វ៉ាស៊ីនតោន៖ បើយោងតាមការចុះផ្សាយរបស់ទីភ្នាក់ងារព័ត៌មាន The Wall Street Journal នៅព្រឹកថ្ងៃទី១៧ ខែកក្កដា ឆ្នាំ២០១៩ នេះបានឲ្យដឹងថា៖ ប្រធានាធិបតីអាមេរិកលោក ដូណាល់ ត្រាំ នាថ្ងៃអង្គារសប្តាហ៍នេះ បាននិយាយថា៖ រដ្ឋការរបស់លោកនិងមិនលក់ យន្តហោះចម្បាំង F-35 ទៅអោយ តួកគី ឡើយ ស្របពេលដែលប្រព័ន្ធមីស៊ីលរុស្ស៊ី S-400 បានមកដល់ទឹកដីតួកគី។ លោក ដូណាល់ ត្រាំ បានថ្លែងប្រាប់ទៅកាន់ក្រុមអ្នកសារព័ត៌មានថា៖ លោកប្រាប់តួកគីឲ្យច្បាស់ ថា រដ្ឋការលោកនិងមិនលក់យន្តហោះ F-35 អោយទៅ តួកគី ជាដាច់ខាត។ បន្ថែមពីនេះ រដ្ឋមន្រ្តីការពារជាតិស្តីទីអាមេរិក លោក ម៉ាក អ៊ែស្ពើ ក៏បានបញ្ជាក់ដែរថា៖ តួកមានជម្រើសតែមួយគត់ គឺយក S-400 ឬមួយក៏ F-35 តែមិនអាចយកទាំងពីរឡើយ។ កន្លងមកទីក្រុងវ៉ាស៊ីនតោន បានទទូចមិនចង់ឲ្យទីក្រុងអង់ការ៉ាទិញ S-400 ពីរុស្ស៊ី ដោយសារតែការព្រួយបារម្ភថា ប្រព័ន្ធមីស៊ីលការពារដែនអាកាសនេះ នឹងបង្កហានិភ័យដល់ព័ត៌មានសម្ងាត់ នៅពីក្រោយបច្ចេកវិទ្យាយន្តហោះចម្បាំង F-35 ប្រសិនបើតួកគីមានសព្វាវុធទាំងពីរនៅក្នុងដៃ។ ដើម្បីរារាំងរឿងនេះ អាមេរិកបានព្រមានដកទីក្រុងអង់ការ៉ាចេញពីកម្មវិធី F-35 ដែលតួកគីបានខិតខំចំណាយលុយអស់ខ្ទង់ពាន់ លានដុល្លាររួចស្រេចដើម្បីចូលរួមអភិវឌ្ឍន៍ ហើយគ្រោងនឹងទិញយកទៅប្រើ ហើយលើសពីនេះទីក្រុងវ៉ាស៊ីនតោនក៏បានគំរាម ដាក់ទណ្ឌកម្មសេដ្ឋកិច្ចលើតួកគីថែមទៀតផង។ ទោះបីជាយ៉ាងណាក៏ដោយ តួកគី មិនបានស្តាប់តាមអាមេរិកឡើយ ហើយកាលពីថ្ងៃសុក្រសប្តាហ៍មុន តួកគី បានចាប់ផ្តើមទទួលយកគ្រឿងបរិក្ខា នៃប្រព័ន្ធមីស៊ីល S-400 ហើយ។ ជាមួយគ្នានេះផងដែរ ប្រធានាធិបតី តួកគី លោក អឺដូហ្គាន់ បានបង្ហាញក្តីរំពឹងថា លោក ត្រាំ អាចនឹងជួយរកមធ្យោយបាយស្រាយ ឬក៏លើកលែងការដាក់ទណ្ឌកម្មលើតួកគី ៕ ដោយៈ គេហទំព័រ ប៉ោយប៉ែតប៉ុស្តិ៍ www.poipetpotnews.com