណាម ហើយភាគច្រើនលើសលប់ជាពលរដ្ឋខ្មែរដែលចូលចិត្តលេងល្បែងបញ្ជល់មាន់ អាប៉ោង បៀ និងយូគី ខណៈដែលសមត្ថកិច្ចប្រចាំកាស៊ីណូថ្មពេជ្រ មិនចាត់វិធានការទប់ស្កាត់ឡើយ។ ចំណែកអាជ្ញាធរ បានរក្សាភាពស្ងៀមស្ងាត់បើកភ្លើងខៀវម្ចាស់កាស៊ីណូថ្មពេជ្រ ច្រកក្អមសំណ បំពានច្បាប់បានយ៉ាងរលូន។ បើតាមការបង្ហើបពីអ្នកចូលទៅក្នុងកាស៊ីណូថ្មពេជ្រ ច្រកក្អមសំណ បានឲ្យដឹងថា កាស៊ីណូនេះ មានមន្ត្រីយោធាធំម្នាក់នៅពីក្រោយខ្នងទើបអាចបើកល្បែងបញ្ជល់មាន់ បៀ អាប៉ោង យូគី ហើយកៀងគរពលរដ្ឋខ្មែរឲ្យចូលលេងល្បែងយ៉ាងពពាក់ពពូន។ ប្រភពបានបង្ហើបឲ្យដឹងទៀតថា ជាមួយគ្នានោះក៏មានការឃុបឃិតគ្នាជាប្រព័ន្ធជាមួយមន្ត្រីជំនាញ អាជ្ញាធរ ប៉ូលីសប៉ុស្តិ៍ច្រកទ្វារអន្តោប្រវេសន៍ច្រកក្អមសំណ សហការគ្នាជាមួយមេការកាស៊ីណូ រត់ការឲ្យជនជាតិវៀតណាមអន្តោប្រវេសន៍ខុសច្បាប់ គ្មានប៉ាស្ព័ អាចចូលលេងល្បែងស៊ីសងយ៉ាងពេញបន្ទុក ហើយម្ចាស់កាស៊ីណូប្រមូលលុយបានយ៉ាងច្រើនសន្ធឹកសន្ធាប់។ ដោយក្នុងជនជាតិវៀតណាមម្នាក់ ត្រូវបង់ចាប់ពី ១សែនដុង ទៅ ៤សែនដុង (លុយវៀតណាម) ចូលតាមច្រករបៀងមាត់ទន្លេ។ យោងតាមប្រភពពីមន្ត្រីម្នាក់សុំមិនបញ្ចេញឈ្មោះបានឲ្យដឹងថា កាស៊ីណូថ្មពេជ្រ "ច្រកក្អមសំណ" ខាងលើនេះ អាជ្ញាប័ណ្ណត្រូវបានផុតសុពលភាពយូរមកហើយ ខណៈដែលម្ចាស់កាស៊ីណូនៅតែបន្តជួលឱ្យថៅកែជនជាតិវៀតណាម បើកលេងល្បែងគ្រប់ប្រភេទដដែល។ ទោះជាយ៉ាងណា នេះគ្រាន់តែជាប្រភពដែលអង្គភាពសារព័ត៌មានយើងទទួលបានតែប៉ុណ្ណោះ ការពិតយ៉ាងណាវិញ អង្គភាពសារព័ត៌មានយើងនៅមិនទាន់ទទួលបានការបកស្រាយបំភ្លឺពីម្ចាស់កាស៊ីណូ ក៏ដូចជាមន្ត្រីប៉ុស្តិ៍ច្រកទ្វារអន្តោប្រវេសន៍ក្អមសំណនៅឡើយទេ។ ជាក់ស្ដែង កាលពីថ្ងៃ ទី៧ ខែមេសា ឆ្នាំ២០២៤ អ្នកសារព័ត៌មានជាច្រើនអង្គភាព បានមកធ្វើការចុះយកព័ត៌មានផ្ទាល់នៅខាងមុខកាស៊ីណូថ្មពេជ្រ ច្រកក្អមសំណ ហើយក៏បានឃើញថាពិតជាមានពលរដ្ឋខ្មែរ និងវៀតណាមចេញចូលលេងល្បែងយ៉ាងច្រើនសន្ធឹកសន្ធាប់ស្រែកហូរត្រហឺងអឺងកងពិតប្រាកដមែន។ យោងតាមសេចក្តីណែនាំ ស្ដីពីការរឹតត្បិតពីការលេងល្បែងកាស៊ីណូនៅក្នុងព្រះរាជាណាចក្រកម្ពុជារបស់គណៈកម្មការគ្រប់គ្រងល្បែងពាណិជ្ជកម្មកម្ពុជា អាជ្ញាធរត្រូវហាមដាច់ខាត មិនឲ្យពលរដ្ឋខ្មែរទូទៅ និងបុគ្គលមួយចំនួនទៀត ចូលលេងល្បែងក្នុងកាស៊ីណូនៅកម្ពុជាឡើយ។ តាមរយៈសេចក្ដីណែនាំ ស្ដីពីការរឹតត្បិតពីការលេងល្បែង ក្នុងកាស៊ីណូ នៅក្នុងព្រះរាជាណាចក្រកម្ពុជា គណៈកម្មាធិការគ្រប់គ្រងល្បែងពាណិជ្ជកម្មកម្ពុជា បានបញ្ជាក់ថា ក្នុងករណី ប្រតិបត្តិករ និង/ឬកម្មសិទ្ធិករកាស៊ីណូ មិនអនុវត្តតាមសេចក្តីណែនាំនេះ ត្រូវចាត់ទុកថា បានប្រព្រឹត្តល្មើសទៅនឹងច្បាប់ ស្តីពីការគ្រប់គ្រងល្បែងពាណិជ្ជកម្ម ដែលត្រូវប្រឈមនឹងការដាក់ទណ្ឌកម្ម រដ្ឋបាល និង/ឬពិន័យអន្តរការណ៍ ស្របតាមការកំណត់ដោយច្បាប់ និងលិខិតបទដ្ឋានគតិយុត្តជាធរមាន ។ ប៉ុន្តែផ្ទុយទៅវិញ កាស៊ីណូថ្មពេជ្រ ច្រកក្អមសំណ បែរជាបណ្ដែតបណ្ដោយបើកដៃឲ្យពលរដ្ឋខ្មែរទូទៅ ទៅលេងបានដោយរលូន មិនថាចាស់ឬក្មេង ប្រុសឬស្រីឬមន្ត្រីរាជការឱ្យតែមានប្រាក់គឺអាចចូលលេងល្បែងគ្រប់ប្រភេទបានម៉ាសេរី។ ទង្វើទាំងនេះ សរបញ្ជាក់ឲ្យឃើញថា កាស៊ីណូថ្មពេជ្រ ច្រកក្អមសំណ ហាក់កំពុងផ្គើននឹងបទបញ្ជាសេចក្តីណែនាំ របស់រាជរដ្ឋាភិបាល ខណៈដែលលោកកំពុងខិតខំអភិវឌ្ឍន៍ប្រទេសជាតិ កាត់បន្ថយភាពក្រីក្រ រក្សាស្ថេរភាពសន្តិសុខនៅក្នុងសង្គម។ ដោយសារមានល្បែងស៊ីសងនៅក្នុងមូលដ្ឋានយ៉ាងគគ្រឹកគគ្រេងបែបនេះ ពលរដ្ឋបានសំដែងការព្រួយបារម្ភយ៉ាងខ្លាំង ពោលគឺ ជីវភាពប្រជាពលរដ្ឋ អ្នកញៀនល្បែងមួយចំនួនធ្លាក់ដុនដាប អស់ទ្រព្យសម្បត្តិ អស់ម៉ូតូ អស់ឡាន រីឯក្រុមគ្រួសារខ្លះទៀត ឈានទៅដល់ការឈ្លោះប្រកែកគ្នា ប្រើអំពើហិង្សា បែកបាក់គ្រួសារ និងលែងលះគ្នាក៏មានដែរ។ អាស្រ័យហេតុនេះ សូមគោរពជូនដល់អាជ្ញាធរគ្រប់ជាន់ថ្នាក់ក្រសួងពាក់ព័ន្ធ ជាពិសេសគណៈកម្មការគ្រប់គ្រងល្បែងកម្ពុជា មេត្តាមានវិធានការ ចុះត្រួតពិនិត្យកាស៊ីណូថ្មពេជ្រចក្អមសំណ ក៏ដូចជាអាជ្ញាបណ្ណ ផងទាន៕
ព័ត៌មានគួរចាប់អារម្មណ៍
អ្នកអង្គម្ចាស់ ស៊ីសុវត្ថិ សិទ្ធីដែន ឧត្ដមប្រឹក្សាផ្ទាល់ សម្តេចព្រះមហាសង្ឃរាជ នៃព្រះរាជាណាចក្រកម្ពុជាទាំងពីរគណៈយាងចុះសួរសុខទុក្ខប្រជាពលករនៅច្រកទ្វារព្រំដែនអន្តរជាតិដូង ក្នុងស្រុកកំរៀង ខេត្តបាត់ដំបង (គេហទំព័រ ប៉ោយប៉ែត ប៉ុស្តិ៍)
សហព័ន្ធស្វីស បន្តគាំទ្រកំណែទម្រង់វិមជ្ឈការនៅកម្ពុជា និងគម្រោងបណ្ដុះបណ្ដាលពង្រឹងសមត្ថភាពមន្ត្រីក្រសួងមហាផ្ទៃ (គេហទំព័រ ប៉ោយប៉ែត ប៉ុស្តិ៍)
ព្រឹត្តិការណ៍សម្តែងក្បាច់គុនល្បុក្កតោ-ក្បាច់គុនសៅលីញ រួមគ្នា នៅមុខប្រាសាទបាយ័ន២៤មេសា.! (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា បន្តដឹកនាំគណៈប្រតិភូ ស្ដាប់បទបង្ហាញពាក់ព័ន្ធវិស័យសុវត្ថិភាពនិងសណ្ដាប់ធ្នាប់សាធារណៈ (គេហទំព័រ ប៉ោយប៉ែត ប៉ុស្តិ៍)
ឯកឧត្តមអភិសន្តិបណ្ឌិត ស សុខា និងប្រតិភូ អញ្ជើញស្តាប់បទបង្ហាញពាក់ព័ន្ធនឹងហិរញ្ញវត្ថុសាធារណៈ និងយន្តការជាក់ស្តែងនៃលទ្ធិប្រជាធិបតេយ្យដោយផ្ទាល់ (គេហទំព័រ ប៉ោយប៉ែត ប៉ុស្តិ៍)
វីដែអូ
ចំនួនអ្នកទស្សនា