(មានវីដេអូ) តំណាងអយ្យការចោទប្រកាន់ចៅក្រមរម គង់ ខេមរា ពីបទមនុស្សឃាតដោយអចេតនា រឿងបើករថយន្តដេញបុកចោរស្រីឆក់កាបូបស្លាប់...
រាជធានីភ្នំពេញ ៖ លោក គុជ គឹមឡុង ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០២០ បានបើកការស៊ើបសួរលើសំណុំរឿងចៅក្រមខេត្តកោះកុង ពាក់ព័ន្ធករណីបើកររថយន្តដេញបំបុកចោរស្រីម្នាក់ដែលឆក់កាបូប បណ្តាលអោយស្លាប់ ដោយបានចោទប្រកាន់ជាផ្លូវការហើយ ។
បន្ទាប់ពីបើកការសាកសួរពេញមួយថ្ងៃ តំណាងអយ្យការបានចោទប្រកាន់ជនសង្ស័យពីបទ: មនុស្សឃាតដោយអចេតនា រួចបានចាត់បញ្ជូនទៅខាងចៅក្រមស៊ើបសួរ ដើម្បីបន្តនីតិវិធី ។ ប៉ុន្តែដោយផុតម៉ោងរដ្ឋបាលសំណុំរឿងនេះមិនទាន់បានធ្លាក់ទៅដល់ដៃចៅក្រមរូបណាទេ ដូច្នោះតុលាការបានផ្ញើជនសង្ស័យទៅសមត្តកិច្ចគ្រប់គ្រងវិញនឹងតម្រូវអោយព្រឹកថ្ងៃទី១១ ខែកក្កដា នាំមកសាកសួរបន្ត ដើម្បីសម្រេចតាមធ្វើការឃុំខ្លួន ឬមិនឃុំខ្លួនអាស្រ័យលើឆន្ទានុសិទ្ធិរបស់លោកចៅក្រមស៊ើបសួរ ។
សូមបញ្ជាក់ថា៖ ជនសង្ស័យម្នាក់ជាស្ត្រីតែកាត់សក់ធ្វើជាប្រុសបានត្រូវចៅក្រមសាលាដំបូងខេត្តកោះកុងម្នាក់ បើករថយន្តដេញបុក បណ្តាលអោយស្លាប់នៅនឹងកន្លែង ក្រោយពីជនសង្ស័យបានឆក់កាបូបរបស់គាត់ដែលនៅក្នុងនោះមានប្រាក់ជាង៦ពាន់ដុល្លារអាមេរិក ។ ហេតហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោងប្រមាណ០២និង៤០នាទីរសៀល ថ្ងៃទី៨ ខែកក្កដា ឆ្នាំ២០២០ នៅខាងត្បូងហាងលក់បាយសុខហុក តាមផ្លូវភ្នំពេញ-ហាណូយ ក្នុងភូមិរោងចក្រ សង្កាត់គោកឃ្លាង ខណ្ឌសែនសុខ ។
ជនសង្ស័យដែលរថយន្តបុកស្លាប់នោះឈ្មោះ សាយ គឹមនី ភេទស្រី អាយុ៣០ឆ្នាំ តែកាត់សក់តែងខ្លួនធ្វើប្រុស មានទីលំនៅផ្ទះលេខ២៧ ផ្លូវលេខ២៣៦ ភូមិសែនសុខ សង្កាត់ឃ្មួញ ខណ្ឌសែនសុខ រាជធានីភ្នំពេញ ត្រូវរថយន្តបុកពីក្រោយបោកក្បាលស្លាប់នៅនឹងកន្លែង ពេលព្យាយាមជិះម៉ូតូគេចខ្លួន ។ ចំណែកអ្នកដែលបើករថយន្តបុកមនុស្សស្លាប់នោះឈ្មោះ គង់ ខេមរា អាយុប្រហែល៤០ឆ្នាំ ជាចៅក្រមនៅសាលាដំបូងខេត្តកោះកុង ជិះរថយន្តហាយឡែនឌ័រ ពណ៌ស ពាក់ផ្លាកលេខ ភ្នំពេញ ២AF-៧០០៦ ។
ប្រភពព័ត៌មាននៅកន្លែងកើតហេតុបានឱ្យដឹងថា៖ ដំបូងគេឃើញស្ត្រីជាជនសង្ស័យជិះម៉ូតូហុងដា ស៊េរីឆ្នាំ២០១៩ ពាក់ផ្លាកលេខ ភ្នំពេញ ១HO-២៥៤៦ ពីទិសខាងជើងទៅខាងត្បូង ក្នុងល្បឿនលឿន ហើយមានរថយនហាយឡែនឌ័រមួយគ្រឿងបើកដេញតាមពីក្រោយ ។ លុះនៅពេលទៅដល់ចំណុចខាងលើ ក៏ត្រូវរថយន្តនោះបុកពីក្រោយពេញទំហឹង បណ្តាលឲ្យដួលបោកទៅនឹងថ្នល់ស្លាប់នៅនឹងកន្លែង ។
នៅក្នុងហេតុការណ៍នេះ ម៉ូតូត្រូវរថយន្តបុកដាច់ផ្លាកលេខ ប៉ើងខ្ទាតទៅលើចិញ្ចើមផ្លូវ ។ ភ្លាមៗគេឃើញកាបូបប្រាក់ខ្ទាតជ្រុះលើផ្លូវ ហើយម្ចាស់រថយន្តក៏ចុះរត់ទៅរើសយកមកវិញ ។
តាមសម្តីម្ចាស់រថយន្តបានអោយដឹងថា៖ គាត់ជាចៅក្រមនៅសាលាដំបូងខេត្តកោះកុង គាត់ពុំមានចេតនាបុកជនសង្ស័យឱ្យស្លាប់នោះទេ ។ មុនពេលកើតហេតុ គាត់បានជិះរថយន្តទៅកាត់សក់នៅតាមផ្លូវលេខ១០១១ ក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ នៅពេលគាត់ចុះពីលើរថយន្តដោយកាន់កាបូបនៅនឹងដៃ ស្រាប់តែជនសង្ស័យរូបនេះបានធ្វើសកម្មភាពឆក់យកកាបូបរួចរត់គេចខ្លួន ។
ភ្លាមៗនោះ គាត់បានជិះរថយន្តដេញតាមក្នុងគោលបំណងកៀរផ្តួលម៉ូតូ លុះមកដល់ចំណុចខាងលើ មានរថយន្តមួយគ្រឿងឆ្លងកាត់ ឯម៉ូតូជនសង្ស័យចាប់ហ្វ្រាំងបន្ថយលឿន ក៏ត្រូវរថយន្តគាត់បុកពីក្រោយបណ្តាលអោយជនសង្ស័យស្លាប់តែម្តង ។
តាមការអះអាងរបស់ជាចៅក្រមឱ្យដឹងថា នៅក្នុងកាបូបគាត់ដែលត្រូវចោរឆក់នោះមានប្រាក់ជាង៦ពាន់ដុល្លារអាមេរិក ។
ក្រោយកើតហេតុ ចៅក្រុមរូបនេះ ត្រូវបានសមត្តកិច្ចនាំទៅកាន់អធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងចាត់ការតាមនីតិវិធី ៕
ដោយៈ សេង រត្ន័ និពន្ធនាយក
គេហទំព័រ ប៉ោយប៉ែត ប៉ុស្តិ៍
www.poipetpostnews.com
