ខេត្តស្ទឹងត្រែង៖ កម្លាំងនគរបាលខេត្តស្ទឹងត្រែង បានឃាត់ខ្លួនបុរសជនជាតិឡាវម្នាក់ ពាក់ព័ន្ធករណីជួញដូរគ្រឿងញៀនជិត ៣គីឡូក្រាម នៅក្បែរច្រកព្រំដែន កម្ពុជា-ឡាវ ត្រពាំងគ្រៀល បន្ទាប់ពីជនសង្ស័យឆ្លងដែនចូលមកទឹកដីកម្ពុជា កាលពីយប់ថ្ងៃទី០២ ខែតុលា ឆ្នាំ២០១៩ ម្សិលមិញនេះ។ ជនសង្ស័យមានឈ្មោះ សា វី ភេទប្រុស អាយុ ៣៥ឆ្នាំ ជនជាតិឡាវ មុខរបរ កសិករ រស់នៅ ភូមិឡាក់សៅ ស្រុកខាំកឺប ខេត្តបូលីខាំសៃ ប្រទេសឡាវ។ បច្ចុប្បន្នៈ ជនសង្ស័យ រួមនិងវត្ថុតាង ត្រូវបាន បញ្ជូនទៅកាន់ស្នងការនគរបាលខេត្តស្ទឹងត្រែង ដើម្បីចាត់ការបន្តតាមនីតិវិធី និងកសាងសំណុំរឿងបញ្ជូនទៅតុលាការខេត្តចាត់ការបន្តតាមផ្លូវច្បាប់។ ជុំវិញករណីជួញដូរគ្រឿងញៀនឆ្លងដែនដោយខុសច្បាប់ខាងលើ នៅតែកើតមានជាហូរហែ នៅតាមច្រកព្រំដែនកម្ពុជា -ឡាវ។ ប្រភពពីប្រជាពលរដ្ឋដែលរស់នៅទីនោះ និង ទូទាំងព្រះរាជណាចក្រកម្ពុជា បាននិយាយនៅតាមតុកាហ្វេ បានលើកថា៖ ឃើញតែសមត្ថកិច្ចបង្ក្រាបជាញឹកញាប់ ក៏ប៉ុន្តែ នៅតែមានជនបរទេស ហ៊ានជួញដូរគ្រឿងញៀនធំៗ នាំលំហូរចូលមកទឹកដីកម្ពុជា ដ៏ដែលៗ ហើយការជួញដូរគ្រឿងញៀននោះម្តងៗមានលក្ខណៈទ្រុងទ្រាយធំៗទៀតផង មតិប្រជាពលរដ្ឋនៅតាមតុកាហ្វេ នៅពេលព្រឹក និង ពេលថ្ងៃ បានរិះគន់ទៅដល់មន្ត្រីគ្រប់ជំនាញច្រើនស្ថាប័ន ដែលប្រចាំការនៅច្រកទ្វារព្រំដែននោះថា៖ (បើខ្មោចស្រុកមិនបើកដៃតើខ្មោចព្រៃម្តេចនិងហ៊ាននាំគ្រឿងញៀនចូលមកកម្ពុជាបាន) បើច្រកទ្វារព្រំដែននិមួយៗ សុទ្ធតែមានការត្រួតពិនិត្យត្រឹមត្រូវ ជាលក្ខណៈស្តង់ដារទើបបានអាចអោយចូលមកបាន។ មតិប្រជាពលរដ្ឋនៅតាមតុកាហ្វេនៅពេលព្រឹកនិងពេលថ្ងៃបានបន្តខ្សឹបខ្សៀវដាក់គ្នាថា៖ ស្រុកខ្មែរយើងតាចឹងឯង គឺដោយសារតែមន្ត្រីមួយក្តាប់តូច គិតតែផលប្រយោជន៍ផ្ទាល់ខ្លួន មិនបានគិតដល់ផលប្រយោជន៍ជាតិ និងធ្វើអោយប៉ះពាល់ បំពុលដល់សង្គមជាតិ កូនគេកូនយើងទេ ដូចពាក្យចាស់ពលថា៖(ស៊ីបានចេះតែស៊ីទៅ) មតិមហាជនទូទៅ ក៏សូមសំណូមពរដល់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សូមជួយដាក់ការស៊ើបអង្កេត ទៅលើសមត្ថកិច្ចពាក់ព័ន្ធជាច្រើនស្ថាប័នប្រចាំការនៅច្រកទ្វារព្រំដែនកម្ពុជា-ឡាវ អោយបានស៊ីជម្រៅផងទាន។ ដើម្បីប្រទេសជាតិ មានសុខសន្តិភាព ដែលជាគោលនយោបាយឈ្នះឈ្នះ របស់សម្តេចអគ្គមហាសេនាបតីតេជោ ហ៊ុន សែន ដែលជានាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេច លោក ខិតខំរិះរកគ្រប់មធ្យោបាយ កសាងអភិវឌ្ឍន៍ប្រទេសជាតិបានរីកចំរើន មានស្ថេរភាព សុខសន្តិភាព ដូចសព្វថៃ្ងនេះ៕ ដោយៈ ព្រីង សំឡត អ្នកយកព័ត៌មាន គេហទំព័រ ប៉ោយប៉ែតប៉ុស្តិ៍ www.poipetpostnews.com